DEUTERONOMIO 1 - Biblia Guarani Tumpa Iñee

Moisés omomaendúa Israel iñemuña reta Horeb pe yandeYa oyapo morogüɨrökuavee reta vae re

¹ Jae ko kuae ñee reta Moisés jei opaete Israel iñemuña reta pe, Jordán güi kuaraɨ oëa kotɨ ñuu Arabá pe, Ɨguasu Pɨ̈ta vae jóvai; ɨvɨ Parán, Tofel, Labán, Hazerot jare Dizahab ipäu pe.

² Once ara yaguata Horeb güi Cades-barnea kotɨ, ɨvɨtɨ Seir rupi tape ojo vae rupi.

^3-4 Cuarenta añoa pe, yasɨ oncea pe, tenondegua ara pe opa güire Moisés omoamɨri Sehón, amorreo reta juvicha guasu Hesbón pegua, jare Og, Basán pegua mburuvicha guasu, Astarot pegua ɨvɨ Edrei pe, Moisés omombeu Israel iñemuña reta pe, opaete mbaembae Tumpa oyókuai jae reta oyapo vaerä vae.

⁵ Jordán güi kuaraɨ oëa kotɨ, ɨvɨ Moab pe ñogüɨnoi yave, Moisés omboɨpɨ omombeu kuae mborookuai:

⁶ “YandeYa Tumpa jei yandeve Horeb pe, körai: ‘Ɨma yae ma peiko kuae ɨvɨtɨ rupi.

⁷ Peyupavo jare pekua amorreo reta iɨvɨ ɨvɨtɨ katuai vae rupi, jare opaete iyɨ́vɨri rupigua ɨvɨ rupi: Arabá pegua ɨvɨtɨ katuai vae rupi, ñuu rupi, jare Neguev rupi, Ɨguasu Mediterráneo jembeɨ rupi, cananeo reta iɨvɨ pe jare Líbano, ɨ̈aka guasu Éufrates kotɨ peväe regua.

⁸ Mase, che ko amee peve jókuae ɨvɨ, peike pepɨ̈ro ɨvɨ che peYa añererökuavee amee vaerä peñemuñagüe Abraham, Isaac jare Jacob pe vae, jare jaɨkue rupigua iñemuña reta pe vae.’

Mburuvicha oporojäa vae reta oyeparavo vae regua

⁹ Jókuae ara rupi che jae peve: ‘Che aeño ngaraa chepuere pogüɨroata.

¹⁰ YandeYa Tumpa jeta yae ma pemoñemuña, jeta yae ma peiko yasɨtata rami.

¹¹ ¡YandeYa, peñemuñagüe reta iTumpa tomee peñemuña jeta ye añave vae güi, jare tiporerekua peré oñererökuavee peve rami!

¹² Ërei, ¿këraita pa che aeño araja peyemoambeko reta, mbaemboavai reta jare peñeapo reta?

¹³ Pemee pepɨte güi, ñemuña ñavo güi, kuimbae reta yarakuaa katu vae jare oikuaa kavi yae ma mbae vae, añono vaerä peve petenondeguarä.’

¹⁴ Jare pe pere cheve: ‘Ikavi yae jókuae rere oreve vae.’

¹⁵ Jayave aipɨɨ ñemuña ñavo güi kuimbae yarakuaa katu vae, jare jäta ngatu vae, añono petenondeguarä, amogüe mil vae re, ïru cien vae re, cincuenta vae re jare payandepo vae re, jare amogüe reta ñemuña ñavo re.

¹⁶ Ayókuai vi peruvicha oporojäa vae reta, oporojäa vaerä peré, perëtara reta re jare ketɨgua reta re.

¹⁷ Oporojäa vaerä oporoparavombae reve; oyeapɨsakata paravete vae re jare oikokatu vae re, mbaetɨ eteita kia güi okɨɨye, echa Tumpa etei ko oporojäa. Jare yavai yae teko yave peruta cheve, che ayapo vaerä.

¹⁸ Jökorai jókuae ara rupi amee mborookuai opaete vae pe oyapo vaerä.

Doce vae reta yogüɨraja omae ɨvɨ re vae

¹⁹ Jare Horeb güi ñaë yave, yaguata opaete jókuae ñuu tuicha jare yavaetegüe rupi, amorreo reta iɨvɨ ɨvɨtɨ katuai vae kotɨ yayu yave peecha vae; yandeYa Tumpa yandeokuai rami, yayu regua ñaväe Cades-barnea pe.

²⁰ Jayave joko pe che jae peve: ‘Yayu ma ñaväe amorreo reta iɨvɨtɨ pe, yandeYa Tumpa omee yandevea pe.

²¹ Mase, yandeYa Tumpa omee peve ɨvɨ, pekua pepɨ̈ro pembaerä peñemuñagüe reta iTumpa jei peve rami, agüɨye pekɨɨye jare peyembopɨtu.’

²² Ërei pe reta opaete peyu pere cheve: ‘Yamondo yandepɨte güi omae vaerä ɨvɨ re, jare yogüeru ye yave tomombeu yandeve tape kerupi ra yajata vae, jare kia nunga tëta guasu pe räri ra yajata vae.’

