DEUTERONOMIO 2 - Biblia Guarani Tumpa Iñee

Israel iñemuña reta ɨma año yogüɨreko ñuu rupi

¹ Jaɨkue rupi yaja ye ñuu pe, tape Ɨguasu Pɨ̈ta vae kotɨ ojo vae rupi, yandeYa jei cheve rami, jare yayere yaiko ɨvɨtɨ reta Seir re, ɨma año rupi.

² Jayave yandeYa jei cheve:

³ ‘Peyere mbatee yae ma kuae ɨvɨtɨ reta re, pekua ye ɨvɨtuguasu kotɨ.

⁴ Eyókuai opaete vae, rere reve: Peasa perëtara Esaú iñemuña reta Seir pe yogüɨreko vae iɨvɨ rupi, jae reta okɨɨyeta pegüi, ërei ngatu peyeandu.

⁵ Agüɨye peñoraro jae reta ndive, echa ngaraa amee peve kërai ave yepe jae reta iɨvɨ güi. Che ko amee Esaú iñemuña reta imbaerä ɨvɨtɨ Seir.

⁶ Tembíu peu vaerä peguata chugüi reta korepoti re, jaeramiño vi ɨ peɨu vaerä peguata chugüi reta.’

⁷ Echa yandeYa Tumpa iporerekua peré opaete perembiapo reta rupi, jae oikuaa kërai peguata opaete kuae ñuu guasu rupi vae, kuae cuarenta año rupi yandeYa Tumpa oiko pe ndive, jare mbaetɨ etei mbae omboata peve.

⁸ Jare yaasa ñanerëtara Esaú iñemuña reta yogüɨreko Seir pe vae güi, tape Arabá pegua ojo Elat jare Ezión-geber rupi vae, jare yayere yayu vaerä tape ñuu Moab pegua rupi.

⁹ Jayave yandeYa jei cheve: ‘Agüɨye pemoambeko Moab iñemuña reta, agüɨye peñoraro jae reta ndive, echa ngaraa amee peve kërai ave jae reta iɨvɨ güi. Che ko amee ɨvɨ Ar, Lot iñemuña reta peguarä.’

¹⁰ (Tenonde yave emita reta yogüɨrekose joko pe, jae ko jeta yae vae reta, jare puku Anac iñemuña reta rami.

¹¹ Puku reta jeko pegua ïru vae reta omoëtara Anac iñemuña reta re, ërei Moab iñemuña reta ombojee emita.

¹² Jökorai vi tenonde yave horeo reta yogüɨrekose Seir pe, ërei Esaú iñemuña reta opa omoë omombo reta ipɨte güi, jare yogüɨreko jëtagüe pe, Israel iñemuña reta oporoapo rami yandeYa omee yave ɨvɨ chupe reta.)

¹³ Jare yandeYa jei: ‘Pepüa añave jare peasa ɨ̈aka Zered.’ Jare yaasa ɨ̈aka Zered.

¹⁴ Cades-barnea güive yaguata yaiko yaasa regua ɨ̈aka Zered vae jae ko treinta y ocho año. Jayave rupi opa ma kuimbae ñeraro regua reta omano, yandeYa jae jee re ae jei rami.

¹⁵ Jare yandeYa imbaepuere oitɨ vi jese reta opa okañɨtei reta regua teyupa güi.

¹⁶ Opa güire omano kuimbae reta ñeraro regua teyupa pe.

¹⁷ YandeYa jei cheve:

¹⁸ ‘Añave voi reasata ɨvɨ Moab jembeɨ rupi, jae ko Ar,

¹⁹ jare köiño ma Amón iñemuña reta güi reï yave, agüɨye emoambeko reta jare agüɨye vi neñeengeta jae reta ndive, echa ngaraa amee ndeve jae reta iɨvɨ güi. Amón iñemuña reta jae vi ko Lot iñemuña reta amee ko ɨvɨ jae reta imbaerä.’

