CANTARES 8 - Biblia Guarani Tumpa Iñee

¹ ¡Mbae mona nde chekɨvɨ eterä reiko, jókuae chesɨ ombokambu vae! Jökorai yave, roövaitía rupi rovapɨteta jare ngaraa kia opuka cheré;

² rogüɨrajata viña chesɨ jo pe, amaeñota reike viña jare chemboe. Che ameeta viña reu vino ikavigüe jare granada ia tɨgüegüe.

³ ¡Iyasu pe tacheako, javoi iyakatu pe tacheküava!

⁴ ¡Kuñatai reta Jerusalén pegua, pomoñera agüɨye vaerä pemomba aaɨu vae, pemaeño toke pɨagüive jae oipota regua!

Ovaa tairari Coro:

⁵ ¿Kia pa kuae ñuu kotɨ güi ou vae, iñäka omboyeko ou, oaɨu vae iyatiɨ re vae? Ɨvɨra manzana igüɨ pe romomba; joko pe ndesɨ imembɨrasɨ, joko pe ndesɨ oyekuaku, jare rea.

Kuimbae: Kuña:

⁶ Cherenoi avei ndepɨa pe, ¡ndeyɨva reikuatía rami! Echa mboroaɨu, ipɨ̈rata yae ko mano rami; tägüɨro, ñamomɨimbae ko tëogüe-rɨru rami. ¡Mboroaɨu, tata jendɨ rami ko!

⁷ Opaete ɨ reta, ngaraai ipuere ombogüe mboroaɨu; ɨ̈aka reta ave ngaraai ombogüe. Kia omee yave opaete imbaeyekou mboroaɨu re, oyeyoyaiuka vaeräño ko.

Coro:

⁸ Yandereindɨ raɨ ndei vɨteri ikambusu. ¿Mbae ra yayapota yandereindɨ raɨ pe, yogüeru yave oporopɨɨ jese?

⁹ Tëta ikësearä oiko yave, ñamopüata viña jese o korepoti pegua; ökerä oiko yave, ñañovata viña ɨ̈vɨrare pe.

Kuña:

¹⁰ Che ko jae, tëta ikësea, jare chekambɨ reta ko maeka ɨvate vae rami. Jáeramo, jae omae cheré, kia oväe mbɨakatu rami.

¹¹ Salomón güɨnoi iuvarupa Baal-hamón pe. Oeya oyangareko vae reta ipo pe; metei ñavo mil reare korepoti pegua güeruta jepɨgüe iagüe re.

¹² ¡Cheuvarupa chembae ko, che aeño ayangareko vaerä jese! Jókuae mil reare korepoti pegua vae, toï ndembaeräño Salomón, jare dosciento, omaangareko vae reta peguarä.

Kuimbae:

¹³ ¡Nde, ko raɨ peño reiko vae, emaeño taendu neñee! ¡Cheïru reta oipota ndereendu, eenduka chupe reta neñee!

Kuña:

¹⁴ ¡Aaɨu vae, ndeandeko, esɨi guasu ani guasukaka taɨrusu vae rami, ɨvɨtɨ reta ipiche kavi vae rupi rami!