DEUTERONOMIO 27 - Biblia Guarani Tumpa Iñee

Mborookuai reta oyekuatía vaerä ita re

¹ Moisés jare Israel iñemuña itenondegua reta ndive oyókuai opaete vae, jei körai: “Peñovatu opaete mborookuai reta che amombeu añave peve vae.

² Jókuae ara peasa ma Jordán, peike vaerä yandeYa Tumpa omee ɨvɨ peve vae pe yave, pemopüa ita tuichagüe jare pemotï tövati pe,

³ peikuatía jese opaete kuae mborookuai reta, peasa ma yave yandeYa Tumpa omee ɨvɨ ikavi yae vae peve vae pe, yandeYa Tumpa güɨrökuavee peñemuñagüe reta pe rami.

⁴ Jayave peasa ma Jordán yave, pemopüa jókuae ita reta ɨvɨtɨ Ebal re, che poyókuai añave vae, jare pemotï tövati pe.

⁵ Jare pemopüa joko pe metei mɨmba oyeyuka oyeapɨ jese vae yandeYa Tumpa peguarä, peyapo ita pegua; agüɨye peyapo ita oñeopagüe pegua.

⁶ Ita joko revegüe pe peyapo mɨmba oyeyuka oyeapɨ jese vae yandeYa Tumpa peguarä. Jókuae re pemee mɨmba oyeyukagüe opaetei oyeapɨ vae yandeYa Tumpa pe

⁷ jare mbota yembopɨakatu pegua, jare peu joko pe, jare peyerovia yandeYa Tumpa jóvai.

⁸ Pemboyekuaa kavi ñee reta peikuatía ita re, opaete kuae mborookuai reta.”

⁹ Jayave Moisés jare sacerdote Leví iñemuña reta ndive, jei reta opaete Israel iñemuña reta pe: “Peyeapɨsaka Israel iñemuña reta. Añave peyu peyeapo tëta yandeYa Tumpa imbaerä.

¹⁰ Jáeramo, peendu yandeYa Tumpa iñee jare peyapo opaete iporookuai reta, che poyókuai añave vae.”

Yepopeyu reta ɨvɨtɨ Ebal re

¹¹ Moisés oyókuai opaete vae jókuae ara, jei reve:

¹² “Peasa ma ɨ̈aka Jordán yave, Simeón iñemuña reta, Leví iñemuña reta, Judá iñemuña reta, Isacar iñemuña reta, José iñemuña reta jare Benjamín iñemuña reta toñogüɨnoi ɨvɨtɨ Gerizim re, jei reta vaerä ñee kavi opaete vae re.

¹³ Jare Rubén iñemuña reta, Gad iñemuña reta, Aser iñemuña reta, Zabulón iñemuña reta, Dan iñemuña reta jare Neftalí iñemuña reta toñogüɨnoi ɨvɨtɨ Ebal re, jei reta vaerä yepopeyu.

¹⁴ Jare levita reta tei osapúkai reve, opaete Israel iñemuña reta pe:

¹⁵ ‘Tijeko jókuae kuimbae oyapo mbae iägüe ani tumpa-raanga jiero oyemondɨkuigüe pe vae, pɨ̈chɨi yae ko yandeYa pe, kuimbae ipoki vae jembiapo, jare oñomi oñono vae.’ Jare opaete vae tei: ‘Amén.’

¹⁶ ‘Tijeko mbaetɨ omboete tu ani ichɨ vae.’ Jare opaete vae tei: ‘Amén.’

¹⁷ ‘Tijeko japicha iɨvɨ jembeɨ güɨrosɨrɨ vae.’ Jare opaete vae tei: ‘Amén.’

¹⁸ ‘Tijeko jesambae pe oyavɨuka jape vae.’ Jare opaete vae tei: ‘Amén.’

¹⁹ ‘Tijeko oyapo ikavimbae ketɨgua pe vae, tɨ̈reɨ pe ani imemano vae pe vae.’ Jare opaete vae tei: ‘Amén.’

²⁰ ‘Tijeko tu jembireko re opoko vae, echa mbaetɨ ko tu omboete.’ Jare opaete vae tei: ‘Amén.’

²¹ ‘Tijeko oasa oipotagüe mɨmba ndive vae.’ Jare opaete vae tei: ‘Amén.’

²² ‘Tijeko jeindɨ re opoko vae, tu tayɨ ani ichɨ imemɨkuña.’ Jare opaete vae tei: ‘Amén.’

²³ ‘Tijeko jaicho re opoko vae.’ Jare opaete vae tei: ‘Amén.’

²⁴ ‘Tijeko jókuae japicha ombotavɨ oyuka vae.’ Jare opaete vae tei: ‘Amén.’

²⁵ ‘Tijeko oipɨɨ vɨari korepoti, oyuka vaerä jekombae vae.’ Jare opaete vae tei: ‘Amén.’

²⁶ ‘Tijeko mbaetɨ omboete ani mbaetɨ oyapo kuae mborookuai reta jeigüe vae.’ Jare opaete vae tei: ‘Amén.’