DEUTERONOMIO 9 - Biblia Guarani Tumpa Iñee

Tumpa omboaita tëta guasu reta Canaán pegua

¹ Peyeapɨsaka, Israel iñemuña reta: Añave oväe ma peasa vaerä Jordán, peike vaerä pepɨ̈ro tëta guasu reta jeta yae pegüi vae, jare imbaepuere yae pegüi vae; tëtaguasu reta tuichagüe, jare ikësea ɨvate yae vae;

² kuimbae jëiagüe jare pukugüe, Anac iñemuña reta ko, pe peikuaa jesegua reta vae, jare peendu jei: ‘¿Kia pa ipɨ̈ratata oyemboɨ Anac taɨ reta jóvai?’

³ Añave peikuaata yandeYa Tumpa ko ojo perenonde vae, jae ko tata opaetei oapɨ mbae oeya vae rami, jae ko omboaita jare omoamɨrita peróvai. Pe pemoëta pemombo jare pemboaita ɨmambae pegua, yandeYa güɨrökuavee peve rami.

⁴ Jare yandeYa Tumpa opa ma omoë omombo peróvai güi yave, agüɨye peyemongeta pepɨa pe körai: Jupi vae yayapo ramo ko yandeYa yandereru yaiko vaerä kuae ɨvɨ pe; yandeYa ko opa omoë omombo kuae tëtaguasu reta peróvai güi imbaeyoa jeko pegua.

⁵ Mbaetɨ ko pe jupi yae ani pepɨa isɨmbi yae ramo peiketa pepɨ̈ro ɨvɨ pembaerä, jókuae ɨvɨ pegua reta jeko kavimbae vae jeko pegua ko yandeYa Tumpa omoë omombo peróvai güi, omoañete vaerä yandeYa iñee jei jee re ae peñemuñagüe Abraham, Isaac jare Jacob pe vae.

⁶ Jáeramo, ikavi ko peikuaa mbaetɨ ko pereko kavi rupi yandeYa Tumpa omee peve pepɨ̈ro vaerä ɨvɨ kavi vae, echa pe reta ko ipɨa täta yae vae.

Israel iñemuña reta oyembopɨapochɨ ɨvɨtɨ Horeb pe

⁷ Agüɨye peakañɨ pemboarasɨuka yandeYa Tumpa ñuu pe vae güi. Pepɨapochɨ ko yandeYa kotɨ ɨvɨ Egipto güi peë güive kuae pe peväe regua.

⁸ Ɨvɨtɨ Horeb pe pemboarasɨuka yandeYa Tumpa peyeupe, jare iyarasɨ pekotɨ pemboai vaerä.

⁹ Che ayeupi yave amboresive vaerä ita ipe vae, oyekuatía jese morogüɨrökuavee päve yandeYa oyapo pe ndive vae, jayave ɨvɨtɨ pe aiko cuarenta ara jare cuarenta pɨ̈tu, akarumbae jare aɨumbae.

¹⁰ Jayave yandeYa omee cheve mókoi ita ipe vae, oyekuatía Tumpa ipoäka pe vae, jese oyekuatía opaete ñee yandeYa omombeu ɨvɨtɨ re, tata jendɨ vae mbɨte güi vae, jókuae ara opaete vae yandeatɨ yave.

¹¹ Jare oasa yave cuarenta ara jare cuarenta pɨ̈tu, yandeYa omee cheve mókoi ita ipe vae, morogüɨrökuavee päve pegua,

¹² jare jei cheve: ‘Epüa, egüeyɨ jarembae kuae güi, echa tëta renoe Egipto güi vae jopa. Jarembae yae opa opia reta che ayókuai vae güi, oyapo reta iyeupe metei mbae iä jiero oyemondɨkui vae pegua.’

¹³ YandeYa jei cheve: ‘Aecha ma kuae tëta, ipɨa täta yae.

¹⁴ Emaeño cheré opa tamboai, jare jee toyemboai ɨvɨ güi; ërei ndegüi ayapota metei tëtaguasu tuicha yae chugüi reta vae jare imbaepuere yae vae.’

¹⁵ Agüeyɨ ɨvɨtɨ jókuae jendɨ vae güi yave, aru chepo pe mókoi ita ipe vae morogüɨrökuavee päve pegua.

¹⁶ Jare amae yave pekotɨ aecha peyoa yepe yandeYa Tumpa kotɨ, peyapo peyeupe toro taɨrusu vae iä jiero oyemondɨkui vae pegua, pepia aramoete yandeYa peokuai tëi vae güi,

¹⁷ jayave amombo mókoi reve chepo pe aru ita ipe vae, jare ayoka perovake.

¹⁸ Javoi ayetavatɨka yandeYa jóvai tenonde yave rami, cuarenta ara jare cuarenta pɨ̈tu akarumbae jare aɨumbae, pe reta peyoa pemboarasɨuka yandeYa jeko pegua.

¹⁹ Echa che akɨɨye yandeYa iyarasɨ yae pekotɨ pemboai vaerä vae güi; ërei yandeYa oendu ye cheve.

²⁰ Aarón kotɨ yandeYa iyarasɨ yae vi, oipota omboai, jayave che ayerure vi Aarón re;

²¹ jare aipɨɨ toro taɨrusu iä peyapo peyoa vaerä jese vae, jare aapɨ tata pe, ayoso ikuiasɨ regua, javoi amombo jókuae ikuigüe, ɨ osɨrɨ ɨvɨtɨ kotɨ güi ou vae pe.

²² Jökoraiño vi Tabera pe, Masah pe jare Kibrot-hataava pe, pemboarasɨuka yandeYa.

²³ Jare yandeYa peokuai yave Cades-barnea güi peo vaerä pepɨ̈ro ɨvɨ jae omee peve vae, mbaetɨ peipota peyapo yandeYa Tumpa peokuai vae, mbaetɨ perovia jese jare mbaetɨ peipota peyapo jeigüe.

²⁴ ¡Che amboɨpɨ pokuaa güive pepɨapochɨ reteiño yandeYa kotɨ!

²⁵ Ayetavatɨka yandeYa jóvai cuarenta ara jare cuarenta pɨ̈tu, echa yandeYa jei ko opa vaerä pemokañɨtei,

²⁶ jare ayerure yandeYa pe, jae reve: ‘CheYa Tumpa, agüɨye emboai ndembae vae reta, nde reepɨ ndembaepuere tuicha yae vae rupi, Egipto güi renoe ndembaepuere yae pe.

²⁷ Nemaendúa nderembiokuai Abraham, Isaac jare Jacob re, agüɨye emae kuae tëta ipɨa täta vae re, ani iTumpa potambae re, ani iyoa re,

²⁸ agüɨye vaerä jei ɨvɨ orerenoe chugüi vae pegua reta: Tumpa mbaetɨ ipuere güɨroike reta ɨvɨ güɨrökuavee chupea pe, ani ipuere jei reta: Echa omotareɨ reta ramo güɨnoe güɨraja opa oyuka ñuu pe.

²⁹ Ndembae reta ko kuae tëta, nde ko renoe Egipto güi ndembaepuere tuicha yae vae rupi, jare reyapo etei vae rupi.’