DEUTERONOMIO 7 - Biblia Guarani Tumpa Iñee

Yeandu tumpa-raanga Canaán pegua imboete kotɨ

¹ YandeYa Tumpa pereroike yave ɨvɨ peiketa peñemoëta pɨpe vae pe, jare opa ma yave omoë omombo perenonde güi chiu tëtaguasu reta imbaepuere yae pegüi vae: Heteo reta, gergeseo reta, amorreo reta, cananeo reta, ferezeo reta, heveo reta jare jebuseo reta.

² YandeYa Tumpa omee pepo pe yave kuae tëta guasu reta, opa ma pemoamɨri yave, opaetei pemboai; agüɨye jae reta ndive peyapo ñemoïru, agüɨye peiparareko reta.

³ Agüɨye peñemoëtara jae reta ndive; agüɨye perayɨ pemee taɨ pe, agüɨye tayɨ peru peraɨ peguarä.

⁴ Echa ombojopata ko peraɨ reta yandeYa güi, jare oyeokuai retata tumpa ambuae vae reta pe; jókuae jeko pegua yandeYa iyarasɨta pekotɨ, jare opata pemokañɨtei aramoete.

⁵ Peyapota chupe reta vae jae kuae: Mɨmba oyeyuka oyeapɨ jese vae jae reta imbae pemboai, jare peyoka mbae iä oyapogüe, jare Asera iä peyasɨa, jare peapɨ tata pe opaete mbae iä oyapogüe reta.

⁶ Echa pe reta ko jae tëta oñeñono tee yandeYa Tumpa peguarä vae; yandeYa Tumpa ko peparavo, peiko vaerä chupeguarä metei tëta ikavi yae vae, opaete ïru tëta reta kuae ɨvɨ pe ñogüɨnoi vae güi.

Israel iñemuña reta iyekou jare oyapo vaerä

⁷ Tëta tuichagüe yae peiko ïru tëta reta güi ramoä ko yandeYa pepota jare peparavo, pe reta ko tëta mbaeä etei yepi opaete ïru tëta reta güi vae.

⁸ YandeYa peraɨu ramo, jare oipota ombopo jókuae peñemuñagüe reta pe güɨrökuavee jee re vae jeko pegua perenoe Egipto güi imbaepuere pe, jare pereepɨ yeokuaiasɨ katu güi, Egipto pegua mburuvicha guasu Faraón ipo güi.

⁹ Peikuaa peyeupe yandeYa Tumpa, jae ko Tumpa; Tumpa jupi vae, ombopo morogüɨrökuavee päve jare mboroparareko opaete iporoaɨu ikotɨ vae reta pe jare oyapo iporookuai vae reta pe;

¹⁰ ërei jae etei omokañɨtei imotareɨa pe; oärombae reve oipararauka imotareɨa pe, jae etei ko omboepɨta chupe.

¹¹ Jáeramo, peyapo mborookuai reta che poyókuai peyapo vaerä vae.

Mborookuai oyeapo avei vae jekovia

¹² Peendu yave kuae mborookuai reta, peñovatu jare peyapo yave jei peve rami, yandeYa Tumpa omoañeteta peve jókuae morogüɨrökuavee päve jare mboroparareko güɨrökuavee jee re peñemuñagüe reta pe vae.

¹³ Jare peraɨuta, iporerekuata peré, jare pemoñemuñata jeta, iporerekuata peñemuña reta re, pembaagüɨye reta re, petrigo re, peuva tɨgüegüe re, peolivo iasaite re, peguaka reta imembɨ re, jare pevecha reta re, jókuae ɨvɨ güɨrökuavee jee re peñemuñagüe reta pe vae, omeeta peve vae pe.

¹⁴ Peiko kavita opaete ïru tëta reta güi; ngaraa oime kuimbae taɨmbae vae, ani kuña imembɨmbae vae, jare perɨmba reta ipɨte pe ave mbaetɨta jókuae nunga.

¹⁵ YandeYa ombosɨrɨta pegüi opaete mbaerasɨ reta; jare opaete mbae ikavimbae yae vae reta; pe peikuaa Egipto pe vae ngaraa ombou peré, ërei oitɨta opaete pemotareɨ vae reta re.

¹⁶ Ërei pemboai opaete tëta guasu reta yandeYa Tumpa omee pepo pe vae; agüɨye peɨ̈ro chupe reta, agüɨye peyeokuai itumpa reta pe, echa pererokomeguata ko.

¹⁷ Ërei pere yave pepɨa pe: ‘Kuae tëtaguasu reta jeta yae ete ko yandegüi; ¿këraita pa yandepuere opa yamboai?’

¹⁸ ¡Agüɨye pekɨɨye chugüi reta! Pemaendúa kavi kërai yandeYa Tumpa oyapo Faraón jare opaete Egiptoɨgua reta pe vae.

¹⁹ Yemboaporova tuichagüe peecha vae, jare mɨakañɨ yavaetegüe, jare mbaepuere tuichagüe rupi yandeYa Tumpa oyapo perenoe vaerä vae re. Jökoraita yandeYa Tumpa oyapo opaete pekɨɨye chugüi vae.

²⁰ YandeYa Tumpa ombouta vi kɨɨye yavaetegüe jese reta, kävee güi okɨɨye vae rami, opa regua omano opɨtagüe jare oñemi pegüigüe reta.

²¹ Agüɨye peyembopɨtu jae reta jóvai, echa yandeYa Tumpa oï pepɨte pe, jae ko Tumpa tuichagüe jare kɨɨyea.

²² Jare yandeYa Tumpa mbegüe mbegüe pe omoëta omombo pepɨte güi kuae tëtaguasu reta, ngaraa opa voi pemokañɨ pepɨte güi, echa mɨmba pochɨ vae kaa rupigua oñemuñata jare oporepeñata peré.

²³ Ërei yandeYa Tumpa omeeta pepo pe kuae tëta guasu reta jare jae imbaepuere pe omokañɨteita, opa okañɨtei regua.

²⁴ Omeeta pepo pe mburuvicha guasu reta, jare pe reta pemboaita jee reta kuae ɨvɨ güi, ngaraa etei kia ipɨ̈rata peróvai opa regua pemboai.

²⁵ Omopöra kavi oyapo itumpa-raanga retarä vae peapɨ tata pe, agüɨye peipotarai korepoti ani oro peyeupeguarä, agüɨye vaerä peyemboavai jese, echa pɨ̈chɨi yae ko yandeYa Tumpa pe.

²⁶ Agüɨye peru mbae pɨ̈chɨi vae pero pe, agüɨye vaerä yepopeyu oï jese vae peru, opaetei mbae peroɨ̈ro jare pɨ̈chɨi pemae jese, echa yepopeyu pe ko oï.