CANTARES 6 - Biblia Guarani Tumpa Iñee

Coro:

¹ Nepöra yae ïru kuñatai reta ipɨte pe vae. ¿Ketɨ pa ojo reaɨu vae? ¿Ketɨ pa opia ojo? ¡Toroeka nde ndive!

Kuña:

² Aaɨu vae ojo iko raɨ pe, temitɨ ikäti kavi jenda pe. Güɨraja omongaru jɨmba, jare oyasɨa vaerä tüpa-ɨpɨ ipotɨ reta.

³ Chembae ko jókuae aaɨu vae, jare che ko imbae. Jae omongaru jɨmba reta tüpa-ɨpɨ pɨte rupi.

Pandepoa tairari Kuimbae:

⁴ Nde, roaɨu vae, nepöra yae, jare yaipota yae ñamae nderé, tëta guasu Tirsa jare Jerusalén re rami; jëguambae, sundaro jeta vae jëguambae rami.

⁵ ¡Agüɨye mo emae mbatee cheré, echa nderesa pe chemoamɨri ko! Ndea reta, kavara reta ogüeyɨ Galaad pegua ɨvɨtɨ ikúa rupi vae rami.

⁶ Neräi reta, vecha reta, oyaúa güi oë ramo rami; opareve imembɨ chaguakiri, mbaetɨ etei imembɨmbae.

⁷ Nderova, granada ia iyɨvɨte rami neäka-soia igüɨ pe.

⁸ Sesenta ko mburuvicha guasu imenda ïru, ochenta jembireko güɨrekoiño vae jare jeta kuñatai;

⁹ ërei meteiño ko chepɨkasu ikɨambae, memɨkuña jaevaeño ko, ichɨ oyeaeä yae jese vae. Kuñatai reta oecha yave omboete yae iñee pe, mburuvicha guasu jembireko reta jare güɨrekoiño vae omboete yae.

Coro:

¹⁰ ¿Kia pa ko kuae köembipe rami oyekuaa ou vae? Ipöra yae yasɨ rami, oporoesaka kuaraɨ rami, ¡jëguambae, sundaro jeta vae jëguambae rami!

Kuña:

¹¹ Aja ɨvɨra nogal jee vae jenda pe, aecha vaerä mbae iagüe ɨvɨtu päu ipe kavi vae; aecha vaerä vi uva jokɨ pɨau vae, jare temitɨ granada reta ipotɨ.

¹² Jare mbaetɨ aikuaa kërai ko vae, mburuvicha guasu ikäretou pe aï vae ramo aikuaa.

Coro:

¹³ ¡Eyu ye, Sulamita, eyu ye! ¡Eyu ye, roipota roecha! ¿Mbae pa reipota Sulamita güi? Coro: ¡Yerovia katu, teyupa pe rami!