DEUTERONOMIO 29 - Biblia Guarani Tumpa Iñee

YandeYa oyapo morogüɨrökuavee päve Israel iñemuña reta ndive Moab pe

¹ Kuae jae ko ñee reta morogüɨrökuavee päve pegua, yandeYa oyókuai Moisés oyapo vaerä Israel iñemuña reta ndive ɨvɨ Moab pe vae, jókuae morogüɨrökuavee päve oyapo Horeb pe vae oime güire.

² Moisés omboatɨ opaete Israel iñemuña reta, jare jei chupe reta: “Pe reta peecha ko opaete mbaembae yandeYa oyapo perovake ɨvɨ Egipto pe vae, Faraón pe, jembiokuai reta pe, jare opaete iɨvɨ pe vae,

³ pe reta peecha ko opaete jókuae yemboaporova tuichagüe jare mɨakañɨ tuichagüe.

⁴ Ërei mbaetɨño yandeYa omee peve peikuaa vaerä, peecha vaerä jare peendu vaerä mbae ko oipota jei opaete kuaekuae vae.

⁵ Che pogüɨroata ma cuarenta año kuae ñuu rupi, ërei peremimonde jare pepɨapaa mbaetɨ indechi pegüi.

⁶ Mbaetɨ peu mbɨyape, vino jare mbae oporombosavaɨpo vae; peikuaa vaerä yandeYa ko jae Tumpa vae.

⁷ Jare kuae pe yayu ñaväe yave ñogüɨnoe oñeraro reta vaerä yande ndive Sehón, mburuvicha guasu Hesbón pegua, jare Og, mburuvicha guasu Basán pegua, ërei opa ñamoamɨri,

⁸ jare opa ñapɨ̈ro iɨvɨ chugüi reta, jare ñamee Rubén jare Gad iñemuña reta imbaerä jare Manasés iñemuña reta oyemboyaogüe vae imbaerä.

⁹ Jáeramo, peñovatu ñee reta kuae morogüɨrökuavee päve pegua, peyapo jeigüe, oë kavi vaerä peve opaete mbaembae peyapo vae.

¹⁰ Añave opaete peï yandeYa Tumpa jóvai, ñemuña itenondegua reta, opaete peruvicha reta, opaete Israel iñemuña reta,

¹¹ pemichia reta, perembireko reta, ketɨgua reta yogüɨreko pepɨte pe vae, yepea oyasɨa peve vae reta ave jare ɨ güɨnoe peve vae reta,

¹² peñererökuavee vaerä Tumpa jee re, morogüɨrökuavee päve yandeYa Tumpa oyapo oï añave pe ndive vae pe.

¹³ Añave omoañete oï pe reta jae imbae ko vae, jae oï vaerä peTumparä, jae jei peve rami, peñemuñagüe Abraham, Isaac jare Jacob pe güɨrökuavee jee re rami.

¹⁴ Jare mbaetɨ pe reta ndiveño oyapo kuae morogüɨrökuavee päve,

¹⁵ oyapo vi ko opaete kuae pe añave mbaetɨ ñogüɨnoi vae reta ndive.

¹⁶ Pe reta peikuaa ko kërai yaikose ɨvɨ Egipto pe vae, jare kërai yaasa jókuae tëtaguasu reta tape rupi ñaväe chupe vae reta ipɨte rupi vae,

¹⁷ jare yaecha jókuae tëta guasu reta pe mbaembae pɨ̈chɨi yae vae güɨnoi reta vae, jare itumpa-raanga reta ɨvɨra pegua, ita pegua, korepoti pegua jare oro pegua jae reta omboete vae.

¹⁸ Agüɨye toime pepɨte pe kuimbae ani kuña yepe, ani metei tëtara, ani metei ñemuña ipɨa opia añave yandeYa güi vae, omboete vaerä kuae tëtaguasu reta itumpa-raanga reta. Agüɨye toime pepɨte pe kia nunga vae metei temitɨ iro ani imbayachi vae rami vae.

¹⁹ Ërei kia nunga vae oendu kuae mborookuai jei vae reve jei yave iyeupe: ‘Che anoita mbɨakatu, yepe tëi ayapo che jaegüe; asavaɨpo rupi amboasata ɨuve.’

²⁰ YandeYa ngaraa oipota iñɨ̈ro chupe, oitɨta iyarasɨ, oata jese opaete yepopeyu reta kuae tembikuatía pe oï vae, yandeYa omokañɨteita iñemuña reta ɨvɨ iárambo güi.

²¹ YandeYa ombosɨrɨta opaete Israel iñemuña reta güi, jare ombouta jese ikavimbae, yepopeyu reta morogüɨrökuavee päve pegua oyekuatía oï tembikuatía mborookuai pegua pe vae.

²² Jare peñemuña reta peraɨkue rupi oimeta vae, jare ketɨgua mombɨrɨ güi ou vae, oecha mbae ikavimbae jare mbaerasɨ reta yandeYa ombou kuae ɨvɨ pe vae yave;

²³ oecha retata azufreño, yukɨ jare ɨvɨ okaigüeño. Mbaetɨta mbae ipuere oñeotɨ pɨpe, mbaetɨta vi mbae oñemuña pɨpe, mbae nunga ñana ave mbaetɨta oñemuña pɨpe, Sodoma, Gomorra, Adma jare Zeboim oñemokañɨtei yave rami, yandeYa iyarasɨ jeko pegua omboai kuae tëta reta.

²⁴ Jayave opaete tëtaguasu pegua reta jeita: ‘¿Maera ra Tumpa jökorai oyapo kuae ɨvɨ? ¿Mbae re ra iyarasɨ mbatee?’

²⁵ Jare jei retata: ‘IYa Tumpa oyapo morogüɨrökuavee päve iñemuñagüe reta pe vae oeya reta jeko pegua, ɨvɨ Egipto güi güɨnoe yave omee chupe reta vae,

²⁶ jare opa yogüɨraja omboete tumpa ambuae reta, oyetavatɨka reta jóvai, jae reta mbaetɨ oikuaa vae pe, mbaetɨ metei ave mbae omee chupe reta vae pe.

²⁷ Jáeramo Tumpa iyarasɨ kuae ɨvɨ pe, güeru vaerä opaete yepopeyu reta kuae tembikuatía pe oï vae;

²⁸ jare güɨnoe omombo iɨvɨ güi iyarasɨ yae ete reve, opa güɨnoe omombo ïru ɨvɨ kotɨ, añave oyekuaa oï rami.’

²⁹ Opaete mbaembae yaikuaambae, yandeYa Tumpaño ko oikuaa; ërei oikuaauka vae yandeveguarä ko jare yanderaɨ reta peguarä ko, jekuae avei pegua, yayapo vaerä opaete ñee reta kuae mborookuai pe oyekuatía oï vae.