DEUTERONOMIO 24 - Biblia Guarani Tumpa Iñee

¹ Kia nunga vae omenda yave kuña ndive, ërei mbaetɨ ipɨakatu yave oime ramo oväe jese ikavimbae, toikuatía chupe tupapire yomombo pegua, jare tomee ipo pe, jare tomondo jo güi.

² Jare ojo güire kuimbae jo güi, ipuere omenda ïru kuimbae ndive;

³ ërei kuae ime taɨkue rupi güɨreko vae güɨröɨro yave, jare oikuatía yave chupe tupapire yomombo pegua, jare omee yave ipo pe, jare omondo jëta güi; ani omano yave kuae kuimbae taɨkue rupi güɨreko vae,

⁴ mbaetɨta ipuere güɨreko ye jembirekorä jókuae tenonde yave omombo vae, imboeteambae ma jeko pegua; echa kuae, pɨ̈chɨi yae ko yandeYa jóvai, agüɨye perokomegua ɨvɨ yandeYa Tumpa omee peveguarä vae.

Ïru mborookuai reta

⁵ Kia nunga kuimbae omenda ramo yave, agüɨye tojo ñeraroa pe, agüɨye toñemee mbae nunga mbaravɨkɨ ave chupe; topɨta jo pe metei año, omboyerovia vaerä jembireko.

⁶ Agüɨye peiporu mbia re angúa ani mbaesoka, echa ipía vae pe jekove oyeporu rami ko.

⁷ Kia nunga vae oyepokou oñomi metei jëtara Israel iñemuña reta, oyapo vaerä tembiokuairä ani omee vaerä yave, tomano jókuae imonda vae, jökorai peekɨ ikavimbae pepɨte güi.

⁸ Oime yave pire mbaerasɨ ókui vae, peyapo opaete sacerdote Leví iñemuña reta jeigüe. Toyeapo che amee mborookuai chupe reta rami.

⁹ Pemaendúa yandeYa Tumpa kërai oyapo María tape rupi vae re, Egipto güi peë güire.

¹⁰ Kia nunga vae oiporuka japicha pe mbae yave, agüɨye toike jo pe oekɨ vaerä chugüi mbae ipía re.

¹¹ Eäro ikatu pe, jaeiño togüeru mbae omee vaerä jókuae ipía re.

¹² Paravete vae ko yave, agüɨye pemombɨta pɨareve regua chugüi;

¹³ pemee ye chupe kuaraɨ oike yave, ipuere vaerä oyeasoi oke, jökorai jae iñee kavita pekotɨ, echa ikavi vae ko peyapo yandeYa Tumpa jóvai.

¹⁴ Agüɨye peyuvanga paravete vae re, ara ñavo oyeokuai omongana vaerä vae, perëtaɨgua ani ketɨgua oiko peɨvɨ pegua tëta guasu reta pe vae.

¹⁵ Pemboepɨ chupe jókuae ara voi ndei pɨ̈tu mbove, echa paravete ko, oatata chupe oiko jese vaerä. Agüɨye vaerä oñeapo peré yandeYa pe jare peyoa pepɨta.

¹⁶ Agüɨye kia tomano taɨ jeko re, ani tu jeko re; metei ñavo tomano iyoa ae re.

¹⁷ Agüɨye peyapo jupimbae ketɨgua kotɨ, ani tɨ̈reɨ kotɨ, imemano vae jemimonde ave agüɨye peekɨ chugüi ipía re.

¹⁸ Pemaendúa, pe reta tembiokuai ko peikose Egipto pe vae, jare joko güi yandeYa Tumpa perenoe; jáeramo, che poyókuai peyapo vaerä opaete kuae.

¹⁹ Pembaepoo peko pe peï yave, peakañɨ metei yokuaa güi yave, agüɨye peyerova ye peupi vaerä; peeya ketɨgua peguarä, tɨ̈reɨ ani imemano vae peguarä, yandeYa Tumpa iporerekua vaerä peré opaete mbaembae peyapo vae rupi.

²⁰ Peremitɨ olivo ia peipoo yave, agüɨye peyerova ye peeka jäka re peeyagüe, peeya ketɨgua peguarä, tɨ̈reɨ ani imemano vae peguarä.

²¹ Peuva peipoo yave, agüɨye peyevɨka peeyagüe re, peeya ketɨgua peguarä, tɨ̈reɨ ani imemano vae peguarä.

²² Pemaendúa peikose ko tembiokuairä ɨvɨ Egipto pe vae re, jáeramo, che poyókuai peyapo vaerä kuae.