Colosenses 4 - Biblia Guarani Tumpa Iñee

¹ Mbaravɨkɨ iya reta, peyapo jupi vae jare isɨmbi vae perembiokuai reta pe, echa peikuaa ko oime vi penoi peYa ara pe.

² Jekuaeño peyerure avei. Peyerure avei pemee reve yasoropai Tumpa pe.

³ Jare peyerure vi oreré, yandeYa oipea vaerä oreve öke romoërakua vaerä Cristo regua yaikuaambae vae, echa jókuae re ko che aï kuae tembipɨɨrɨru pe.

⁴ Peyerure cheré, chepuere vaerä aikuaauka kavi.

⁵ Peiko pearakuaa katu reve oporogüɨroviambae vae reta ndive. Peiporu kavi ara reta.

⁶ Pemiari kavi ñee oporomboyerovia vae. Peikuaa kavi mbae pere vaerä oparandu vae pe.

Tamaraeme reta

⁷ Opaete cheregua, Tíquico omombeuta peve. Jae ko cherɨvɨ aaɨu vae, yandeYa jembiokuai jupi vae, chemborɨ vae.

⁸ Echa kuaerä amondo pépɨri, oikuaa vaerä peregua, jare jae pembopɨakatu vaerä.

⁹ Amondo vi jae ndive Onésimo. Jae vi ko cherɨvɨ aaɨu vae jupi vae, jae ko perëtaɨgua. Jae reta oikuaaukata peve opaete mbae kuae pe oyeapo vae.

¹⁰ Aristarco, cheïru tembipɨɨrɨru pe vae, omondo tamaraeme peve, jare Marcos, Bernabé jiɨ. Jókuae che poyókuai ma pemboresive kavi vaerä, ojo pépɨri yave vae.

¹¹ Jare Jesús, Justo pe oero reta vae omondo vi peve tamaraeme, jaeño ete kuae judío reta chemborɨ amoërakua vaerä Tumpa iporookuaía regua. Jae reta chembopɨakatu yae.

¹² Epafras vi omondo tamaraeme peve, jae ko perëtaɨgua, Cristo jembiokuai. Jae jekuaeño oyerure avei peré, peñemomɨ̈rata vaerä, jare peikuaa kavi vaerä opaete Tumpa jemimbota re.

¹³ Echa che etei chepuere amombeu peve kërai Epafras oyemoambeko täta peré, jare Laodicea jare Hierápolis pegua reta re.

¹⁴ Lucas jare Demas vi omondo tamaraeme peve. Lucas jae ko oporopoano vae aaɨu vae.

¹⁵ Tamaraeme toñogüɨnoi oporogüɨrovia vae reta Laodicea pegua. Ninfas jare opaete oporogüɨrovia vae reta jae jo pe oyemboatɨ vae.

¹⁶ Pe reta pemongeta ma yave kuae tupapire, pemondo Laodiceaɨgua oporogüɨrovia vae reta omongeta vaerä vi. Jare jókuae tupapire Laodicea pe amondo vae pe reta pemongeta vi.

¹⁷ Pere Arquipo pe toñemoäta ngatu, oyapo vaerä mbaravɨkɨ yandeYa omee chupe vae.

¹⁸ Che etei amondo peve tamaraeme, aikuatía chepo pe etei. Pemaendúa tembipɨɨrɨru pe aï vae re. Tumpa ipɨakavi toï pe ndive. ¡Amén!