ECLESIASTÉS 10 - Biblia Guarani Tumpa Iñee

¹ Mberu omanogüe omoine mbae ikäti kavi yae vae. Jökorai ko, mbae michi vae rupi oñererokomegua iyarakuaa vae jare imboetea yae vae.

² Yarakuaa vae iyemongeta, ikavi vae reño, ërei yarakuaambae iyemongeta, ikavimbae kotɨño.

³ Yarakuaambae, opaete mbaembae oyapo vae rupi ave oata chupe arakuaa. Jare opaete vae pe oechauka iyarakuaambae ko vae.

⁴ Mburuvicha iyarasɨ ndeve yave, agüɨye emboasɨ, echa mbɨaguasu rupi ko oñemoroɨ̈sa arasɨ.

⁵ Oime aecha ikavimbae kuae ɨvɨ pe oyeapo vae, jókuae ikavimbae mburuvicha reta güi etei oë, jae ko:

⁶ Oñono reta mburuvicharä yarakuaambae; ërei yarakuaa vae reta mbaetɨ mbaererorä yogüɨreko.

⁷ Aecha tembiokuai reta oguata kavayu re, jare mburuvicha reta ipɨ re, tembiokuai reta rami.

⁸ Ɨvɨkua oyoo vae, jae yeño ko oata pɨpe. Tëta ikësea oyoka vae, oichuuta mboi.

⁹ Ita oñopa vae, oyembopereta ko pɨpe. Yepea oyoka vae, ipuere ko oyeasɨa.

¹⁰ Yɨɨ jaimbepa yave, jare mbaetɨ yambojaimbe ye yave, tätata ma yakua ɨvɨra re. Ikavi yae ko mbaembae yayapo arakuaa reve kavi.

¹¹ Mboi imombɨraea oyesuuka yave ndei omombɨrae mbove, osiriveä ko opɨrae vae.

¹² Yarakuaa vae iñee reta rupi oyemboeteuka, ërei yarakuaambae, iñee rupi aeño oyemboai;

¹³ omboɨpɨ imiari rupive jei opaño ñee osirivembae, jare güɨraja omboapɨ ñee ikavimbae yae pe.

¹⁴ ¡Yarakuaambae jekuaekuae oväe mbae jei vaerä! ¿Kia pa oikuaaukata chupe mbae ra ko oasata kuri vae? Echa ko mbaetɨ etei kia ave oikuaa mbae ra ko oasata kuri vae.

¹⁵ Yarakuaambae oyemokangɨ yae mbaravɨkɨ pe, mbaetɨ oikuaa tëta guasu kotɨ tape ojo vae ave.

¹⁶ ¡Paravete tëtaguasu, juvicha guasu taɨrusu yae vae, jare juvicha reta iarete reteiño vae!

¹⁷ ¡Oyerovia ko tëtaguasu, juvicha guasu imboetea yae vae, jare mburuvicha reta okaru iora pe kavi, jete pɨ̈rata reta vaerä vae, mbaetɨ okau reteiño vaerä!

¹⁸ Ipokosembae re oa jo jovapɨa, iyakɨ vae güi opaetei jo osururu.

¹⁹ Yavɨakatu vaerä ko oyeapo arete, vino yau, yayerovia vaerä, ërei ñanoita korepoti jókuae reta peguarä.

²⁰ Ndepɨa pe ave agüɨye mbae ere mburuvicha guasu kotɨ. Agüɨye mbae ere oikokatu vae kotɨ, nde aeño reï ndero pe yave ave, echa güɨra reta ipuere ko yogüɨraja omombeu chupe.