CANTARES 7 - Biblia Guarani Tumpa Iñee

Kuimbae:

¹ ¡lkavi yae ndepɨ reta ndepɨapaa pe, mburuvicha tayɨ! Nderumbɨapɨka vae oro oñemopöragüe rami, jókuae ipoki mbae oyapo vae jembiapo rami.

² Nepürúa yapúa kopa rami, jókuae mbaetɨ oata vino pɨpe vae rami; ndekúa trigo oyeokuagüe rami, jare tüpa-ɨpɨ ipotɨ ipɨte pe oï rami.

³ Ndekambɨ reta, guasu chaguakiri rami.

⁴ Ndeayu, oɨvate elefante jäimbuku pegua rami; nderesa reta, ɨrɨru reta tëta guasu Hesbón pegua rami, öke Bat-rabim jóvai pegua rami; netï, Líbano pegua maeka ɨvate vae rami, tëta guasu Damasco kotɨ omae vae rami.

⁵ Neäka, ɨvɨtɨ guasu Carmelo rami; ndea, inimbo pɨ̈ta vae rami, ¡mburuvicha guasu oyepókoi oï jese!

⁶ Aaɨu vae, yaipota yae ñamae jese vae; ¡ndekavi yae, nepöra yae!

⁷ Ndepukugüe, karandaɨ pukugüe rami; ndekambɨ reta, iagüe jenembai rami.

⁸ Che jae: “Tayeupi karandaɨ re, tayepɨɨ ia re.” Emaeño ndekambɨ, uva ia jenembai vae rami toï; nepɨ̈túe, otimbo kavi manzana rami;

⁹ ndeyuru, vino ikavigüe yae vae rami, jókuae jëe ngatu kavi oasa cherembe rupi jare cheräi rupi vae rami ko.

Kuña:

¹⁰ Aaɨu vae imbae ko che; che ndive ko oyerovia katu.

¹¹ ¡Aaɨu vae, eyu yaja ko pe! Yapɨta tëta raɨ reta pe.

¹² Jare ndeimbove yave, yajata uvarupa pe; yaecha vaerä oime ra jokɨ, jare oime ra ipotɨ, jökoraiño vi granada ipotɨ ra vae. ¡Joko pe cheporoaɨu taechauka ndeve!

¹³ Mandrágora reta ia otimbo jëe ngatugüe; ñaneröke pe oï oipotagüe mbae ia jëeasɨgüe; mbae ia otinigüe jare oyepoo ramogüe, nde roaɨu vae peguarä ko añovatu.