DEUTERONOMIO 26 - Biblia Guarani Tumpa Iñee

Mbota mbaagüɨyerɨpɨ reta regua

¹ Peike ma yandeYa Tumpa omee ɨvɨ pembaerä vae pe jare peiko ma pɨpe yave,

² peipɨɨ pembaagüɨyerɨpɨ, jare peñono metei kanata pe peraja yandeYa Tumpa oiparavo jee oïta pɨpea pe.

³ Jare joko pe oï sacerdote jókuae ara rupi vae jóvai peyemboɨ, jare pere chupe: ‘Ko añave roe yandeYa Tumpa pe, roike ma ɨvɨ omombeu jee re oreñemuñagüe reta pe omee vaerä oreve vae pe.’

⁴ Javoi sacerdote toipɨɨ kanata ndepo güi jare toñono yandeYa Tumpa pe mɨmba oyeyuka oyeapɨ jese vae jóvai.

⁵ Jayave pemoë peñee jare pere yandeYa Tumpa jóvai: ‘Cheñemuñagüe ko Aram pegua oguata oiko vae, jae ojo Egipto pe mbovɨ kuimbae reta ndive, jare opɨta joko pe oiko vaerä; joko pe oñemuña, ou oyeapo metei tëtaguasu tuicha yae vae jare imbaepuere vae.

⁶ Ërei Egiptoɨgua reta orerekoasɨ katu, oiporarauka oreve, jare oreokuaiasɨ katu.

⁷ Jayave royerure mbɨatɨtɨ ndive Tumpa pe, oreñemuñagüe reta iTumpa pe; jare jae oendu oreñee, jare oecha roiporara vae jare oreokuaiasɨ katu vae;

⁸ orerenoe Egipto güi imbaepuere yae rupi jare ipo oporoiämondo yae vae rupi, yemongɨɨye tuicha vae rupi jare jeta mɨakañɨ reta rupi,

⁹ jare orereru kuae pe omee oreve kuae ɨvɨ; ɨvɨ ikavi yae vae.

¹⁰ Jáeramo añave, rogüeru mbaagüɨyerɨpɨ, kuae ɨvɨ remee oreve vae pegua, oreYa Tumpa.’ Jare peeya yandeYa Tumpa jóvai, jare pemboete yandeYa Tumpa.

¹¹ Javoi peyerovia pearete opaete yandeYa Tumpa omee peve vae re, jare pero pegua reta pe omee vae re. Toyogüeru vi peyeroviaa pe Leví iñemuña reta jare ketɨgua yogüɨreko pepɨte pe vae.

Diezmo reta regua

¹² Mboapɨa año re, jae ko diezmo iaño. Opa ma pembosɨrɨ jare pemee güire pediezmo Leví iñemuña reta pe, ketɨgua pe, tɨ̈reɨ pe jare imemano vae pe yave; jae reta jou vaerä perëta ñavo rupi jɨ̈vɨata regua,

¹³ jayave pere yandeYa Tumpa jóvai: ‘Ambosɨrɨ ma ndeveguarä oñeñono tee vae jare amee Leví iñemuña reta pe, ketɨgua pe, tɨ̈reɨ pe jare imemano vae pe, nde cheokuai rami; ayavɨmbae reve ndeporookuai reta jare mbaetɨ cheakañɨ chugüi.

¹⁴ Jókuae güi, mbaetɨ etei jau aï yave mbɨatɨtɨ pe, ani nderóvai chekɨa aï reve, jare mbaetɨ arökuavee tumpa-raanga reta pe yepe. Ayapo neñee, ayapo opaete nde cheokuai rami.

¹⁵ Emae nerëta ikɨambaea güi, ara güi, ndeporerekua tëta Israel ndembae vae re, jare jókuae ɨvɨ remee oreve vae re, rerökuavee nderee re remee vaerä ɨvɨ ikavi yae vae oreñemuñagüe reta pe rami.’

Israel, tëta oñeñono tee Tumpa peguarä vae

¹⁶ YandeYa Tumpa peokuai peyapo vaerä kuae mborookuai reta, peyeandu, peyapo opaete pepɨa ndive jare opaete perekove ndive.

¹⁷ Pere añave, oreYa ko jae Tumpa, jare peñererökuavee peyapo avei vaerä opaete iporookuai reta, jare peendu iñee.

¹⁸ Jare yandeYa jei añave, pe jae ko tëta imbae, güɨrökuavee peve rami, peyapo vaerä opaete iporookuai reta.

¹⁹ Jae pembotuicha vaerä opaete ïru tëtaguasu reta oyapogüe güi, mbaemboete pe, jare perërakua yaeta vae pe, peiko vaerä jae jei rami: Tëta oñeñono tee yandeYa Tumpa peguarä vae.”