ECLESIASTÉS 3 - Biblia Guarani Tumpa Iñee

Opaete mbaembae oime iara

¹ Kuae ɨvɨ pe oime opaete mbaembae oyeapo vae iara; opaete mbaembae oyeapo vae oime iora:

² Oime ara, michia raɨ oa vaerä, jare oime vi mano iara. Oime ara, ñamaetɨ vaerä, jare oime vi mbaarɨvo iara.

³ Oime yeyuka iara, oime vi ñaporopoano vae iara. Oime ara, mbae yamboai vaerä, oime vi ara, mbae ñamopüa vaerä.

⁴ Oime ara, yayaeo vaerä, oime vi ara, yapuka vaerä. Oime ara, ñaporoäpiro vaerä, oime vi ara, yapɨrae vaerä.

⁵ Oime ara, ita yamombo vaerä, oime vi ara, ita yamboatɨ vaerä. Oime ara, yayoaɨu vaerä, oime vi yombosɨrɨ iara.

⁶ Oime ara, mbae yaeka vaerä, oime vi ara, ñanemaekañɨ vaerä. Oime ara, mbae ñañovatu vaerä, oime vi ara, mbae yamombo vaerä.

⁷ Oime ara, mbae yamondoro vaerä, oime vi ara, mbae yambovɨvɨ vaerä. Oime ara, ñanekïrii vaerä, oime vi ara, ñanemiari vaerä.

⁸ Oime ara, yaporoaɨu vaerä, oime vi ara, ñaporomotareɨ vaerä. Oime ñeraro iara, jare oime vi mbɨakatu iara.

⁹ ¿Mbae pa oväe jókuae oparavɨkɨ vae, jókuae oyemoambeko mbatee jese vae güi?

¹⁰ Che aecha mbaravɨkɨ Tumpa omee kuimbae reta pe vae, oyemokangɨi pɨpe vaerä.

¹¹ Jae ipöra oyapo opaete iara pe kavi; oñono vi kuimbae reta ipɨa pe oiko avei ko vae, yepe tëi mbaetɨ opaete oikuaa reta Tumpa oyapo iyɨpɨ güive vae, jare oyapota vae.

¹² Che aikuaa kuimbae pe jaekavi vae, jae ko oyerovia jare oiko kavi vaerä,

¹³ echa Tumpa ko omee yandeve yakaru kavi vaerä, jare yayekou vaerä opaete yandeparavɨkɨagüe re.

¹⁴ Aikuaa vi opaete Tumpa oyapo vae oiko aveita ko. Jókuae ngaraa etei oñemoïru, ani oñepɨ̈ro chugüi, echa Tumpa ko oyapo jökorai; opaete vae güɨnoi vaerä mboromboete ikotɨño.

¹⁵ Mbaetɨta mbae ipɨau vae oyekuaa, oimeño mai vae güi, mbaetɨta mbae ipɨau vae oyeapo, oyeapo ma vae güi. Tumpa ko omboaɨkuere ye jókuae oasagüe.

Jupimbae yae yandeve vae

¹⁶ Aecha vi kuae ɨvɨ pe: Añete vae jekovia pe, teko kavimbae, jupi vae jekovia pe, jupimbae.

¹⁷ Jare jae cheyeupe: “Tumpa ojäata jupi vae jare jupimbae reta, echa oime ara, opaete mbaembae peguarä jare oyeapo vaerä.”

¹⁸ Jae ye vi cheyeupe: “Tumpa oechauka güɨnoi kuimbae reta pe, oikuaa reta vaerä vi, jae reta mɨmba reta ramiño ko vae.”

¹⁹ Echa añetete kuimbae reta jare mɨmba reta oyovakeño ko; kuimbae reta omano jare mɨmba reta omano vi; oyovakeño ko oikove opaete vae; kuimbae mbaetɨ puku jekove mɨmba reta güi; opaete kuae mbaeä etei ko.

²⁰ Opaete vae meteia kotɨño yogüɨraja; ɨvɨkúi güi oyeapo opaete vae, jare ɨvɨkuirä opaete vae ojo yeta.

²¹ ¿Kia pa oikuaa kuimbae reta jekove ojota ko ɨvate vae, jare mɨmba reta jekove ojota ko ɨvɨgüɨ kotɨ vae?

²² Jökorai, aikuaa kuimbae pe jaekavi yae vae, jae ko oyerovia vaerä iparavɨkɨagüe re, echa jae ko jókuae iparavɨkɨagüe jekovia; echa omano güire mbaetɨ yeta kia güeru oecha vaerä mbae ra ko oasata jaɨkue rupi vae.