ECLESIASTÉS 11 - Biblia Guarani Tumpa Iñee

¹ Ndepɨa kavi ïru vae pe, jare metei ara jekovia yeta ndeve.

² Renoigüe emboyao ïru vae pe, oime renoi rupi, echa mbaetɨ reikuaa ikavimbae outa kuae tëtaguasu re vae.

³ Amapɨtu jeta güɨnoi ɨ yave, okɨta ko ɨvɨ re. Ɨvɨra oa yave arayevɨ kotɨ ani ɨvɨtuguasu kotɨ, jókuae oaa pe ko opɨtata.

⁴ Ɨvɨtu oyepeyu vae re omae vae, mbaetɨ omaetɨ; jare amapɨtu re omae vae, mbaetɨ ombaarɨvo.

⁵ Mbaetɨ reikuaa kerupi ko ojo ɨvɨtu, ani mbaetɨ vi reikuaa michia kërai ko okuakuaa ichɨ jɨe pe vae; jökorai ko mbaetɨ etei reikuaa Tumpa jembiapo reta regua, jókuae opaete mbaembae iyapoa.

⁶ Remaetɨ ndeimbove yave jare kaaru yave, ërei mbaetɨ reikuaa kia nunga ko ikavita vae, tenonde oñeotɨ vae ra ani taɨkue oñeotɨ vae ra, ani ramo mókoi reve ra yagüɨye kavita.

⁷ Tembipe re ñamae vae ikavi yae ko, jare ikavi yae vi ñamae kuaraɨ re vae;

⁸ ërei yepe tëi amogüe oikopuku, oyerovia avei opaete ara oiko ramboeve; ërei eikuaa voi eï, pɨtumimbi ko ɨma yae eteta, jare opaete mbaembae oikota vae mbaeä etei ko.

Yemboarakuaa taɨrusu reta peguarä

⁹ Nde taɨrusu vae, eyerovia ndetaɨrusu ramboeve, eyapo ndepɨa jemimbota, eyapo nderesa pe ipöra vae, ërei nemaendúa, opaete kuaekuae re Tumpa nejäata.

¹⁰ Embosɨrɨ ndeyeugüi arasɨ, jare embosɨrɨ ndeyeugüi ikavimbae, echa mbaeä etei ko taɨrusu vae reta iara.