DANIEL 5 - Biblia Guarani Tumpa Iñee

Tembikuatía oyekuaa ovapetea re vae

¹ Mburuvicha guasu Belsasar oyapo metei arete tuicha vae mil rupi vae imborɨa mburuvicha reta peguarä, jare jou vino jókuae reta ndive.

² Belsasar osavaɨpo ma yave omondo güeruruka vaso reta oro pegua jare korepoti pegua, iñemuñagüe Nabucodonosor güeru Jerusalén pegua tupao güi vae, pɨpe okau vaerä jae jare mburuvicha reta, jembireko reta jare kuña güɨrekoiño vae reta ndive.

³ Jayave güeru vaso reta oro pegua, Tumpa jo Jerusalén pegua güi oyereru vae, jare okau reta pɨpe mburuvicha guasu, mburuvicha reta, jembireko reta jare kuña güɨrekoiño vae reta.

⁴ Jou reta pɨpe vino jare omboete reta itumpa reta oro pegua, korepoti pegua, jiero iyu vae pegua, jiero pegua, ɨvɨra pegua jare ita pegua.

⁵ Jókuae ora pe voi oyekuaa metei kuimbae ipo ombaekuatía mburuvicha guasu jo iovapetea oñemotïigüe re vae mechero jóvai. Mburuvicha guasu oecha kuimbae ipo ombaekuatía vae.

⁶ Jayave mburuvicha guasu opa jovaiyu, jare mbaetɨ etei oikuaa mbae jei vaerä, jare jete opa jëogüe, itava oyotaa päve oyoe.

⁷ Jayave mburuvicha guasu täta osapúkai oyereru vaerä ichoropa vae reta, Caldeaɨgua reta, maratuta vae imombeúa reta; jare jei yarakuaa katu vae reta Babilonia pegua pe: —Kia nunga vae omongeta yave kuae oyekuatía oï vae, jare oikuaauka cheve mbae ko oipota jei vae yave, oyemondeta temimonde pɨ̈taasɨ vae mburuvicha pegua pe, jare metei mboɨ oro pegua oñonota iyayu re, jare oïta mboapɨa mburuvicha guasurä mborookuaía pe.

⁸ Jayave opaete yarakuaa katu vae reta, mburuvicha guasu pe oyeokuai vae reta güɨroike jóvai, ërei mbaetɨ ipuere reta omongeta oyekuatía oï vae jare mbaetɨ vi ipuere oikuaauka mburuvicha guasu pe mbae ko oipota jei vae.

⁹ Jayave mburuvicha guasu Belsasar okɨɨye yae ete, jare jovaiyu, jare iyɨvɨrigua mburuvicha reta ipɨakañɨ yae.

¹⁰ Ërei mburuvicha guasu ichɨ oendu yave mburuvicha guasu iñee jare imborɨa mburuvicha reta iñee, oike okau reta ñogüɨnoia pe, jare jei: —¡Mburuvicha guasu, eikove katu avei! Agüɨye ekɨɨye jare tanderovaiyu.

¹¹ Kuae ndeporookuaía pe oime metei kuimbae Tumpa Iyoambae iespíritu oï jese vae; jare neñemuñagüe oikose yave, oñeväe jese arakuaa katu, tumpa reta iyarakuaa katu rami; neñemuñagüe mburuvicha guasu Nabucodonosor oñono opaete ichoropa vae reta, yasɨtata re oyemboe vae reta, Caldeaɨgua reta, jare maratuta vae imombeúa reta juvicharä vae,

¹² oñeväe ramo jese espíritu tuicha yae vae jare arakuaa katu mbaɨu oikuaauka vaerä mbae ko oipota jei vae, yemongeta reta jare mbae yavai yae vae; jae ko Daniel, mburuvicha guasu ombojee Beltsasar pe vae. Eenɨi añave Daniel, jare jae oikuaaukata ndeve mbae ko oipota jei kuae reecha vae.

¹³ Jayave güeru reta Daniel mburuvicha guasu jóvai. Jare mburuvicha guasu jei Daniel pe: —¿Jae pa nde jókuae Daniel, Judea güi cheñemuñagüe güeru tembipɨɨrä vae reta taɨgüe?

¹⁴ Che aendu nderegua, kërai oime oï nderé Tumpa Iyoambae iespíritu, jare oñeväe nderé arakuaa katu tuicha yae vae.

