DEUTERONOMIO 12 - Biblia Guarani Tumpa Iñee

O mbaemboetea jae vaeño

¹ Kuae ko jae mborookuai reta oyeapo peve peyapo vaerä opaete ara peikove peiko ramboeve jókuae ɨvɨ pe, yandeYa Tumpa omee peñemuñagüe reta pe vae pe.

² Pemboai opaete mbaemboete renda tëtaguasu reta pepɨ̈rota vae itumpa-raanga reta oyeokuai reta chupe vae jenda; ɨvɨtɨ ɨvate vae re ñogüɨnoi vae, jare jɨsɨ re ñogüɨnoi vae, jare opaete ɨvɨra iküaraɨa kavi yae vae igüɨ rupigua.

³ Pemboai mɨmba oyeyuka oyeapɨ jese vae jae reta imbae jare peyoka itumpa-raanga reta, peapɨ tata pe Asera iä, jare opa pemboai omopöra tumpa-raanga oyapogüe iä, jare opa pemokañɨtei jee joko güi.

⁴ Agüɨye jökorai pemboete yandeYa Tumpa.

⁵ Jae oiparavota ɨvɨ opaete ñemuña reta ipɨte güi joko pe jee oï vaerä, joko peño peota pemboete.

⁶ Joko pe perajata pemee mɨmba oyeyuka opaetei oyeapɨ vae, mɨmba oyeyukagüe, pediezmo reta, mbota oñererökuavee vae, ñererökuavee pegua, mbota kɨ̈reɨ ngatu pegua, jare peguaka reta imembɨrɨpɨ, jare pevecha reta imembɨrɨpɨ.

⁷ Joko pe pekaru yandeYa Tumpa jóvai, jare peyerovia katu pero pegua reta ndive peparavɨkɨagüe re, yandeYa Tumpa iporerekua peré vae rupi.

⁸ Joko pe agüɨye mo peyapo pepɨa jemimbota, añave kuae pe yayapo rami.

⁹ Echa añave mbaetɨño vɨteri peike mbutuu pe, yandeYa Tumpa omee ɨvɨ pevea pe.

¹⁰ Ërei peasa ma Jordán jare peiko ma yandeYa Tumpa omee ɨvɨ pevea pe yave, jae omeeta peve mbutuu opaete peɨvɨrigua tovaicho reta güi, jare peiko pɨagüiveta,

¹¹ jayave, yandeYa Tumpa oiparavo jókuae jee oï vaerä pɨpe vae pe perajata opaete che poyókuai jese vae: Mɨmba oyeyukata opaetei oyeapɨ vae, mɨmba oyeyukagüe, pediezmo reta, mbota oñererökuavee vae, opaete peiparavo mbota ñererökuavee pegua pemee yandeYa pe vae.

¹² Jare peyerovia yandeYa Tumpa jóvai, pe, peraɨ reta, perayɨ reta, perembiokuai kuimbae reta jare perembiokuai kuña reta, jare Leví iñemuña reta yogüɨreko pepɨte pe vae, echa chupe reta mbaetɨ oñemee ɨvɨ, peve oñemee rami.

¹³ Peyeandu agüɨye vaerä pemee mɨmba oyeyuka opaetei oyeapɨ vae oipota rupi peecha ikavía pe;

¹⁴ jaeño yandeYa oiparavo ɨvɨ metei ñemuña iɨvɨ pe vae pe. Joko pe pemee mɨmba oyeyuka opaetei oyeapɨ vae jare joko pe peyapota opaete che poyókuai vae.

¹⁵ Ërei ngatu pepuere pembaeyuka jare peu soo opaete perëta ñavo rupi, pekɨ̈reɨ rupi, yandeYa Tumpa iporerekua peregüe penoi rupi. Oipotagüe ikɨa vae ani ikɨambae oï Tumpa jóvai vae pepuere peu, guasu jare guasukaka isoogüe rami.

¹⁶ Jaeño ete jugüɨgüe agüɨye peu, pepɨyere ɨvɨ re ɨ rami.

¹⁷ Agüɨye peu perëta pe pediezmo, trigo jäɨgüe, vino ani olivo iasaite, peguaka imembɨrɨpɨ ani vecha imembɨrɨpɨ, ani peñererökuavee pemee vaerä vae ani mbota kɨ̈reɨ ngatu reve oñemee vae, ani mbota oñererökuavee vae.

¹⁸ Jaeño pepuere peyapo yandeYa Tumpa jóvai, jókuae jae oiparavoa pe, joko pe, pe jare peraɨ, perayɨ, perembiokuai kuimbae jare perembiokuai kuña reta, jare Leví iñemuña reta yogüɨreko pepɨte pe vae ndive, peyerovia katu peparavɨkɨagüe re yandeYa Tumpa jóvai.

¹⁹ Peyeandu agüɨye vaerä pemombo Leví iñemuña reta, peikove peiko ramboeve jókuae ɨvɨ pe.

²⁰ YandeYa Tumpa ombotuicha yave peɨvɨ, jae jei peve rami, pekɨ̈reɨ peu soo yave, pepuere peu pekɨ̈reɨ rupi.

²¹ Mombɨrɨ oï pegüi yave yandeYa Tumpa oiparavo ɨvɨ jee oï vaerä pɨpe vae, pepuere peyuka peguaka jare pevecha yandeYa omee peve vae, jare pekaru perëta pe pekɨ̈reɨ peu rami, che poyókuai rami.

²² Guasu jare guasukaka isoogüe oyeu rami; ikɨa ani ikɨambae oï Tumpa jóvai vae ipuere jou.

²³ Jaeño agüɨye peu jugüɨgüe, echa tugüɨ jae ko tekove, jayave agüɨye peu soo tekove ndive.

²⁴ Agüɨye peu, pepɨyere ɨvɨ re ɨ rami.

²⁵ Agüɨye peu, peiko kavi vaerä pe jare peraɨ peraɨkue rupi, peyapo yave jupi vae yandeYa jesa róvai.

²⁶ Ërei mbae peñono tee, jare peñererökuavee pemee vaerä Tumpa pe vae, peru jókuae yandeYa oiparavoa pe,

²⁷ jare joko pe pemee mɨmba oyeyukagüe opaetei oyeapɨ vae. Mɨmba oyeyukagüe jugüɨ toyepɨyere mɨmba oyeapɨ jese vae re yandeYa imbae re, ërei isoogüe pepuere peu.

²⁸ Peendu jare peyapo opaete poyókuai vae, pe jare peraɨ reta peiko kavi avei vaerä, jupi vae jare sɨmbi vae peyapo yave yandeYa Tumpa jesa róvai.

Yeandu reta tumpa-raanga imboete kotɨ

²⁹ YandeYa Tumpa opa ma omboai perenonde güi tëtaguasu reta yave, jókuae peota pepɨ̈ro peiko vaerä pɨpe vae,

³⁰ peyeandu agüɨye vaerä pemomoe jókuae tëtaguasu reta jeko, ani peyemboya itumpa reta re pemboete vaerä pere reve: Kuae reta omboete vae tamboete vi.

³¹ Agüɨye jökorai peyapo yandeYa Tumpa pe, echa opaete mbae ikavimbae yandeYa güɨröɨro vae, jae reta oyapo itumpa reta pe, echa taɨ jare tayɨ reta ave oapɨ tata pe itumpa reta peguarä.

³² Peyapo avei opaete poyókuai vae, pemoïrumbae reve ani peekɨmbae reve.