DEUTERONOMIO 10 - Biblia Guarani Tumpa Iñee

Morogüɨrökuavee päve oyembopɨau

¹ Jókuae ara rupi yandeYa jei cheve: ‘Eñopa ndeyeupe mókoi ita ipe vae tenonde vae rami, jare eyapo vi ndeyeupe käjou ɨvɨra pegua jare eyeupi ɨvɨtɨ re nemiari vaerä che ndive.

² Jare che aikuatiata jókuae ita ipe vae re, ñee reta tenondegua re oï vae, jókuae opa reyoka vae regua, jare eñono käjou pe.’

³ Jayave ayapo käjou ɨvɨra käti pegua, jare añopa mókoi ita ipe vae tenonde vae rami jare ayeupi ɨvɨtɨ re araja reve ita ipe vae chepo pe.

⁴ Jare yandeYa oikuatía ita ipe vae re, payandepo mborookuai reta tenonde yave omombeu peve ɨvɨtɨ jendɨ vae güi opaete peyemboatɨ yave vae, jare omee cheve.

⁵ Agüeyɨ ɨvɨtɨ güi, jare ita ipe vae añono käjou ayapogüe pe, yandeYa cheokuai rami, jare oime ñogüɨnoi pɨpe.

⁶ (Jaɨkue rupi Israel iñemuña reta ñogüɨnoe Beerot-bene-jaacán güi Mosera kotɨ. Joko pe Aarón omano, joko pe oñeotɨ, jare jekovia pe opɨta sacerdoterä taɨ Eleazar.

⁷ Joko güi yogüɨraja reta Gudgoda kotɨ, jare Gudgoda güi Jotbata kotɨ, ɨvɨ ɨ katu vae pe.

⁸ Jókuae ara rupi yandeYa oiparavo Leví iñemuña reta, güɨraja vaerä käjou morogüɨrökuavee päve pegua, jare ñogüɨnoi vaerä yandeYa jóvai oyeokuai reta vaerä chupe, jare jei vaerä ñee kavi yandeYa jee re, añave rupi oyapo rami.

⁹ Jáeramo Leví iñemuña reta mbaetɨ güɨnoi ɨvɨ imbaerä jëtara reta ipɨte pe, jae reta imbae ko yandeYa etei; yandeYa Tumpa jei chupe reta rami.)

¹⁰ Jare che aiko ɨvɨtɨ re tenonde yave aiko rami, cuarenta ara jare cuarenta pɨ̈tu, oendu yandeYa cheve cheyerure jare mbaetɨ pemboai.

¹¹ Jare jei yandeYa cheve: ‘Epüa jare egüeyɨ ekua, reguata vaerä opaete vae reta jenonde, peike vaerä pepɨ̈ro ɨvɨ amombeu peñemuñagüe reta pe vae.’

Tumpa oporookuai

¹² Añave Israel iñemuña reta, ¿mbae pa oiporu pegüi yandeYa Tumpa? Jaeño peipoɨu yandeYa Tumpa güi, peguata opaete jemimbota rupi jare peaɨu, jare peyeokuai yandeYa Tumpa pe opaete pepɨa ndive, opaete perekove ndive,

¹³ peyapo avei yandeYa iporookuai reta amombeu añave peve vae, peiko kavi vaerä.

¹⁴ Mase, yandeYa Tumpa imbae ko ara, jare ara ɨvate yae vae jare ɨvɨ, jare opaete mbaembae oï pɨpe vae.

¹⁵ YandeYa ipɨakatu jare iporoaɨu peñemuñagüe reta re, jaɨkue rupi iñemuña reta oiparavo, jae ko pe reta, opaete tëta reta güi añave peecha rami.

¹⁶ Peyembocircuncida pepɨa pe, jare agüɨye mo peyembopɨa täta,

¹⁷ echa yandeYa Tumpa güɨnoi mbaepuere tumpa-raanga reta güi, jare imbaepuere yae ete mbaepuere güɨnoi vae reta güi, Tumpa tuicha yae vae jare imbaepuere yae vae, mbaetɨ oporomboyoavɨ jare mbaetɨ oipɨɨ vɨari mbae oyemboepɨ vɨarigüe;

¹⁸ oyapo jupi vae tɨ̈reɨ pe jare imemano vae pe; oaɨu ketɨgua, omee chupe tembíu jare temimonde.

¹⁹ Peaɨu ketɨgua; echa pe reta peikose ketɨgua ɨvɨ Egipto pe.

²⁰ YandeYa Tumpa güiño peipoɨu, chupeño peyeokuai, jeia reño peiko, jare jae jee reño opaete mbae peyapo.

²¹ Echa ikotɨño ko penoita opaete mbaemboete, jaeño ko peTumpa, oyapo peve opaete kuae mbaembae tuicha yae vae jare mɨakañɨ reta peecha vae.

²² Peñemuñagüe reta yogüɨraja setenta kuimbae Egipto kotɨ, jare añave yandeYa Tumpa pembojeta yeyé yasɨtata rami.