DEUTERONOMIO 4 - Biblia Guarani Tumpa Iñee

Moisés omboarakuaa Israel iñemuña reta oyapo avei vaerä mborookuai

¹ Añave, pe Israel iñemuña reta, peendu mborookuai reta oyeapo vae re pomboe vae, peikove vaerä jare peike vaerä peiko, jókuae ɨvɨ peñemuñagüe reta iTumpa omee pevea pe.

² Agüɨye pemoïru ñee, che poyókuai jese vae, agüɨye vi peekɨ chugüi, peyapo yandeYa Tumpa iporookuai reta, che poyókuai jese vae.

³ Pe reta etei ko peecha yandeYa oyapogüe Baal-peor pe, jare peecha opaete omboete joko pe tumpa-raanga vae, yandeYa opa omboai pepɨte güi.

⁴ Ërei opaete pe reta yandeYa Tumpa reño perovia vae, peikove päveño añave.

⁵ Mase, che ko pomboe mborookuai reta oyeapogüe re, cheYa Tumpa cheokuai rami, peyapo vaerä jókuae ɨvɨ peota pepɨ̈ro pembaerä vae pe.

⁶ Peñovatu jare peyapo mborookuai jei rami, echa jayave pearakuaa katuta jare pereechata opaete tëta reta, jare oendu reta yave mborookuai, jei retata: ‘¡Añetete kuae tëtaguasu yarakuaa katu, jare oikuaa katu yae!’

⁷ Echa ¿kia nunga tëtaguasu pa oime köi yae itumpa-raanga oï chugüi vae, yande yandeYa Tumpa yayerure avei chupe vae köi oï yandegüi rami?

⁸ Jare ¿kia nunga tëtaguasu pa güɨnoi mborookuai jare morojäa jupi vae, opaete kuae mborookuai añave añono peve rami vae?

⁹ Jáeramo, peyeandu jare perekove peroyeandu agüɨye vaerä peakañɨ opaete mbaembae pe etei peecha vae güi, agüɨye pepɨa güi tokañɨ opaete perekove rupi; pemboe avei peraɨ reta jare perɨmɨmino reta.

Tumpa imiari ɨvɨtɨ Horeb re Israel iñemuña reta pe

¹⁰ Jókuae ara peï yave ɨvɨtɨ Horeb pe yandeYa Tumpa jóvai, yandeYa jei cheve: ‘Emboatɨ cheve opaete vae, aenduka vaerä cheñee chupe reta, kuae rupi oikuaa reta vaerä oipoɨu avei chegüi opaete ara oikove yogüɨreko ramboeve ɨvɨ pe, jare omboe reta vaerä taɨ reta oyapo vi jökorai.’

¹¹ Peyemboatɨ ɨvɨtɨ igüɨ pe; jare jókuae ɨvɨtɨ jendɨ opüa ɨvate yeyé, oyeapo amapɨtu jare pɨtumimbi yae.

¹² Jare yandeYa imiari peve jókuae tata mbɨte güi. Jare pe reta peendu iñee, ërei, peendu iñee reve mbaetɨ etei iä peecha.

¹³ Jare jae oikuaauka peve iporogüɨrökuavee päve jae ko payandepo mborookuai reta vae jare peokuai peyapo vaerä; jare oikuatía mókoi ita ipe vae re.

¹⁴ Che vi cheokuai yandeYa pomboe vaerä mborookuai reta re, peyapo vaerä jókuae mborookuai jeigüe, ɨvɨ peota pepɨ̈ro pembaerä vae pe.

Yeandu tumpa-raanga imboete kotɨ

¹⁵ Jókuae ara yandeYa imiari pe ndive ɨvɨtɨ Horeb pe tata mbɨte güi yave, mbaetɨ etei mbae iä peecha, peroyeandu perekove,

¹⁶ agüɨye vaerä peñererokomegua agüɨye peyapo mbae iä peyeupe; kuimbae iä ani kuña iä,

¹⁷ ani mɨmba iä ɨvɨ rupigua ani güɨra iä,

¹⁸ ani mɨmba ipɨtía re oguata vae, ani jevae ɨ rupigua iä.

¹⁹ Ani pemae yave ara kotɨ jare peecha kuaraɨ, yasɨ jare yasɨtata, jare opaete ara ipo reta jare petindɨ pemboete ani peyeokuai chupe; echa yandeYa Tumpa ko oyapo kuae mbaembae, opaete vae reta peguarä.

²⁰ Ërei ngatu yandeYa perenoe jókuae horno omondɨkui jiero vae güi, jae ko Egipto, peapo vaerä jae imbaerä, añave rami.

²¹ Jare yandeYa iyarasɨ cheve pereko pegua, jare jei jee re, che mbaetɨta aasa ɨ̈aka Jordán, jare ɨvɨ kavi pe ave mbaetɨta aike, yandeYa Tumpa omee ɨvɨ pembaerä vae pe.

²² Jayave che amanota kuae ɨvɨ pe, mbaetɨta aasa ɨ̈aka Jordán; ërei pe reta peasata, jare jókuae ɨvɨ kavi pepɨ̈rota pembaerä.

²³ Peyeandu agüɨye vaerä peakañɨ yandeYa Tumpa morogüɨrökuavee päve oyapo pe ndive vae güi, agüɨye peyapo peyeupe oipotagüe mbae iä yandeYa Tumpa oyopia pegüi vae.

²⁴ Echa yandeYa Tumpa ko, Tumpa jägüɨro vae, ¡tata oporomboai vae rami ko!

