DEUTERONOMIO 34 - Biblia Guarani Tumpa Iñee

Moisés imano jare iñeotɨ

¹ Moisés oyeupi ñuu Moab güi, ɨvɨtɨ guasu Nebo jee vae kotɨ ɨvɨtɨ Pisga jee vae iyapɨte re, Jericó jóvai oï vae; jare yandeYa oechauka chupe opaete ɨvɨ Galaad güive Dan iɨvɨ kotɨ,

² opaete Neftalí, Efraín jare Manasés iɨvɨ, jare opaete Judá iɨvɨ güive Ɨguasu Mediterráneo kotɨ,

³ ɨvɨ Neguev, opaete ɨvɨ ipe kavi vae, Jericó iɨvɨ kavi, jae ko tëta guasu karandaɨ renda, joko güive Zoar kotɨ.

⁴ Jare jei chupe yandeYa: “Kuae ko jae ɨvɨ arökuavee cheree re Abraham, Isaac jare Jacob pe vae, jae chupe körai: ‘Neñemuña reta pe ameeta.’ Amaeño reecha etei vaerä nderesa pe, ërei ngaraa reasa jokotɨ.”

⁵ Jare jókuae ɨvɨ Moab pe omano Moisés yandeYa jembiokuai, yandeYa jei rami,

⁶ jare jae oñotɨ ɨvɨ Moab pe, ɨvɨtɨ päu ipe kavía pe, Bet-peor jóvai; jare jókuae güive mbaetɨ metei ave oikuaa kia pe ko oñeotɨ vae.

⁷ Moisés omano ciento veinte año güɨnoi yave; mbaetɨi jäve omae jare oikove katu avei.

⁸ Jare Israel iñemuña reta oäpiro Moisés, treinta ara ñuu Moab pe; jökorai omboapɨ reta yaeo jare mbɨatɨtɨ Moisés kotɨ.

⁹ Jare Josué, Nun taɨ ipɨa arakuaa yae opɨta, echa Moisés oñono ipo jese; jare Israel iñemuña reta güɨrovia katu jese, jare oyapo reta yandeYa oyókuai Moisés vae rami.

¹⁰ Jare mbaetɨ ye ma opüa ïru ñeemombeúa Israel pe Moisés rami vae, jae ndive yandeYa imiari oyoova pe etei vae,

¹¹ mbaetɨ ye kia jae rami oyapo opaete mɨakañɨ reta vae, yandeYa omondo oyapo vaerä ɨvɨ Egipto pe, Faraón pe vae, jare opaete jembiokuai reta pe, jare opaete iɨvɨ rupi,

¹² jare mbaepuere tuicha yae vae pe, jare opaete mɨakañɨ guasu yavaetegüe Moisés oyapo opaete Israel iñemuña reta jovake vae pe.