DEUTERONOMIO 6 - Biblia Guarani Tumpa Iñee

Mborookuai tuichagüe

¹ Kuae ko jae mborookuai reta yandeYa Tumpa cheokuai pomboe vaerä vae, peyapo vaerä jókuae ɨvɨ pepɨ̈rota peñemoëta pɨpe vae pe.

² Peipoɨu vaerä yandeYa Tumpa güi, peiko vaerä opaete iporookuai reta che poyókuai jese vae rupi; pe, peraɨ, perɨmɨmino, opaete ara peiko rambueve peiko puku vaerä.

³ Pe, Israel iñemuña reta, peendu peyeupe, peyeandu avei agüɨye vaerä peakañɨ peyapo, peiko kavi vaerä jókuae ɨvɨ kavi pe, peñemuña vaerä jeta, yandeYa, peñemuñagüe reta iTumpa güɨrökuavee peve rami.

⁴ Peendu Israel iñemuña reta: YandeYa Tumpa, meteiño ko.

⁵ Peaɨu peYa Tumpa opaete pepɨa ndive, opaete perekove ndive, jare opaete pepɨ̈rata ndive.

⁶ Kuae ñee reta che poyókuai añave vae, toï pepɨa pe;

⁷ jare pemboaɨkuere yeta pere peraɨ reta pe, pemiarita jese peï pero pe yave, tape rupi peguata peiko yave, peyapakuata yave jare pepüa ye yave.

⁸ Jare ikañɨmaa vaerä peñapɨtita pepoapɨ re jare peresɨva re, pemomaendúa avei vaerä;

⁹ jare peikuatiata pero pe okɨta reta re, jare peröke re.

Yemboarakuaa reta mborookuai jei vae oyeapo avei vaerä

¹⁰ YandeYa Tumpa pereroike ma yave ɨvɨ güɨrökuavee peñemuñagüe Abraham, Isaac jare Jacob pe vae pe; omee vaerä peve tëta guasu tuichagüe jare ikavi yae vae, pe mbaetɨ peyapo vae;

¹¹ o tɨnɨe jeta mbaembae pe vae, pe mbaetɨ pemotɨnɨe vae, jare ɨrɨru oyeyoogüe, peyoombae vae, jare uvarupa jare ɨvɨra olivorupa pe peñotɨmbae vae, jare peu ma jare perɨ̈vɨata ma yave,

¹² peyeandu agüɨye vaerä peakañɨ yandeYa güi, perenoe ɨvɨ Egipto güi vae, yeokuaiasɨ katu güi.

¹³ YandeYa Tumpa güi peipoɨu, chupeño peyeokuai, jae jee reño opaete mbae peyapo.

¹⁴ Agüɨye pemboete tumpa ambuae vae reta, tëta reta peɨpɨ rupigua itumpa reta,

¹⁵ echa yandeYa Tumpa, jae ko Tumpa jägüɨro vae, oime oï pepɨte pe; ipuere iyarasɨ pekotɨ, jare pemboai ɨvɨ iárambo güi.

¹⁶ Agüɨye pejäa yandeYa Tumpa ipɨaguasu, ñuu Masah pe pejäa rami.

¹⁷ Peñovatu peyeandu reve kavi yandeYa Tumpa oyapogüe reta jare iporookuai reta peokuai jese vae.

¹⁸ Jare peyapo sɨmbi vae jare ikavi vae yandeYa jesa róvai, peiko kavi vaerä, jare peike penoi vaerä jókuae ɨvɨ kavi yandeYa güɨrökuavee jee re peñemuñagüe reta pe vae;

¹⁹ jae omoë vaerä omombo perovaicho reta perenonde güi, yandeYa jei rami.

²⁰ Metei ara peraɨ reta oparandu yave peve: ‘¿Mbae pa oipota jei oporomomaendúa vae jare opaete kuae mborookuai reta yandeYa Tumpa peokuai vae?’

²¹ Jayave pe pereta peraɨ reta pe: ‘Ore roikose Egipto pe Faraón jembiokuairä, jare yandeYa orerenoe Egipto güi imbaepuere pe.

²² YandeYa oyapo mɨakañɨ tuichagüe jare yavaetegüe Egipto pe, Faraón re jare jëta pegua reta re orerovake.

²³ Jare orerenoe joko güi, orereru omee oreve kuae ɨvɨ güɨrökuavee jae jee re ñaneñemuñagüe reta pe vae.

²⁴ Jare yandeYa oreokuai royapo vaerä opaete kuae mborookuai reta, roipoɨu vaerä yandeYa Tumpa güi, roiko kavi vaerä opaete ara rupi jare oreövatu vaerä añave rami.

²⁵ Royapo yave opaete yandeYa Tumpa oreokuai vae jae omae kavita oreré.’