²³ Jare kuae pere cheve vae ikavi cheve, jayave aiparavo doce kuimbae reta pepɨte güi, ñemuña ñavo güi.

²⁴ Jare opa yogüɨraja ɨvɨtɨ kotɨ, yogüɨraja regua oväe Escol pe, jare omae reta opaete ɨvɨ re.

²⁵ Jare güeru reta yandeve jókuae ɨvɨ güi mbae iagüe, jare imiari reta jei reve: ‘Ikavi yae ɨvɨ yandeYa Tumpa omee yandeve vae.’

²⁶ Ërei ngatu mbaetɨ peipota peyeupi peo vaerä jókuae ɨvɨ pe, jaeño, peyembopɨapochɨ peyapo vaerä peTumpa iporookuai.

²⁷ Jare peñeenguru pero guakapi pegua ñavo rupi, pere: ‘YandeYa ñanereröɨro; ñanerenoe ɨvɨ Egipto güi ñanemee amorreo reta ipo pe, yandemboai vaerä.

²⁸ Jare añave, ¿ketɨ pa yajata? Ñanerëtara reta omombeu kavi ma oechagüe, jei reta: Tëta tuicha yae jare imbaepuere yae vae ko, jare ikësea reta ɨvategüe, roecha vi Anac iñemuña reta. Opaete kuaekuae roendu yave oreiämondo yae.’

²⁹ Jayave che jae peve: ‘Agüɨye peñeiämondo, agüɨye pekɨɨye chugüi reta.

³⁰ YandeYa Tumpa ko ojota perenonde, jae oñorarota peré, peecha Egipto pe oyapo rami.

³¹ Kuimbae oipoko taɨ güɨroata rami, peecha yandeYa Tumpa pereroata ñuu rupi opaete peguataa rupi, peyu regua peväe kuae pe.’

³² Ërei ngatu jeseve mbaetɨ perovia yandeYa Tumpa,

³³ jae ko ojo perenonde jare oeka kia pe peputuu vaerä, pɨ̈tu yave omoembipe oechauka peve kerupi peguata vaerä jare ara pe amapɨtu.

Tumpa iyarasɨ Israel iñemuña reta kotɨ

³⁴ YandeYa oendu peñeenguru yave iyarasɨ, jare jei jee re oyeapo vaerä, körai:

³⁵ ‘Kuae ñemuña reta güi mbaetɨ eteita oecha ɨvɨ kavi, arökuavee amee vaerä peñemuñagüe reta pe vae.

³⁶ Jaeño ete Caleb, Jefone taɨ oechata, jare iñemuña reta oechata jókuae ɨvɨ ojo oecha vae, echa sɨmbi oguata cheróvai.’

³⁷ Jare pereko pegua yandeYa iyarasɨ chekotɨ, jei cheve: ‘Ngaraa vi nde reike jókuae ɨvɨ pe.

³⁸ Josué, Nun taɨ ndemborɨ vae, jae oiketa nderekovia pe jókuae ɨvɨ pe, emoäta ngatu, echa jae omeeta ɨvɨ Israel iñemuña reta pe.

³⁹ Jare pemichia reta pe, tembipɨɨrä yogüɨrekota pere chupe vae, ndei ave oikuaa ikavi vae ani ikavimbae vae, jae reta oiketa jókuae ɨvɨ pe, chupe reta ameeta ɨvɨ imbaerä.

⁴⁰ Ërei pe reta ¡peyerova ye peo ñuu kotɨ! Tape Ɨguasu Pɨ̈ta vae kotɨ ojo vae rupi.’

Ɨvɨ Horma pe ñamɨri Israel iñemuña reta

⁴¹ Jayave pe reta pere cheve: ‘Oreyoa yandeYa kotɨ, añave torojo roñoraro vaerä yandeYa Tumpa oreokuai rami.’ Jare peyeapo katu metei ñavo ñeraro peguarä, jare peyupavo peyeupi vaerä ɨvɨtɨ re.

⁴² Ërei yandeYa cheokuai jae vaerä peve: ‘Agüɨye pekua; agüɨye vi peñoraro, echa mbaetɨ aï pepɨte pe, peñemoamɨriukata ko perovaicho reta pe.’

⁴³ Amombeu tëi peve, ërei ngatu pe reta mbaetɨ chererovia, yandeYa iporookuai peendumbaeño opa peyeupi ɨvɨtɨ re peyomborɨ katu yae reve.

⁴⁴ Ërei ñogüɨnoe perovaicho reta peve yave, amorreo reta jókuae ɨvɨtɨ rupi yogüɨreko vae, peñemoñauka chupe reta kävee oporomoña rami, jare peñemoamɨriuka chupe reta Seir güive Horma kotɨ.

⁴⁵ Jare peyerova peyaeo reve yandeYa jóvai, ërei yandeYa mbaetɨ oendu peñee, mbaetɨ vi oyeapɨsaka peré.

⁴⁶ Jare peiko Cades pe ɨma año rupi.