DEUTERONOMIO 20 - Biblia Guarani Tumpa Iñee

Mborookuai reta ñeraro pegua

¹ Peë yave peñoraro vaerä perovaicho ndive, jare peecha kavayu regua reta, käretou ñeraro pegua jare jeta sundaro pegüi yave, agüɨye pekɨɨye chugüi reta, yandeYa Tumpa ɨvɨ Egipto güi perenoe vae ko oï pe ndive.

² Jare pemboɨpɨta ma peñoraro yave, sacerdote toyemboɨ jare timiari opaete vae pe

³ körai: ‘Peyeapɨsaka Israel iñemuña reta, jaema peñorarota perovaicho reta ndive. Agüɨye peyembopɨtu, agüɨye pekɨɨye, agüɨye vi perɨrɨi ani perembiurai,

⁴ echa yandeYa Tumpa ko ojo pe ndive, oñoraro vaerä peré perovaicho reta ndive, pereroasayepe vaerä.’

⁵ Jaɨkue rupi timiari mburuvicha reta, jare tei: ‘Oime yave pegüi reta kia omopüa jorä ipɨau vae jare ndeiño oiko pɨpe, tojo ye; güɨramoi omano ñeraro pe jare ambuae vaei oiko pɨpe.

⁶ Oime yave pegüi reta oñono uvarupa, jare ndeiño jou chugüi vae, tojo ye jëta pe, echa güɨramoi omano ñeraro pe jare ambuae vaei oyekou jese.

⁷ Jare oime yave pegüi reta oñererökuavee omenda vaerä vae, jare ndeiño omenda vae, tojo ye jëta pe, güɨramoi omano ñeraro pe jare ambuae vaei omenda jókuae kuña ndive.’

⁸ Jaɨkue rupi mburuvicha reta timiari sundaro reta pe, körai: ‘Oime yave kia okɨɨye jare ipuereä vae, tojo ye jëta pe, agüɨye vaerä ombopɨtu japicha reta.’

⁹ Jare mburuvicha reta opa ma imiari yave, sundaro ruvicha reta toñeñono tenonde sundaro reta pe.

¹⁰ Tëta pepüata jese vae re peya ma yave, tenonde perökuavee räri mbɨakatu chupe reta.

¹¹ Jókuae tëta pegua reta oipota mbɨakatu yave, jare omaeño peike jëta pe yave, ikavita ombaemboepɨ vaerä peve jare perembiokuairä.

¹² Ërei mbaetɨ yave oipota peyapo mbɨakatu jae reta ndive, jare jei reta peñoraro vaerä yave, opa peñova tëta.

¹³ YandeYa Tumpa omeeta pepo pe, jare opa peyuka kɨsepuku pe opaete kuimbae.

¹⁴ Jaeño kuña reta, michia reta jare mɨmba reta jare opaete mbaembae oï pɨpe vae peipɨɨ pembaerä jare jembiugüe reta peu vaerä, echa jae ko yandeYa Tumpa omee peve perovaicho reta güi vae.

¹⁵ Jökorai vi peyapo opaete tëta guasu reta mombɨrɨ ñogüɨnoi pegüi vae, mbaetɨ oyea ñogüɨnoi kuae tëtaguasu ndive vae.

¹⁶ Ërei tëta guasu reta yandeYa Tumpa omee peve pembaerä vae pe mbaetɨ eteita peeya kia jekove ndive,

¹⁷ opaetei pemboai heteo reta, amorreo reta, cananeo reta, ferezeo reta, heveo reta jare jebuseo reta, yandeYa Tumpa peokuai rami,

¹⁸ agüɨye vaerä pemboe peyapo mbae pɨ̈chɨi vae jae reta oyapo itumpa-raanga pe rami, jökorai agüɨye vaerä peyoa yandeYa Tumpa kotɨ.

¹⁹ Metei tëta peñova yave, mbovɨ ara rupi peïrarota yave, agüɨye peyasɨa iɨvɨra reta yɨɨ pe, echa iagüe peu vaerä ko, kuimbaeä ko ɨvɨra oyeepɨ vaerä pegüi.

²⁰ Ërei ɨvɨra iambae vae ko yave, pepuere peyasɨa jare peiporu, tëta peñova peï vae oa pepo pe regua.