DEUTERONOMIO 5 - Biblia Guarani Tumpa Iñee

Payandepo mborookuai reta

¹ Moisés omboatɨ opaete Israel iñemuña reta jare jei chupe reta: “Peyeapɨsaka Israel iñemuña reta, kuae mborookuai reta amombeuta añave vae re, peikuaa jare peñovatu peyapo vaerä.

² YandeYa Tumpa oyapo yande ndive morogüɨrökuavee päve ɨvɨtɨ Horeb pe.

³ Mbaetɨ ñaneñemuñagüe reta ndiveño oyapo kuae morogüɨrökuavee päve, oyapo vi añave kuae pe yaikoveño ñaï vae ndive.

⁴ YandeYa imiari pe ndive oyoova pe, tata jendɨ vae mbɨte güi.

⁵ Jayave che aï yandeYa jare pe reta pepäu pe, amombeu vaerä yandeYa iñee reta, echa pe reta pekɨɨye tata güi, jare mbaetɨ peyeupi ɨvɨtɨ re. Jayave yandeYa jei:

⁶ ‘Che ko jae peYa Tumpa perenoe ɨvɨ Egipto güi vae, yeokuai renda güi.

⁷ Agüɨye pereko ïru tumpa reta chegüi.

⁸ Agüɨye peyapo peyeupe mbae iä, mbae iägüe ɨvate ara pe oï vae, ani ɨvɨ pe oï vae ave, ani ɨ pe ɨvɨgüɨ pe oï vae ave.

⁹ Agüɨye peyetavatɨka jóvai, agüɨye vi pemboete, echa che ko jae peYa Tumpa jägüɨro vae, aiporarauka peñemuñagüe reta pe iyoa re vae, taɨ reta, jɨmɨmino reta pe jare taɨ jɨmɨmino reta pe, chemotareɨ vae reta pe,

¹⁰ cheporoparareko opaete cheraɨu jare oyapo katu cheporookuai reta vae re.

¹¹ Agüɨye peenɨi raangaiño peYa Tumpa jee, echa ngaraa oeya jekombae rami jee oenɨi raangaiño vae.

¹² Pemaendúa ara mbutuu pegua re, peñono tee vaerä, peYa Tumpa peokuai rami.

¹³ Ova ara peparavɨkɨ, peyapo opaete peparavɨkɨ.

¹⁴ Ërei chiúa ara, ara mbutuu pegua ko peYa Tumpa pe, agüɨye mbae nunga mbaravɨkɨ ave peyapo jókuae ara, jare peraɨ, perembiokuai kuimbae jare perembiokuai kuña, pegüeye, ani pemburika metei ave perɨmba agüɨye toparavɨkɨ, ketɨgua pero pe oiko vae, oputuu vaerä perembiokuai kuimbae jare perembiokuai kuña pe peputuu rami.

¹⁵ Pemaendúa peikose tembiokuai ɨvɨ Egipto pe vae re, jare peYa Tumpa perenoe joko güi imbaepuere pe, jáeramo peYa Tumpa peokuai peñovatu vaerä ara mbutuu pegua.

¹⁶ Pemboete peru jare pesɨ, peYa Tumpa peokuai rami, peiko puku vaerä jare peiko kavi vaerä ɨvɨ iárambo peYa Tumpa omee pevea pe.

¹⁷ Agüɨye peporoyuka.

¹⁸ Agüɨye peyuvanga menda re.

¹⁹ Agüɨye pemaeñomi.

²⁰ Agüɨye pemiari peapu reve perapicha kotɨ.

²¹ Agüɨye peipotarai perapicha jembireko, jo ave agüɨye peipota, iɨvɨ jare jembiokuai kuimbae ani jembiokuai kuña, igüeye ani imburika ani oipotagüe mbae perapicha imbae.’

Israel iñemuña reta ikɨɨye

²² Kuae ñee reta yandeYa jei iñeeäta reve tata mbɨte güi amapɨtu pɨtumimbía güi, Israel iñemuña reta pe ɨvɨtɨ igüɨ pe, jare mbaetɨ ye mbae jei. Oikuatía mókoi ita ipe vae re, omee cheve.

²³ Ërei peendu yave jókuae ñee oë pɨtumimbía güi, jare peecha ɨvɨtɨ jendɨ yave opaete mburuvicha reta ñemuña ñavo güi jare petenondegua reta yogüeru imiari che ndive,

²⁴ jare jei reta cheve: ‘Añave yandeYa Tumpa oechauka oreve iyemboetea jare imbaepuere tuicha yae vae, jare roendu iñee tata jendɨ vae güi. Kuae ara roecha yandeYa imiari kuimbae pe, jare oikoveño.

²⁵ Añave, ¿maera pa romanota? Echa kuae tata yavaete yae vae oreyukata, yandeYa Tumpa iñee roendu ye yave opata romano;

²⁶ echa, ¿mbae pa kuimbae oendu etei vaerä Tumpa oikove vae iñee tata jendɨ vae güi, ore roendu rami jare roikoveño?

²⁷ Nde eya jese, jare eendu opaete ñee yandeYa Tumpa jei vae, javoi emombeu oreve opaete yandeYa Tumpa jei ndeve vae, jare ore toroendu jare toroyapo.’

²⁸ Pemiari cheve ramboeve yandeYa oendu peñee reta pere cheve vae, jare jei cheve: ‘Aendu opaete vae iñee reta jei ndeve vae, jaekavi ko opaete jei reta ndeve vae.

²⁹ ¡Jökorai avei mona ipɨa reta, oipoɨu jare oñovatu opaete cheporookuai, jae reta jare taɨ reta yogüɨreko kavi vaerä jekuae avei pegua!

³⁰ Ekua jare ere chupe reta yogüɨraja ye vaerä jo guakapi pegua ñavo rupi;

³¹ jare nde epɨta kuae pe che ndive jare jaeta ndeve opaete mborookuai reta oyeapota vae remboe reta vaerä oyapo jókuae ɨvɨ che ameeta chupe reta imbaerä vae pe.’

³² Jayave, peyapo yandeYa Tumpa peokuai rami, agüɨye pepia chugüi kërai ave yepe.

³³ Peguata yandeYa Tumpa peokuai vae rupi, peo kavi vaerä jare peiko kavi vaerä, jökorai peiko puku vaerä ɨvɨ peota peiko pɨpe vae pe.