DEUTERONOMIO 3 - Biblia Guarani Tumpa Iñee

Israel iñemuña reta omoamɨri Og mburuvicha guasu Basán pegua

¹ Jaɨkue rupi yayeupi tape Basán kotɨ ojo vae rupi, jare Og mburuvicha guasu Basán pegua oë yandeve opaete isundaro ndive oñeraro vaerä yande ndive Edrei pe.

² Jayave yandeYa jei cheve: ‘Agüɨye ekɨɨye chugüi, echa amee ko ndepo pe, jae jare opaete isundaro reta iɨvɨ ndive, jare reyapota jae ndive Sehón amorreo reta juvicha guasu Hesbón pe oiko vae pe reyapo rami.’

³ Jare yandeYa Tumpa omee vi yandepo pe Og mburuvicha guasu Basán pegua jare opaete jëta, opa regua ñamokañɨtei.

⁴ Jare opa ñapɨ̈ro jëta guasu, mbaetɨ jembɨre metei ave tëta; sesenta tëta guasu reta opaete ɨvɨ Argob pegua, Og mburuvicha guasu Basán pegua iporookuaía pegua ñapɨ̈ro.

⁵ Opaete kuae tëta guasu reta ikësea ɨvate yae vae ko, jöke reta japɨpe kotɨ oyeasa imotätaa vae, yaipapambae reve ïru tëta reta ikëseambae.

⁶ Jare opa yamboai, Sehón mburuvicha guasu Hesbón pegua yayapo rami, opaete tëta rupi yayuka kuimbae reta, kuña reta jare michia reta,

⁷ jare ñapɨ̈ro yandeyeupe opaete mɨmba reta, jare mbaembae tëta reta pegua.

⁸ Jökorai ñapɨ̈ro jókuae ara rupi mókoi mburuvicha guasu amorreo reta ipo güi ɨvɨ, Jordán güi kuaraɨ oëa kotɨ oï vae, ɨesaɨ Arnón pegua güive Hermón kotɨ.

⁹ (Kuae ɨvɨtɨ Hermón, Sidón pegua reta ombojee Sirión, jare amorreo reta ombojee Senir.)

¹⁰ Opaete tëta guasu reta ipe kavía rupigua ñapɨ̈ro, opaete Galaad jare Basán güive Salca jare Edrei kotɨ, tëta guasu reta Og mburuvicha guasu Basán pegua iporookuaía pegua.

¹¹ Og mburuvicha guasu Basán pegua jaeño ete opɨta kuimbae puku vae reta ipɨte güi; jupa jiero pegua irundɨ metro pukugüe, mókoi metro seri ipɨgüe, oimeño oï Rabá pe.

Rubén, Gad jare Manasés iñemuña reta oyemboyaogüe oñemoëta Jordán güi kuaraɨ oëa kotɨ

¹² Jare kuae ɨvɨ jókuae ara rupi ñapɨ̈ro vae, Aroer, ɨ̈aka Arnón iyɨ́vɨri oï vae güive, ɨvɨtɨ Galaad mbɨte rupi tëta guasu ndive, amee Rubén iñemuña reta pe jare Gad iñemuña reta pe.

¹³ Jare ɨvɨ Galaad iyɨkegüe jare opaete Basán, Og iporookuaía peguagüe jare opaete ɨvɨ Argob, oyembojeese kuimbae puku vae reta iɨvɨ vae, amee Manasés iñemuña reta oyemboyaogüe pe.

¹⁴ Manasés iñemuña pegua Jair opɨ̈ro opaete ɨvɨ Argob ojoi oya Gesur jare Maaca iɨvɨ jembeɨ re, jare ombojee Basán-havot-jair, añave regua.

¹⁵ Jare ɨvɨ Galaad amee Maquir pe.

¹⁶ Rubén jare Gad iñemuña reta pe amee Galaad güive ɨ̈aka Arnón kotɨ, güɨnoi iɨvɨ jembeɨ ɨvɨtɨ päu mbɨte pe, ojo regua oya ɨ̈aka Jaboc re, jae ko jókuae Amón iñemuña reta iɨvɨ jembeɨ.

¹⁷ Jaeramiño vi amee ɨvɨ Arabá, Jordán güɨnoi jókuae ɨvɨ jembeɨrä; oyemboɨpɨ Ɨguasu Cineret güive Ɨguasu Jembochɨ vae, jare ɨvɨtɨ Pisga re kuaraɨ oëa kotɨ.

¹⁸ Jayave che poyókuai, körai: ‘YandeYa Tumpa omee peve kuae ɨvɨ pembaerä. Ërei peota perëtara Israel iñemuña reta ndive opaete oikatu oñeraro vae, tembiporu ñeraro pegua ndive.

¹⁹ Jaeño ete perembireko reta, pemichia reta jare perɨmba reta che aikuaa jeta yae penoi vae, opɨtata tëta guasu reta pe, che amee pevea pe.

²⁰ YandeYa omee regua mbutuu perëtara reta pe, pe reta rami, jare jae reta togüɨnoi ɨvɨ imbae retarä yandeYa Tumpa omee chupe reta Jordán jovaicho pe vae; jayave ramo peyu yeta peɨvɨ pe, che amee pevea pe.’

²¹ Josué ayókuai jókuae ara: ‘Nde etei reecha kavi kërai yandeYa Tumpa oyapo jókuae mókoi mburuvicha guasu reta pe vae. Jökorai yandeYa oyapota opaete mborookuaía reota pɨpe vae pe.

²² Agüɨye pekɨɨye chugüi, echa yandeYa Tumpa ko oñerarota peré.’

Moisés pe mbaetɨ oñemee oike vaerä ɨvɨ Canaán pe

²³ Jayave ayerure yandeYa pe, körai:

²⁴ ‘CheYa Tumpa, nde remboɨpɨ reechauka che nderembiokuai pe ndetuicha yae vae, jare ndembaepuere; echa mbaetɨ yé ïru Tumpa ara pe ani ɨvɨ pe ikavi yae oyapo vaerä nde reyapo rami vae.

²⁵ Romoñera aasa vaerä aecha jókuae ɨvɨ ikavi yae vae, Jordán güi kutɨ oï vae, jókuae ɨvɨtɨ kavi jare Líbano.’

²⁶ Ërei yandeYa iyarasɨ cheve pereko pegua, jare mbaetɨ oyeapɨsaka cheré, jare jei yandeYa cheve: ‘¡Joko peño mo! Agüɨye ye nemiari cheve kuae re.

²⁷ Eyeupi ɨvɨtɨ Pisga re, jare emae kuaraɨ oikea kotɨ, ɨvɨtuguasu kotɨ, jare arayevɨ kotɨ, kuaraɨ oëa kotɨ, emae jese echa mbaetɨta reasa jokotɨ.

²⁸ Emboe Josué jare emoäta ngatu, emopɨ̈rata; echa jae ko ojota opaete vae reta jenonde, jare jae omeeta ɨvɨ imbae retarä jókuae reechata vae.’

²⁹ Jare yapɨta ɨvɨtɨ päu ipe kavi vae pe Bet-peor jóvai.