DEUTERONOMIO 18 - Biblia Guarani Tumpa Iñee

Sacerdote Leví iñemuña reta imbaerä vae

¹ Sacerdote Leví iñemuña reta, ani opaete Leví iñemuña reta pe mbaetɨta oñemee ɨvɨ, Israel iñemuña reta pe oñemee rami. Yogüɨrekota mɨmba oyeyuka oyeapɨ yandeYa peguarä vae re, jare oñemee chupeguarä vae re.

² Mbaetɨta oñemee ɨvɨ chupe reta jëtara reta pe oñemee rami, yandeYa etei ko jae reta imbaeyekou, jae oñererökuavee chupe reta rami.

³ Kuae topɨta sacerdote reta imbaerä opaete vae reta omee yave mɨmba oyeyukagüe toro ani vecha, toñemee chupe reta iugüe, jañɨkagüe jare iguaogüe,

⁴ jaeramiño vi pembaagüɨyerɨpɨ güi: Trigo, vino jare olivo iasaite, jare tenondegua vecharaagüe, pevecha güi peekɨgüe toñemee chupe reta.

⁵ Echa yandeYa Tumpa ko oiparavo reta opaete ñemuña ipɨte güi, oyapo reta vaerä mbaravɨkɨ yandeYa jee re jae jare taɨ reta jekuae avei pegua.

⁶ Kia nunga tëta peikoa güi metei Leví iñemuña ipɨa-kɨ̈reɨ ngatu reve ou yave, yandeYa oiparavo jee oï pɨpea pe,

⁷ toporomborɨ yandeYa Tumpa jee re, opaete ïru jëtara levita reta oporomborɨ rami,

⁸ jare oyovake tomboresive tembíu, ïru reta ndive, oime reve güɨnoi imbaeyekou.

Yemboarakuaa teko kavimbae güi

⁹ Peike ma yave yandeYa Tumpa omee ɨvɨ pevea pe, agüɨye peyemboe peyapo mbae pɨ̈chɨi vae, jókuae tëtaguasu pegua reta jeko pɨ̈chɨi rami.

¹⁰ Agüɨye pegüi reta kia nunga vae toapɨ imichia tata pe, agüɨye vi kia toyemboe oikuaa vaerä mbaekuaa rupi maratuta kuri vae re, agüɨye perovia moroäɨvo re, ani oekɨ suerte vae ani imbaekuaa vae re,

¹¹ mɨakañɨ iyapoa, jare agüɨye ave peyembosuerteuka maratuta vae imombeúa pe, ani ichoropa vae pe, jare agüɨye kia toeka tomomiari omanogüe jekove.

¹² Echa pɨ̈chɨi yae ko yandeYa Tumpa pe kuae nunga oyapo vae, kuae nunga teko pɨ̈chɨi oyapo tëtaguasu reta jeko pegua ko yandeYa Tumpa opa omoë omombo perenonde güi.

¹³ Jáeramo peyapo ikavi vaeño yandeYa Tumpa jóvai.

¹⁴ Echa kuae tëtaguasu reta pepɨ̈rota pembaerä vae pe yogüɨreko vae, güɨrovia katu oporombosuerte vae re, jare maratuta vae imombeúa re, ërei pegüi oyopia yandeYa Tumpa kuaekuae reta.

Tumpa omombeu oimeta metei ñeemombeúa Moisés rami vae

¹⁵ YandeYa Tumpa omopüata pepɨte güi ñeemombeúa che rami vae, jese peyeapɨsaka jare peyapo jeigüe.

¹⁶ Pe peiporu yandeYa Tumpa pe ɨvɨtɨ Horeb pe rami, jókuae ara peyemboatɨ yave, körai pere: ‘Mbaetɨ ma roipota ore etei roendu oreYa iñee, ani roecha tata tuicha yae vae, agüɨye vaerä romano.’

¹⁷ Jayave yandeYa jei cheve: ‘Jaekavi ko jei reta vae.

¹⁸ Cheñeemombeúa amopüata chupe reta, jëtara reta ipɨte güi oëta metei nde rami vae; che ameeta iñeerä jare imiarita chupe reta opaete che ayókuai rami.

¹⁹ Ërei oipotagüe mbaetɨ yave oendu cheñee reta, jae jei cheree re vae, che aiporuta chupe oï kavi vaerä che ndive.

²⁰ Ërei metei ñeemombeúa oyembotuicha reve imiari yave cheree re, che mbaetɨ ayókuai reve imiari yave, ani imiari yave tumpa ambuae vae reta jee re, jókuae nunga ñeemombeúa tomano.’

²¹ Jare pere yave pepɨa pe: ‘¿Këraita pa yaikuaa Tumpa iñeeä ko imiari oï yandeve vae?’

²² Jókuae ñeemombeúa imiari yave Tumpa jee re, jare mbaetɨ yave oyembopo jeigüe, jókuae ñee jeigüe Tumpa iñeeä ko, oyembotuicha güiño ko imiari jókuae ñeemombeúa; agüɨye pekɨɨye chugüi.