DEUTERONOMIO 21 - Biblia Guarani Tumpa Iñee

Oyeyukagüe mbaetɨ oyekuaa iyukaa vae

¹ YandeYa Tumpa omee ɨvɨ peve peiko vaerä vae pe oñeväe yave tëogüe, jare mbaetɨ oyekuaa kia ko oyuka vae yave,

² tenondegua reta jare mburuvicha oporojäa vae reta tojäa omano vae oïa güi tëta reta köiño ñogüɨnoia kotɨ.

³ Jayave tenondegua reta, jókuae tëta köiño oï jókuae tëogüe güi vae pegua reta toipɨɨ metei guaka mbaetɨ vɨteri oyemombaravɨkɨ vae, mbaetɨ oyeokua yuvo jese vae,

⁴ jare jókuae tenondegua reta togüeru ɨvɨpe kavi pe mbaetɨ etei oyeara jare mbaetɨ oñemaetɨ pɨpea pe, joko pe guaka iñatuäti toakɨo reta.

⁵ Jaɨkue rupi toyogüeru sacerdote Leví iñemuña reta, echa yandeYa Tumpa ko oiparavo jae reta jei vaerä ñee kavi yandeYa jee re, jare iñee reta rupi oyemboapɨ vaerä ñeapo ani yoaka reta.

⁶ Javoi opaete tenondegua reta jëta köiño oï tëogüe güi vae toyepoe guaka iñatuäti oyeakɨo vae re,

⁷ jare tei reta iñeeäta reve: ‘Ore mbaetɨ royuka kuae kuimbae, mbaetɨ vi roecha kërai omano.

⁸ Neɨ̈ro Israel iñemuña reta ndembae vae reta pe, nde renoe vae reta, jare agüɨye emboeko jekombae jugüɨ re.’ Jökorai jókuae jekombae jugüɨ oyepɨyere vae re iñɨ̈rota peve,

⁹ jökorai peekɨ pepɨte güi teko, jekombae jugüɨ oyepɨyere vae re, peyapo yave jupi vae yandeYa jesa róvai.

Kuñatai tembipɨɨ reta regua mborookuai

¹⁰ Peo yave peñoraro perovaicho reta ndive, jare yandeYa Tumpa omee pepo pe yave, jare peipɨɨ tembipɨɨrä,

¹¹ jare jókuae tembipɨɨ reta ipɨte pe peecha yave kuña maepöra yae vae, jare peporopota pemae jese jare peipɨɨ perembirekorä,

¹² jayave peraja pero pe jare topa toñapi ia, jare ipöape reta toyasɨa,

¹³ tomboi jemimonde oyepɨɨ jae ndive vae jare topɨta toiko pero pe, toyaeo toiko tu re jare ichɨ re metei yasɨ, jaɨkue rupi ipuere güɨroke jare oyapo jembirekorä.

¹⁴ Ërei jaɨkue rupi mbaetɨ yave oipota, tomaeño jese ojo ye vaerä, ërei agüɨye tomee korepoti re, agüɨye vi togüɨreko tembipɨɨrä, echa oasa ko jae ndive.

Membɨrɨpɨ iyekou

¹⁵ Metei kuimbae jembireko mókoi vae, metei oaɨu jare ïru mbaetɨ, jare mókoi reve imembɨ chupe, ërei taɨrɨpɨ jae ko jembireko oaɨumbae imembɨ,

¹⁶ jare oväe ara omboyao vaerä imbaembae taɨ reta pe yave, agüɨye tomee jembireko oaɨu vae imembɨrɨpɨ pei, tenondegua pe omee vaerägüe, echa añetete taɨrɨpɨ jae ko jembireko mbaetɨ oaɨu vae imembɨrɨpɨ.

¹⁷ Omee tai ko chupe membɨrɨpɨ iyekourä vae, echa jae ko taɨrɨpɨ, iñemuña tenondegua ko. Metei ñavo iyekou güɨnoita vae güi tomee chupe mókoi ye.

Kuimbae taɨ ipɨapochɨ vae oñenupa vaerä

¹⁸ Oime yave kia nunga vae taɨ mbaetɨ oipota oyapo mborookuai jare ipɨapochɨ, yepe tëi oyókuai tu ani ichɨ, jare yepe tëi oinupa jese,

¹⁹ jayave tu jare ichɨ togüɨraja morojäa renda pe, tëta pegua mburuvicha ñogüɨnoia pe,

²⁰ jare tei: ‘Kuae cheraɨ iñeereenduä yae jare ñäteɨ oyapo oreporookuai, mbaetɨ oipota oyapo roe chupegüe, ipɨa jeigüeño oyapo, isavaɨpose.’

²¹ Jayave opaete kuimbae reta tëta pegua toyapi ita pe toyuka. Jökorai peekɨ ikavimbae pepɨte güi, jare opaete Israel iñemuña reta oendu yave oipoɨuta.

Ïru mborookuai reta

²² Kia nunga vae omano yave teko pɨ̈chɨi yae oyapo vae jeko pegua, pembosagüɨu yave ɨvɨra re,

²³ agüɨye pemaeño tipɨ̈tu jetegüe ɨvɨra re; jókuae ara voi peñotɨ; echa Tumpa iyepopeyu rupi ko omano, ɨvɨra re osagüɨu omano vae; agüɨye pemongɨa peɨvɨ yandeYa Tumpa omee peveguarä vae.