DEUTERONOMIO 19 - Biblia Guarani Tumpa Iñee

Tëta guasu reta ñepɨ̈roka

¹ YandeYa Tumpa opa ma omboai tëtaguasu reta omee peiko vaerä pɨpe vae yave, peiko ma tëta guasu reta pe jare peiporu ma o reta yave,

² peñono tee mboapɨ tëta guasu jókuae ɨvɨ pegua, yandeYa Tumpa omee peve peiko vaerä pɨpe vae güi,

³ peyapo kavi tape reta, jókuae tëta guasu kotɨ ojo vae. Pemboyao mboapɨ yemboyao pe jókuae ɨvɨ yandeYa Tumpa omee peve vae, opaete oporoyuka vae otekuarai vaerä ojo oñepɨ̈ro pɨpe.

⁴ Kuae nunga ipuere oñepɨ̈ro joko pe: Oyemongetambae reve oporoyuka yave, jare mbaetɨ oñomotareɨ reve oyuka yave.

⁵ Yambojaanga körai: Mókoi kuimbae yogüɨraja oeka yepea; jare metei oyasɨa ramboeve yepea yɨɨ pe, yɨɨ oë iɨ güi jare oa iñeïru re, jare omano, jókuae nunga totekuarai tojo toñepɨ̈ro jókuae tëta guasu pe, güɨroasayepe vaerä jekove.

⁶ Echa mombɨrɨ yae jókuae tëta yave, oëta jókuae omano vae jëtara iyarasɨ yae reve oaɨkuemoña jókuae oporoyuka vae, jare oupitɨ yave oyukata jókuae oporoyuka vae mbaetɨ tëi teko güɨnoi vae, echa ipɨarupiä jare omotareɨ güiä ko oyuka iñeïru.

⁷ Jáeramo che poyókuai peñono tee vaerä mboapɨ tëta guasu,

⁸ yandeYa Tumpa ombotuicha yave ɨvɨ peve, jae güɨrökuavee jee re peñemuñagüe reta pe rami,

⁹ peyapo yave mborookuai reta amombeu añave peve vae, peaɨu yandeYa Tumpa jare peiko yave jemimbota rupi. Jayave pemoïru mboapɨ tëta guasu reta ñepɨ̈rokarä, mboapɨ ma tenonde peñono tee vae güi.

¹⁰ Agüɨye vaerä oyepɨyere jekombae jugüɨ, yandeYa Tumpa omee ɨvɨ pembaerä vae pe, agüɨye vaerä penoi teko tugüɨ oyepɨyere vae re.

¹¹ Kia nunga vae omotareɨ yave japicha, jare oipïaro güɨreko opüa jese regua, jare oyuka; javoi jókuae otekuarai yave jókuae tëta guasu kotɨ,

¹² jayave jëta pegua mburuvicha reta tomondo togüɨnoe joko güi, jare tomee omano vae jëtara ipo pe, omano vaerä.

¹³ Agüɨye peiparareko, jökorai agüɨye vaerä oime jekombae jugüɨ oyepɨyere vae pepɨte pe, jökorai peiko kavi vaerä.

¹⁴ YandeYa Tumpa omee ɨvɨ pevea pe peiko ma yave, agüɨye perosɨrɨ perapicha iɨvɨ jembeɨ, pemboete oñejäa ma tenonde güive oï vae.

Jupimbae reve japicha re imiari vae regua mborookuai

¹⁵ Kia nunga vae agüɨye toyemboeko mbae re, metei vae imiari reño, mbaeyoa re ani mbae nunga oyavɨ vae re. Mókoi vae ani mboapɨ vae iñee reño toyeapo jókuae ñeapo.

¹⁶ Kia nunga vae oñemopüa yave apu reve omboeko vaerä ïru vae,

¹⁷ jayave jókuae mókoi oñeapo oyoe vae toyogüɨraja yandeYa jóvai, sacerdote reta jare oporojäa vae reta jóvai, jókuae ara rupi ñogüɨnoi joko pe vae.

¹⁸ Jare oporojäa vae reta toparandu kavi yeyé; jare jókuae imiari vae yapui yave, apu reve omboekoiño japicha yave,

¹⁹ peyapo chupe jae iyemongeta pe oipota tëi oyapo japicha pe rami. Jökorai peekɨ ikavimbae pepɨte güi.

²⁰ Jare opaete oendu yave kuae oipoɨuta, jare ngaraa ye ma oyapo reta jókuae nunga ikavimbae pepɨte pe.

²¹ Agüɨye peɨ̈ro japicha omomburu vae pe: Tekove toyemboepɨ jekove pe, tesa yave toyemboepɨ jesa pe, täi yave toyemboepɨ jäi pe, ïru vae ipo yave, tomboepɨ ipo pe, ïru vae ipɨ yave tomboepɨ ipɨ pe.