DEUTERONOMIO 15 - Biblia Guarani Tumpa Iñee

Año ñɨ̈ro pegua

¹ Chiu año ñavo peɨ̈ro ipía peve vae pe.

² Körai peɨ̈ro: Japicha pe mbae oiporuka vae tiñɨ̈ro jókuae ombaeporu vae pe, agüɨye peyaporai perapicha ani perëtaɨgua omboepɨ vaerä peve, echa oñemoërakuata ñɨ̈ro mbia regua yandeYa iporookuai rupi.

³ Ketɨgua ombaeporu peve vae pe pemboepɨuka oiporugüe, ërei perëtaɨgua pe peɨ̈ro pembae oiporugüe re.

⁴ Jökorai agüɨye vaerä oime paravete vae pepɨte pe, echa yandeYa Tumpa ko iporerekua peré jókuae ɨvɨ omee peve peiko vaerä pɨpea pe,

⁵ peendu yave yandeYa Tumpa iporookuai reta jare peyapo yave jae jei vae añave poyókuai aï jese vae.

⁶ YandeYa Tumpa iporerekuata peré jae jei rami, jare jeta yaeta penoi mbaembae peiporuka vaerä ïru tëtaguasu reta pe, ërei pe mbaetɨta pembaeporu, penoita mbaepuere tëtaguasu reta re; ërei peré mbaetɨta kia ave güɨnoi mbaepuere.

Paravete vae reta ombaeporu vae regua

⁷ Oime yave paravete vae pepɨte pe yandeYa Tumpa omee ɨvɨ pevea pe, agüɨye pepɨa täta pemborɨ vaerä perëtara paravete vae;

⁸ jaeño pepɨakavi ikotɨ jare peiporuka chupe oipota vae.

⁹ Peyeandu agüɨye vaerä oime yemongeta ikavimbae pepɨa pe, jare pere: ‘Köiño ma año chiúa oime vaerä ñɨ̈ro opaete mbia reta re.’ Jare perova arasɨ pemae perëtaɨgua paravete vae re, jare mbaetɨ mbae peiporuka chupe, echa jae ipuere oñeapo peré yandeYa pe jare jae omaeta peré, iyoa vae.

¹⁰ Pemee chupe yave pemee peräkateɨmbae reve, echa kuae peyapogüe re jare pemee vae re yandeYa Tumpa iporerekuata peré.

¹¹ Echa paravete vae oime aveita ɨvɨ pe, jáeramo che poyókuai pepɨakavi vaerä perëtara paravete vae pe peɨvɨ pe.

Mborookuai reta tembiokuai regua

¹² Perëtara hebreo oñemee yave peve, kuimbae ani kuña, jaeño toyeokuai peve ova año, chiúa pe peyora.

¹³ Jare peyora yave, agüɨye pemondo ipogüɨrai,

¹⁴ pemee chupe mɨmba perɨmba güi, pembaagüɨye güi jare vino, pemboyaota jae ndive yandeYa iporerekua rupi penoi vae.

¹⁵ Pemaendúa peikose tembipɨɨ Egipto pe vae re, jare yandeYa Tumpa perenoe. Jáeramo che amee peve kuae mborookuai.

¹⁶ Ërei perembiokuai ñäteɨ yave pereeya, echa peraɨu jare pero pegua reta, echa pereko kavi.

¹⁷ Jayave, mbae pemombu pɨpe vae peruta jare pemboyata öke re javoi inambi pemombu chugüi, jare toiko perembiokuairä jekuae avei pegua. Jökoraiño vi peyapo perembiokuai kuña.

¹⁸ Agüɨye peyembopɨa täta peyora vaerä perembiokuai, echa ova año rupi pemongana kavi jae ndive mókoi tembiokuai pemboepɨ vaerägüe, jare yandeYa Tumpa tiporerekua peré opaete peyapogüe rupi.

Mɨmba imembɨrɨpɨ kuimbae oñeñono tee Tumpa pegua vae

¹⁹ Opaete perɨmba guaka jare pevecha imembɨrɨpɨ kuimbae peñono tee yandeYa Tumpa peguarä. Agüɨye pemombaravɨkɨ toro membɨrɨpɨ, jare vecha kuimbae membɨrɨpɨ agüɨye peñapi.

²⁰ Año ñavo yandeYa Tumpa jóvai peuta opaete pero pegua reta ndive, jókuae jae oiparavo jee oïta pɨpea pe.

²¹ Ërei oime yave jete mbaetɨ ikavi, iköcho, ani jesakuape, ani mbae oata chupe, jayave agüɨye pemee yandeYa pe.

²² Jókuae nunga peu perëta peño; oipotagüe ikɨa vae ani ikɨambae oï Tumpa jóvai vae ipuere jou, guasu ani guasukaka isoogüe rami.

²³ Jaeño ete agüɨye peu jugüɨ, pepɨyere ɨvɨ pe ɨ rami.