DEUTERONOMIO 14 - Biblia Guarani Tumpa Iñee

¹ Pe jae ko yandeYa Tumpa taɨ reta. Agüɨye pembopere perete, agüɨye peñeapi kia omano yave.

² Echa pe tëta oñeñono tee yandeYa Tumpa pe vae ko, jae ko peparavo imbaerä opaete tëta reta ɨvɨ pegua güi.

Mɨmba reta oyeu vae jare oyeumbae

³ Agüɨye peu mɨmba oyeumbae.

⁴ Kuae jae mɨmba reta pepuere peu vae: Güeye, vecha, kavara,

⁵ guasukaka, guasu, jare ïru guasu rami vae reta, kavara ñanaɨgua jare vecha ñanaɨgua.

⁶ Pepuere peu opaete mɨmba ipɨ̈sa jakambɨ vae, jembíu omboyevɨ vae.

⁷ Ërei mɨmba jembíu omboyevɨ vae ani ipɨ̈sa jakambɨ vae, agüɨye peu: Camello, tapiti, tapiti tïi vae, echa yepe tëi omboyevɨ jembíu ërei mbaetɨ ipɨ̈sa jakambɨ, peumbae vaerä toyogüɨreko.

⁸ Kuchi, echa ipɨ̈sa jakambɨ ërei mbaetɨ jembíu omboyevɨ. Peumbae vaerä pereko. Agüɨye peu isoo, jëogüegüe re ave agüɨye pepoko.

⁹ Opaete ɨ rupigua pepuere peu, opaete ipepo raɨ güɨnoi vae jare ipire vae.

¹⁰ Ërei agüɨye peu mbaetɨ güɨnoi ipepo raɨ vae jare ipire vae, peumbae vaerä toyogüɨreko.

¹¹ Opaete güɨra oyeu vae pepuere peu.

¹² Ërei kuae reta agüɨye peu: Güɨraké, güɨraké guasu, güɨrakeovɨ,

¹³ guäpi, jare oipotagüe güɨraké ambuaeyee yee vae,

¹⁴ oipotagüe uruapúa reta,

¹⁵ yandu, suinda, güɨra ɨ rupigua, jare oipotagüe kirikiri ambuaeyee yee vae,

¹⁶ surumbukuku, güɨratï reta, patu ganso,

¹⁷ güɨratï, ururutï, kärau rami vae reta,

¹⁸ güɨratï, jare oipotagüe güɨratï ambuaeyee ye vae, güɨra iyatɨra vae jare andɨra.

¹⁹ Opaete mbae michi raɨ vae ipepo vae reta oyeumbae vaerä toyogüɨreko. Agüɨye peu.

²⁰ Opaete güɨra oyeu vae pepuere peu.

²¹ Agüɨye mɨmba omanoiño vae peu, echa pe ko tëta oñeñono tee yandeYa Tumpa peguarä vae, ërei pepuere pemee ketɨgua yogüɨreko pepɨte pe vae pe, jae reta ipuere jou, jare ketɨgua oasa jokoropi vae pe pepuere pemee. Agüɨye kavara raɨ isoogüe pemboyɨ ichɨ ineche pe.

Mborookuai reta diezmo regua

²² Oatambae reve, año ñavo pembaagüɨye reta güi pembosɨrɨta payandepo güi metei.

²³ Jare jókuae payandepo güi metei vae peuta yandeYa Tumpa jóvai jae oiparavo jee oikotaa pe, payandepo trigo vae güi metei, jökoraiño vi vino jare olivo iasaite, jare opaete perɨmba imembɨrɨpɨ reta, jökorai peikuaa vaerä pemboete avei yandeYa Tumpa.

²⁴ Jare mombɨrɨ yae oï pegüi yandeYa Tumpa oiparavo jee oï vaerä pɨpe vae yave, yavaita peraja yandeYa Tumpa iporerekua peregüe penoi vae yave,

²⁵ pemee korepoti re, jare jókuae jepɨgüe peraja yandeYa Tumpa oiparavoa pe.

²⁶ Jókuae korepoti re pegua peipota vae: Guaka, vecha, vino, mbae oporombosavaɨpo vae, ani oipotagüe pekɨ̈reɨ pegua vae, peu yandeYa Tumpa jóvai jare peyerovia opaete pero pegua ndive.

²⁷ Agüɨye pemombo Leví iñemuña reta pepɨte pe yogüɨreko vae, echa chupe reta mbaetɨ oñemee ɨvɨ peve oñemee rami.

²⁸ Mboapɨ año oasa ñavo, pembaagüɨye reta güi pembosɨrɨta payandepo güi metei jókuae año pegua, jare peñovatu perëta guasu rupi,

²⁹ jare yogüeru Leví iñemuña reta yave, echa kuae reta pe mbaetɨ oñemee ɨvɨ peve oñemee rami, ani ketɨgua yogüɨreko pepɨte pe vae, ani tɨ̈reɨ jare imemano vae oiko perëta pe vae, tokaru jare tijɨ̈vɨata. Jökorai yandeYa Tumpa iporerekua vaerä peré opaete mbae peyapo vae rupi.