²⁰ (Kuae ɨvɨ tenonde ete oyembojee ko kuimbae puku vae reta imbae, echa jayave puku vae reta yogüɨrekose joko pe, Amón iñemuña reta ombojee zomzomeo,

²¹ tuichagüe jare jeta yae vae kuae reta, puku yae reta Anac iñemuña reta rami, ërei yandeYa opa omokañɨtei Amón iñemuña reta rupi, jare jae reta yogüɨreko jëtagüe pe.

²² YandeYa oyapo Esaú iñemuña reta ndive rami, Seir pe yogüɨrekose horeo reta vae opa omboai chupe, jare jendagüe pe yogüɨreko añave regua.

²³ Jare aveo reta yogüɨrekose tëta raɨ reta ojoi oya Gaza re vae, Caftor pegua reta yogüeru opa opɨ̈ro jëta jare jendagüe pe yogüɨreko, jae ko filisteo reta.)

²⁴ ‘¡Tumpa jei: Pepüa jare peasa ɨ̈aka Arnón! Che ko amee pepo pe amorreo Sehón mburuvicha guasu Hesbón pegua, jare iɨvɨ. ¡Pemboɨpɨ pepɨ̈ro ɨvɨ, peñeraro jae ndive!

²⁵ Añave güive amboɨpɨta añono kɨɨye rai opaete tëta reta re pegüi; oendu yave peregua, ipɨatɨtɨta jare orɨrɨita pegüi.’

Israel iñemuña reta omoamɨri mburuvicha guasu Sehón

²⁶ Ñuu Cademot güi amondo ñee jerajaa reta ñee mbɨakatu pegua ndive Sehón mburuvicha guasu Hesbón pegua pe, körai:

²⁷ ‘Aasata ndeɨvɨ rupi apiambae reve tape güi cheakatu kotɨ ani cheasu kotɨ yepe.

²⁸ Tembíu jau vaerä eguauka cheve korepoti re, jökoraiño vi ɨ aɨu vaerä eguauka cheve korepoti re. Jaeño aiporu ndeve aasa vaerä.

²⁹ Esaú iñemuña reta Seir pe yogüɨreko vae omaeño aasa rami, jaeramiño vi Moab iñemuña reta Ar pe yogüɨreko vae rami, aasa regua ɨ̈aka Jordán oreYa Tumpa ɨvɨ omee orevea pe.’

³⁰ Ërei ngatu Sehón mburuvicha guasu Hesbón pegua mbaetɨ oipota yandemboasa iɨvɨ rupi, echa yandeYa Tumpa yepe ombopɨa täta jare jëguambae oyapo, jökorai oñono vaerä pepo pe añave regua.

³¹ Jare yandeYa jei cheve: ‘Mase, ko amboɨpɨ amee Sehón jare iɨvɨ pepo pe, peike peyemombae imbaegüe re.’

³² Jare Sehón oë oñeraro vaerä yande ndive opaete isundaro reta ndive Jahaza pe;

³³ ërei yandeYa Tumpa omee yandepo pe jare ñamoamɨri jae jare taɨ reta jare isundaro reta.

³⁴ Jayave ñapɨ̈ro jëta jare yamboai opaete tëta guasu; kuimbae reta, kuña reta, jare michia reta; mbaetɨ etei mbae yaeya.

³⁵ Jaeño ete yaeya mɨmba reta yandeyeupe, jare mbaembae reta tëta guasu reta pe ñapɨ̈rogüe.

³⁶ Aroer güive, jae ko ɨ̈aka Arnón pegua iyɨ́vɨri, ojoi oväe Galaad pe mbaetɨ metei tëta ave oasayepe yandegüi, opaetei yandeYa Tumpa omee yandepo pe.

³⁷ Jaeño ete Amón iñemuña reta iɨvɨ pe mbaetɨ yaja ñaväe, jare opaete ɨesaɨ Jaboc iyɨvɨrigua reta pe jare tëta reta ɨvɨtɨ rupigua pe, yandeYa Tumpa oyopia yandegüi vae pe.