DEUTERONOMIO 8 - Biblia Guarani Tumpa Iñee

Ɨvɨ kavi güɨnoi retata vae

¹ Peyeandu, pemomoe avei opaete mborookuai reta che poyókuai peyapo vaerä vae, peikove vaerä, peñemuña vaerä, jare peike vaerä pepɨ̈ro peyeupe jókuae ɨvɨ yandeYa güɨrökuavee peñemuñagüe reta pe vae.

² Pemaendúa opaete tape yandeYa Tumpa pereru jupi vae re, kuae cuarenta año ñuu rupi vae, pemoñemomichi vaerä jare pejäa vaerä, oikuaa vaerä pepɨa pe penoi vae, peyapota ra iporookuai reta ani mbaetɨta ra vae.

³ Jare oiporarauka peve, jare pemboyɨmbɨaɨuka, ërei pemongaru maná pe, tembíu mbaetɨ peikuaa vae, jare peñemuñagüe reta ave mbaetɨ oikuaa vae, jökorai oikuaauka vaerä peve, kërai mbɨyape reñoä ko kuimbae oikoveta, jaeño opaete yandeYa jei vae re ko kuimbae güɨnoita tekove.

⁴ Peremimonde mbaetɨ indechi perete re, pepɨ ave mbaetɨ iruru kuae cuarenta año reta rupi.

⁵ Jaeramiño vi pereko avei pepɨa pe, kërai kuimbae oinupa taɨ ombosɨmbi vae rami, jökorai ko yandeYa Tumpa penupa vi pembosɨmbi.

⁶ Jayave peñovatu yandeYa Tumpa iporookuai reta, peguata jupi, jare peipoɨu avei chugüi.

⁷ Echa yandeYa Tumpa pereraja ɨvɨ kavi pe, ɨvɨ ɨesaɨ pegua, ɨ oguata vae jare ɨ oë ɨvɨtɨ güi jare ɨvɨpe kavi güi vae pe:

⁸ Ɨvɨ kavi trigo peguarä, cebada peguarä, uva peguarä, granada peguarä, olivo peguarä jare ei;

⁹ jókuae ɨvɨ pe, mbaetɨta tembíu oata peve vae pe, ngaraa etei oata mbae peve joko pe, ɨvɨ güɨnoi ita reta jierorä vae, jare ɨvɨtɨ güi peekɨta cobre.

¹⁰ Pekaruta jare perɨ̈vɨatata, jare pemboeteta yandeYa Tumpa ɨvɨ kavi omee peve vae re.

Yemboarakuaa agüɨye vaerä oime ñemoakañɨ Tumpa güi

¹¹ Peyeandu agüɨye vaerä peakañɨ yandeYa Tumpa güi, agüɨye peakañɨ peyapo iporookuai reta che poyókuai añave jese vae.

¹² Agüɨye pekaru jare perɨ̈vɨata yave, jare pemopüa perorä ikavigüe yave,

¹³ jare oñemuña jeta guaka jare vecha reta yave, jökoraiño vi korepoti jare oro, jare peñemuña jeta yave, jare opaete mbae penoigüe okuakuaa yave,

¹⁴ javoi, peyembopɨatuicha jare peakañɨ yandeYa Tumpa güi, jae ko perenoe ɨvɨ Egipto güi, yeokuaiasɨ katu güi;

¹⁵ pereroata ñuu tuichagüe rupi, kɨɨyea jare jeta mboi imbayachi vae rupi, tumɨkarape jare ɨuve rupi, ɨ mbaetɨa pe jae omoë peve ɨ̈vavira güi;

¹⁶ pemongaru ñuu rupi maná pe, tembíu peñemuñagüe reta mbaetɨ oikuaa vae pe, pemoñemomichi jare pejäa, jökorai peapo kavi peiko kavi vaerä.

¹⁷ Agüɨye pere pepɨa pe: ‘Opaete kuae mbaeyekou oreparavɨkɨ rupi ko rogüɨnoi.’

¹⁸ Jaeño pemaendúa yandeYa Tumpa re, echa jae ko omee peve mbaepuere penoi vaerä mbaeyekou, jökorai oyembopo vaerä morogüɨrökuavee päve oyapo jee re peñemuñagüe reta pe vae, añave rupi rami.

¹⁹ Ërei ngatu peakañɨ yave yandeYa Tumpa güi, peguata yave tumpa ambuae ndive, peyeokuai chupe jare petindɨ pemboete vaerä yave, tamombeu kavi voi peve, opata pemokañɨtei.

²⁰ Perovake yandeYa Tumpa opata omokañɨ tëtaguasu reta rami, pe opata pekañɨtei, mbaetɨ yave yandeYa Tumpa iñee jei vae peyapo.