DEUTERONOMIO 16 - Biblia Guarani Tumpa Iñee

Arete reta año ñavo vae

¹ Yasɨ Abib pe, peyapo arete Pascua yandeYa Tumpa pe, echa yasɨ Abib pe jókuae pɨ̈tu yandeYa Tumpa perenoe ɨvɨ Egipto güi.

² Pascua iara pe pemee guaka jare vecha yandeYa Tumpa pe, jókuae jae oiparavo jee oïta pɨpea pe.

³ Agüɨye peu mɨmba oyeyukagüe ndive mbɨyape oyembovugüe, chiu ara peu mbɨyape oyembovumbae, mbɨyape mbɨatɨtɨ pegua, echa mbaetɨ peë pɨagüive ɨvɨ Egipto güi, kuae ko pemaendúa vaerä opaete ara rupi kërai peë ɨvɨ Egipto güi vae re.

⁴ Chiu ara agüɨye toyekuaa mbɨyape imbovúa opaete peɨvɨ rupi, jare tenondegua ara kaaru yave peyuka vae isoogüe agüɨye topɨta pɨareve peguarä.

⁵ Agüɨye pemee mɨmba oyeyuka Pascua pe vae oipotagüe tëta yandeYa Tumpa omee pevea pe.

⁶ Jaeño yandeYa Tumpa oiparavo jee oïta pɨpea pe, jare kaaru yave pemee, echa jókuae ora ko peë Egipto güi,

⁷ soo pemeegüe peuta jókuae yandeYa Tumpa oiparavo jee oïta pɨpea pe, jare pɨareve pe peyerova yeta peo perëta kotɨ.

⁸ Ova ara peu mbɨyape oyembovumbae, jare chiúa ara pe peyemboatɨ arete ikavi yae vae peyapo vaerä yandeYa Tumpa peguarä, agüɨye mbae nunga mbaravɨkɨ peyapo jókuae ara.

⁹ Chiu semana ma oasa yave, jókuae ara pemboɨpɨ peipoo trigo güive,

¹⁰ peyapo arete ikavi yae vae semana regua yandeYa Tumpa pe, jare pemee mbota yandeYa Tumpa pe pekɨ̈reɨ ngatu reve jókuae iporerekua peré vae penoi rupi.

¹¹ Jare peyapo arete yandeYa Tumpa jóvai, peraɨ jare perayɨ reta, perembiokuai kuimbae jare perembiokuai kuña, Leví iñemuña reta yogüɨreko perëta guasu pe vae, jare ketɨgua, tɨ̈reɨ, imemano vae yogüɨreko pepɨte pe vae ndive, jókuae yandeYa Tumpa oiparavo jee oï vaerä pɨpea pe.

¹² Pemaendúa peikose tembiokuai ɨvɨ Egipto pe vae re, jáeramo peyapo kuae mborookuai reta.

¹³ Opa pearɨvo trigo jare peitɨami uva yave, peyapo arete ikavi yae vae chiu ara, o ñairaka pegua iyarete.

¹⁴ Peyerovia kuae arete pe, peraɨ reta jare perayɨ reta, perembiokuai kuimbae jare perembiokuai kuña, Leví iñemuña reta, ketɨgua, tɨ̈reɨ, jare imemano vae yogüɨreko pepɨte pe vae ndive.

¹⁵ Chiu ara peyapo arete yandeYa Tumpa peguarä, jókuae jae oiparavo jee oï pɨpea pe, echa jae iporerekuata peré, opaete pembaagüɨye rupi jare opaete mbae peyapo vae rupi, jare peyerovia yaeta.

¹⁶ Opaete kuimbae reta toyogüeru mboapɨ vese año pe yandeYa Tumpa jóvai, jókuae jae oiparavo jee oï pɨpea pe: Arete mbɨyape oyembovumbae pegua pe, arete semana vae pe, jare o ñairaka pegua iyarete pe. Agüɨye etei kia tou ipogüɨrai yandeYa jóvai,

¹⁷ metei ñavo togüeru mbota, yandeYa iporerekua rupi güɨnoigüe.

Ñeapo regua mborookuai reta

¹⁸ Peñono mburuvicha oporojäa vae reta jare imborɨka reta perëta guasu ñavo rupi, yandeYa Tumpa omee ñemuña reta ñavo pe vae, jae reta toporojäa jupi rupi.

¹⁹ Agüɨye perokomegua jupi vae; agüɨye etei pemboyoavɨ metei vae ïru ndive, echa jókuae nunga güɨrokomegua yarakuaa vae reta jare jupi vae reta.

²⁰ Pemomoe avei jupi vaeño, peikove vaerä jare oiko vaerä pembaerä ɨvɨ yandeYa Tumpa omee peve vae.

²¹ Agüɨye peñotɨ ɨvɨra tumpa-raanga Asera pemboete vaerä, agüɨye vi peñono yandeYa Tumpa pegua mɨmba oyeyuka oyeapɨ jese vae iyɨpɨ pe.

²² Agüɨye vi pemopüa peyeupe mbae iä, jókuae nunga yandeYa Tumpa omotareɨ ko.