DEUTERONOMIO 11 - Biblia Guarani Tumpa Iñee

YandeYa tuicha yae ko vae

¹ Peaɨu yandeYa Tumpa, peyapo opaete iporookuai reta ara ñavo.

² Peikuaa añave yandeYa Tumpa iporombosɨmbi re, peraɨ reta mbaetɨ oikuaa jare mbaetɨ vi oecha. Peikuaa yandeYa Tumpa iporonupa, tuicha yae vae, imbaepuere yae vae jare ipo oporoiämondo yae vae,

³ mɨakañɨ reta Egipto pe oyapo vae, Faraón mburuvicha guasu Egipto pegua pe jare opaete iɨvɨ pegua reta pe vae re,

⁴ jare kërai oyapo Egipto pegua sundaro reta pe vae, ikavayu reta jare ikäretou reta pe, opa Ɨguasu Pɨ̈ta vae pegua pe oyasoi yogüeru reta tëi peraɨkue yave. YandeYa opa omokañɨtei reta.

⁵ Pemaendúa vi kërai mbae oyapo peve ñuu pe vae re, peyu regua peväe kuae pe,

⁶ Datán jare Abiram pe oyapo vae, jae ko Eliab taɨ reta Rubén iñemuña reta, kërai ɨvɨ oyepeka chupe reta jare opa oa pɨpe jo pegua reta ndive, jare opaete mbaembae güɨnoigüe ndive Israel iñemuña reta perovake.

⁷ Pe reta etei ko peecha opaete mbaembae tuichagüe yandeYa oyapo vae.

Mbaeyekou reta ɨvɨ kavi pe

⁸ Peyapo opaete mborookuai reta amombeu añave peve vae, penoi vaerä mbaepuere jare peike pepɨ̈ro ɨvɨ peota peiko pɨpe vae.

⁹ Jare peiko vaerä jeta ara jókuae ɨvɨ pe, yandeYa güɨrökuavee ɨvɨ kavi peñemuñagüe reta pe jare iñemuña reta pe vae pe.

¹⁰ Peiketa pepɨ̈ro ɨvɨ vae mbaetɨ ko ɨvɨ Egipto pegua rami, jókuae peyu chugüi vae pe, pemaetɨ yave temitɨ pemboɨu yepi pepɨ re, ko raɨ pe rami,

¹¹ ërei jókuae ɨvɨ peasata pepɨ̈ro vae ɨvɨtɨ yae jare ɨvɨpe ñäkɨ ngatu vae ko, oɨu ama okɨgüe pe vae.

¹² Jae ko ɨvɨ yandeYa Tumpa etei oyangareko jese vae, año oyemboɨpɨ güive año opa regua.

¹³ Peyapo yave mborookuai reta amombeu añave peve vae, peaɨu reve yandeYa Tumpa jare peyeokuai reve chupe opaete pepɨa ndive, opaete perekove ndive,

¹⁴ jae ombouta peɨvɨ re ama, iara pe kavi, tenondegua ama jare taɨkuegua ama mbaetɨta oata, pearɨvo vaerä trigo jäɨ, uva tɨɨgüe jare olivo iasaite.

¹⁵ Omeeta vi ñana reta jokɨ vaerä perɨmba reta peguarä, pekaruta jare perɨ̈vɨatata.

¹⁶ Ërei peyeandu, agüɨye vaerä pepɨa jopa, jare pepia tumpa ambuae reta pe peyeokuai, jare pemboete peyetavatɨka reve.

¹⁷ Echa yandeYa iyarasɨta pekotɨ, jare oyopiata ama ara güi agüɨye vaerä oime mbaagüɨye ɨvɨ pe, jare opa pekañɨtei ɨvɨ kavi yandeYa omee peve vae güi.

¹⁸ Jáeramo, peñono kuae ñee reta pepɨa pe, jare peñapɨti ikañɨmaa vaerä pepoapɨ re jare peresɨva re.

¹⁹ Pemboe peraɨ reta, pemiari jese chupe reta peguapɨ peï pero pe yave, peguataa rupi, peyapakuata yave, jare pepüa ye yave.

²⁰ Peikuatía pero pe okɨta reta re, jare peröke re,

²¹ pe jare peraɨ reta peiko puku vaerä ɨvɨ pe, yandeYa güɨrökuavee jee re peñemuñagüe reta pe omee vaerä vae pe, ara oiko avei ɨvɨ iárambo rami.

²² Peyapo kavi yave opaete mborookuai jei vae che amombeu añave peve vae, jare peaɨu yave yandeYa Tumpa peguata reve pemboe vae rupi jare jupi rupi,

²³ yandeYa omoëta vi omombo perenonde güi opaete tëtaguasu reta, jare pe pepɨ̈rota tëtaguasu reta tuicha yae jare imbaepuere yae pegüi vae.

²⁴ Opaete ɨvɨ pepɨ̈rota jese vae pembaerä ko. Ñuu güive ojoi oväe Líbano pe, ɨ̈aka Éufrates güive ojoi oväe Ɨguasu Mediterráneo kotɨ oï vae pe, ɨvɨ pembaerä ko.

²⁵ Ngaraa etei kia ipuere peré, yandeYa Tumpa oñonota kɨɨye jare orɨrɨi vaerä pegüi opaete ɨvɨ rupi peoa rupi, jae jei peve rami.

²⁶ Mase, ko añono añave peve peiparavo vaerä mborerekua ani yepopeyu.

²⁷ Penoita mborerekua, peyapo yave yandeYa Tumpa iporookuai reta, che amombeu añave peve vae.

²⁸ Peikota yepopeyu rupi, mbaetɨ yave peyapo yandeYa Tumpa iporookuai reta jare pepia yave pomboe añave jese vae güi, pemboete vaerä tumpa ambuae reta peikuaambae.

²⁹ YandeYa Tumpa pereroike ma yave ɨvɨ pepɨ̈rota peiko pɨpe vae pe, peñono mborerekua ɨvɨtɨ Gerizim re, jare yepopeyu ɨvɨtɨ Ebal re.

³⁰ Kuae ɨvɨtɨ reta ñogüɨnoi ko Jordán jovaicho pe, tape kuaraɨ oikea kotɨ rupi oasa vae iyɨ́vɨri rupi kutɨ ñogüɨnoi vae, cananeo reta iɨvɨ pe, Arabá Gilgal jóvai yogüɨreko vae reta, ɨvɨra encinarupa More pegua güi köiño.

³¹ Echa pe jaema peasata Jordán peo vaerä pepɨ̈ro ɨvɨ yandeYa Tumpa omee peve vae, pepɨ̈ro jare peiko ma pɨpe yave,

³² peyapo opaete mborookuai reta oyeapogüe, añave che amee peve vae.