ECLESIASTÉS 6 - Biblia Guarani Tumpa Iñee

¹ Kuae ɨvɨ pe oime mbae ikavimbae yae ete opaete vae reta ipɨte pe aecha vae, jae ko:

² Tumpa omee amogüe pe täta oikokatu vaerä, imboetea yae vaerä, jare mbaetɨ mbae oata chupe vaerä; ërei mbaetɨ omaeño oyekou opaete jókuae iparavɨkɨagüe re, echa ko ambuae vaei oyekou jese. ¡Kuaekuae mbaeä etei ko, jare jasɨ katu yae ko!

³ Yepe mona metei kuimbae güɨnoi cien taɨ, jare oiko ɨma año; ërei ɨma año oiko reve, mbaetɨ yave oyekou opaete mbaembae re ani mbaetɨ oñeotɨ kavi, che jae jókuae nunga pe, michia raɨ okuagüe jërakua kavi yeño jókuae kuimbae güi.

⁴ Echa yepe tëi jókuae michia raɨ oa kaviä, jare jee okañɨ ye voi,

⁵ mbaetɨ oecha kuaraɨ, mbaetɨ etei mbae oikuaa, ërei oputuu kavi jókuae kuimbae oikokatu tëi vae güi,

⁶ echa jókuae kuimbae ipuere tëi oiko dos mil año, ërei mbaetɨ oyekou mbaembae güɨnoigüe re. Oyovakeño ko ¡opaete vae yogüɨraja meteia peño!

⁷ Opaete kuimbae iparavɨkɨ jae ko okaru vaerä, ërei mbaetɨi yangapɨɨ.

⁸ Echa yarakuaa vae, yarakuaambae ndive oyovakeño ko; ¿mbae pa güɨnoi paravete vae, oikatu reve oiko ïru vae reta ipɨte pe vae?

⁹ Yaecha etei vae ko ikavi yae, jókuae yaechambae reve yaipota tëi vae güi. Ërei kuaekuae mbaeä etei ko, yayemoambekoiño ma ko jese.

¹⁰ Añave oime ma vae, oyembojee ma ko jökorai vaerä, yaikuaa vi kuimbae ngaraa ipuere oñeraro jókuae Imbaepuere yae ete chugüi vae ndive.

¹¹ ¡Añetete!, jeta miari oimea pe, jeta vi ñee osirivembae; mbaetɨ etei jókuae mbaerä ikavi.

¹² Echa, ¿kia pa oikuaa mbae ra ko ikavita kuimbae peguarä vae, opaete ara michi peguaño oiko ramboeve? Echa jekove oasa ko metei küaraɨa rami. ¿Omano güire, kia pa ipuereta jei chupe, mbae ra kuae ɨvɨ pe oasata vae?