¹⁵ Jare añave oyereru tëi cheróvai yarakuaa katu vae reta, yasɨtata re oyemboe vae reta, omongeta reta vaerä cheve kuae oyekuatiagüe, jare oikuaauka reta vaerä cheve mbae ko oipota jei vae; ërei mbaetɨ ipuere oikuaauka reta cheve.

¹⁶ Che aendu nderegua, kërai ndepuere reikuaauka oipotagüe mbae ko oipota jei vae, jare reñono kavi yemboavai reta. Añave ndepuere remongeta cheve kuae oyekuatiagüe jare reikuaauka mbae ko oipota jei vae yave, reyemondeukata temimonde pɨ̈taasɨ vae mburuvicha pegua pe, jare mboɨ oro pegua reñonota ndeayu re, jare reïta mboapɨa mburuvicha guasurä mborookuaía pe.

¹⁷ Jayave Daniel jei mburuvicha guasu pe: —Toiko ndeveguaräño mbota reta renoi vae, emee jókuae mbota reta ïru reta pe. Amongetata kuae oyekuatiagüe ndeve mburuvicha guasu, jare aikuaaukata ndeve mbae ko oipota jei vae.

¹⁸ Tumpa Tuichagüe yae ete vae, omee neñemuñagüe Nabucodonosor pe mborookuaía, yembotuicha jare iyemboetea.

¹⁹ Jare yembotuicha omee chupe vae rupi, opaete vae tëta reta, jare tëtaguasu reta jare ïru ñee pe imiari vae reta orɨrɨi jare okɨɨye chugüi. Jae oipota oyuka vae oyuka, jare mbaetɨ oipota oyuka vae mbaetɨ oyuka, jare oipota ombotuicha vae ombotuicha ani oipota omomichi vae omomichi.

²⁰ Ërei oyembopɨapochɨ jare ipɨa omotäta oyemboete reve yave, oñerenoeuka oyemombo iporookuaía güi jare oyemombouka iyemboetea güi.

²¹ Jare oyemombouka kuimbae reta ipɨte güi, jare ou ipɨa opɨta mɨmba reta rami, jare oiko mburika reta ñanaɨgua ndive. Ñana jou guaka rami, jare ɨsápɨi opa jete omoäkɨ, oikuaa regua Tumpa Tuichagüe yae ete vae ko güɨnoi mbaepuere kuimbae reta iporookuaía re, jare jae omee mbaepuere ikɨ̈reɨ omee vae pe.

²² Jare nde Belsasar, Nabucodonosor iñemuña, mbaetɨ ndepɨa remomichi reikuaa tëi reve opaete kuaekuae reta;

²³ ërei cheYa ara pe oï vae kotɨ reyembopɨapochɨ, jare reruruka nderóvai vaso reta Tumpa jo pegua, nde jare ndeɨvɨrigua mburuvicha reta, nderembireko reta jare kuña rerekoiño vae reta ndive rekau pɨpe; jare kuae güire, remboete tumpa reta korepoti pegua, oro pegua, jiero iyu vae pegua, jiero pegua, ɨvɨra pegua jare ita pegua; jókuae omaembae reta, oendumbae reta, yarakuaambae reta; jare Tumpa jae ipo pe nderekove oï vae jare opaete reyapogüe reta jese oiko vae mbaetɨ remboete.

²⁴ Jáeramo jae oïa güi etei ko ombou kuae oikuatía vaerä.

²⁵ Kuae tembikuatía jae ko: MENE, MENE, TEKEL, UPARSIN.

²⁶ Kuae ñee MENE oipota jei: Tumpa oipapa ma ndeporookuaía, jare oñono ma iyapɨ vaerä.

²⁷ TEKEL: Reñejäauka mbaejäaka pe, jare oata yae ndepoɨ.

²⁸ PERES: Ndeporookuaía oyemboyao ma, jare oñemee Media jare Persia pegua reta pe.

²⁹ Jayave Belsasar omondo omboemimondeuka Daniel temimonde pɨ̈taasɨ vae mburuvicha pegua pe, jare oñonouka iyayu re mboɨ oro pegua, jare omoërakuauka jae ko mboapɨa mburuvicha guasu jókuae mborookuaía pe vae.

³⁰ Jókuae pɨ̈tu voi oyeyukauka Belsasar, Caldeaɨgua reta juvicha guasu.

³¹ Jare Darío, Media pegua sesenta y dos año güɨnoi oguapɨ mburuvicha guasurä yave.