DEUTERONOMIO 31 - Biblia Guarani Tumpa Iñee

Josué opɨta Moisés jekovia pe

¹ Moisés ojo jare imiari opaete kuae ñee reta Israel iñemuña reta pe, jei:

² “Añave anoi ma ciento veinte año, mbaetɨ ma chepuere; jare yandeYa jei yoapɨ cheve: ‘Ngaraa reasa kuae Jordán.’

³ YandeYa Tumpa ojota perenonde; jae omboaita peve kuae tëtaguasu reta, jare peiketa peiko pɨpe; Josué ojota perenonde, yandeYa jei rami.

⁴ YandeYa oyapota kuae reta pe Sehón jare Og oyapo rami, kuae amorreo reta juvicha guasu reta opa iɨvɨ ndive omboai rami.

⁵ YandeYa omeeta pepo pe kuae tëta guasu reta, peyapo chupe reta opaete che poyókuai rami.

⁶ Peñemomɨ̈rata jare peñemoäta ngatu; agüɨye pekɨɨye; agüɨye pekɨɨye chugüi reta, echa yandeYa Tumpa ko oï pe ndive; ngaraa pereeya peangarekoambae.”

⁷ Javoi Moisés oenɨi Josué jare jei chupe opaete Israel iñemuña reta jovake: “Eñemomɨ̈rata jare eñemoäta ngatu; echa nde rerajata kuae tëta jókuae ɨvɨ yandeYa güɨrökuavee jee re omee vaerä peñemuñagüe reta pe vae pe, nde reroiketa remee chupe reta.

⁸ YandeYa ojota nderenonde; jae oïta nde ndive, ngaraa ndereeya, ngaraa ndereeya iyangarekoambae; agüɨye ekɨɨye jare agüɨye ndepɨa kɨɨye.”

Año ñɨ̈ro pegua pe oyemongeta mborookuai

⁹ Moisés oikuatía kuae mborookuai, jare omee sacerdote Leví iñemuña reta pe, käjou yandeYa iporogüɨrökuavee päve pegua ivoɨa reta, jare Israel iñemuña reta itenondegua reta pe,

¹⁰ oyókuai körai: “Chiu año ñavo, oväe yave año ñɨ̈ro pegua, o ñairaka pegua iyarete pe,

¹¹ opaete Israel iñemuña reta yogüeru yandeYa Tumpa jóvai, jae oiparavoa pe yave, toyemongeta chupe reta kuae mborookuai.

¹² Emboatɨuka opaete vae, kuimbae reta, kuña reta, michia reta, ketɨgua reta perëta pe yogüɨreko vae, oendu reta vaerä jare oyemboe reta vaerä, oipoɨu vaerä yandeYa Tumpa güi, oyapo reta vaerä opaete kuae mborookuai jei vae.

¹³ Jökorai peraɨ reta mbaetɨ oikuaa kuae regua vae toendu jare toyemboe reta toipoɨu yandeYa Tumpa güi, opaete ara oikove yogüɨreko ramboeve, yogüɨreko yave jókuae ɨvɨ peasata peo peiko pɨpe vae pe, kuae ɨ̈aka Jordán peasa ma yave.”

YandeYa jaeño ma omboarakuaa Moisés

¹⁴ Javoi yandeYa jei Moisés pe: “Mase, ou ma oväe remano vaerä; jayave eenɨi Josué, jare cheräro tupao guakapi pegua pe, che amee vaerä chupe cheporookuai.” Jare Moisés ojo Josué ndive tupao guakapi pegua pe jare oäro reta joko pe.

¹⁵ Jare yandeYa oyekuaa chupe reta tupao guakapi pe, metei jɨsɨ amapɨtu re, jare jókuae amapɨtu oñeñono tupao guakapi pegua jöke re.

¹⁶ Jayave yandeYa jei Moisés pe: “Remanota ma, jare kuae tëta oikomeguata tumpa ambuae kuae ɨvɨ pegua reta rupi, jókuae ɨvɨ yogüɨrajata yogüɨreko pɨpe vae pe; chereeya retata, omboaita morogüɨrökuavee päve ayapo jae reta ndive vae;

¹⁷ jókuae ara chearasɨta chupe reta, aeya retata, ayerovata chugüi reta jare oiporara yae jeta mbaembae ikavimbae vae jeko pegua jei retata jókuae ara: ‘¿Mbaetɨ ma ndipo ñaneTumpa oï yande ndive, jáeramo yaiporara kuae mbaembae reta?’

¹⁸ Ayerova eteta ko chugüi reta jókuae ara, ikavimbae jae reta oyapo vae jeko pegua, omboete reta tumpa ambuae reta jeko pegua.

¹⁹ Añave, peikuatía kuae tairari, jare pemboe jese Israel iñemuña reta, otairari reta vaerä, jare jókuae tairari timiari cheré Israel iñemuña reta pe.

²⁰ Echa aroike reta ma ɨvɨ kavi pe, añererökuavee cheree re amee vaerä iñemuñagüe reta pe vae pe yave, okaru retata, okau retata, omboete retata tumpa ambuae reta, jökorai chereeya retata jare omboai retata morogüɨrökuavee päve ayapo jae reta ndive vae.

²¹ Ërei ou ma jeta ikavimbae jare mbɨatɨtɨ chupe reta yave, jayave kuae tairari jeita chupe reta etei cheregua, echa iñemuña reta imaenduata jese jare otairari retata; echa che aikuaa voi ma iyemongeta ndei aroike reta mbove jókuae ɨvɨ pe.”

²² Jare Moisés oikuatía jókuae ara kuae tairari, jare omboe jese Israel iñemuña reta.

²³ YandeYa oyókuai Josué, Nun taɨ, jei chupe körai: “Eñemomɨ̈rata jare eñemoäta ngatu, echa nde reroiketa Israel iñemuña reta jókuae ɨvɨ añererökuavee cheree re amee vaerä chupe reta vae pe, che aïta nde ndive.”

Mborookuai oyekuatiagüe oñeñovatu vaerä käjou iyɨpɨ pe

²⁴ Moisés opa oikuatía kuae mborookuai reta metei tupapire pe yave,

²⁵ oyókuai levita reta, yandeYa ikäjou morogüɨrökuavee päve pegua ivoɨa reta, jei chupe reta körai:

²⁶ “Peipɨɨ kuae tembikuatía mborookuai reta oyekuatía oï pɨpe vae, jare peñono yandeYa Tumpa ikäjou morogüɨrökuavee päve pegua iyɨpɨ pe, jare toï joko pe ïru vae reta pe oikuaauka vaerä peregua.

²⁷ Echa che aikuaa pepɨapochɨ jare pepɨa täta vae; añave rupi oimeño vɨteri aiko pepɨte pe yave viña pa pepɨapochɨ yandeYa kotɨ, ¡vɨtei ndipo amano ma yave!

²⁸ Pemboatɨ cheve opaete ñemuña itenondegua ñavo, jare mburuvicha reta, chemiarita chupe reta kuae ñee, ara jare ɨvɨ jovake tae chupe reta.

²⁹ Echa, che aikuaa amano ma yave, peikomeguata jare pepiata tape che poyókuai jese vae güi; jare outa peve kuri mbaesusere, peyapo ikavimbae yandeYa jesa róvai jeko pegua, echa jökorai pemboarasɨuka perembiapo reta rupi.”

Moisés itairari

³⁰ Jayave Moisés ojäa kuae tairari Israel iñemuña reta jóvai opa omboapɨ regua.