²⁵ Oime ma peraɨ jare perɨmɨmino yave, jare pendechi ma jókuae ɨvɨ pe yave, peyapo yave oipotagüe mbae iä, peyapo ikavimbae yandeYa Tumpa jóvai pemboarasɨuka vaerä yave,

²⁶ ara jare ɨvɨ jovake tae peve, jarembae pekañɨta ɨvɨ peasata pepɨ̈ro pembaerä vae güi. Mbaetɨta ɨma peiko jókuae ɨvɨ pe, jarembaeño peyemboaiukata.

²⁷ YandeYa opata pemoai moai tëtaguasu reta rupi, mbovɨ yae peyekuaata jókuae yandeYa pererajata vae ipɨte pe.

²⁸ Joko pe kuimbae reta ipo pe oyapo tumpa reta vae pe peyeokuaita, ɨvɨra pegua jare ita pegua pe, mbaetɨ omae jare mbaetɨ vi oendu, mbaetɨ okaru jare mbaetɨ ipɨ̈túe vae pe.

²⁹ Ërei ngatu joko güi peeka yave yandeYa Tumpa opaete pepɨa ndive jare opaete perekove ndive, peväeta.

³⁰ Peï yave mbɨatɨtɨ pe, perupitɨ yave opaete kuae mbaembae, jare taɨkue rupi peyerova ye yave yandeYa Tumpa kotɨ, jare peendu yave iñee jeigüe;

³¹ echa oporoparareko vae ko yandeYa Tumpa; ngaraa pereeya jare ngaraa pemboai, ngaraa vi ñakañɨ morogüɨrökuavee päve peñemuñagüe reta pe oyapo jee re vae güi.

³² Peparandu añave, oime ra pegüi reta tenonde rupi, Tumpa oyapo ramo ɨvɨ güive jembeɨ güi ïru jembeɨ kotɨ oyeapo ma kuae nunga ani jërakua kuae oyeapo peve rami etei vae.

³³ ¿Oime pa amogüe tëta oendu Tumpa iñee tata mbɨte güi pe reta peendu rami jare oikoveño oï vae?

³⁴ ¿Ani oime pa mbae nunga tumpa ou oiparavo tëtaguasu imbaerä ïru tëtaguasu güi vae, yemboaporova ndive, mɨakañɨ ndive, ñeraro ndive, imbaepuere yae jare ipo oporoiämondo yae reve, opaete oyapo perovake yandeYa Tumpa Egipto pe rami?

³⁵ Oyekuaa peve peikuaa vaerä yandeYa jae ko Tumpa, mbaetɨ yé ïru chugüi.

³⁶ Ara güi oenduka iñee peve pemboe vaerä, jare ɨvɨ re oechauka peve tata yavaetegüe, jare peendu iñee tata mbɨte güi.

³⁷ Echa jae oaɨu yae peñemuñagüe reta jeko pegua perenoe Egipto güi jae etei imbaepuere tuichagüe ndive.

³⁸ Omoë omombo peróvai güi tëtaguasu reta tuichagüe, imbaepuere yae pegüi vae, pereroike vaerä pɨpe, omee vaerä peve ɨvɨ pembaerä, añave rami.

³⁹ Jáeramo pemaendúa katu, peñono pepɨa pe yandeYa jae ko Tumpa, ara pe jare ɨvɨ pe, mbaetɨ yé kia.

⁴⁰ Jare peñovatu iporomboe reta jare iporookuai reta poyókuai añave vae, peo kavi vaerä pe jare peraɨ reta jare peraɨkue rupigua reta, yandeYa Tumpa tombopuku peara reta jókuae ɨvɨ omee peve jekuae avei pegua vae pe.”

Tëta guasu reta ñepɨ̈roka Jordán güi kuaraɨ oëa kotɨgua

⁴¹ Jayave Moisés oiparavo mboapɨ tëta guasu reta Jordán güi kuaraɨ oëa kotɨ,

⁴² otekuarai vaerä jokotɨ oyemongetambae reve oporoyuka vae, japicha mbaetɨ omotareɨ reve oyuka yave, otekuarai vaerä ojo oñepɨ̈ro joko pe, oasayepe vaerä.

⁴³ Tëta guasu Beser, ñuu ipe kavía pegua, Rubén iñemuña reta peguarä; tëta guasu Ramot, Galaad pegua, Gad iñemuña reta peguarä, jare tëta guasu Golán, Basán pegua Manasés iñemuña reta oyemboyaogüe vae peguarä.

Moisés oporomboe pɨau ye payandepo mborookuai reta re

⁴⁴ Kuae jae mborookuai reta Moisés omee Israel iñemuña reta pe vae.

⁴⁵ Kuae ko jae opaete mborookuai reta, Moisés omombeu Israel iñemuña reta pe Egipto güi ñogüɨnoe yave,

⁴⁶ Jordán güi kuaraɨ oëa kotɨ ñogüɨnoi ñuu Bet-peor pe yave, Sehón iɨvɨ pe, Sehón ko jae amorreo reta juvicha guasu Hesbón pe oikose vae, jae ko Moisés jare Israel iñemuña reta omoamɨri Egipto güi ñogüɨnoe yave vae.

⁴⁷ Opɨ̈ro reta chugüi ɨvɨ jare yogüɨreko pɨpe, jökoraiño vi Og mburuvicha guasu, Basán pegua; kuae mókoi amorreo reta juvicha guasu Jordán güi kuaraɨ oëa kotɨgua reta güi opɨ̈ro reta.

⁴⁸ Aroer oï ɨ̈aka Arnón iyɨ́vɨri vae güive ojoi oväe ɨvɨtɨ Sión kotɨ, jae ko Hermón.

⁴⁹ Jare opaete Arabá Jordán güi kuaraɨ oëa kotɨ, Ɨguasu Jembochɨ vae kotɨ, ɨvɨtɨ Pisga igüɨ pe.