CANTARES 5 - Biblia Guarani Tumpa Iñee

Kuimbae:

¹ Che ayu cheko raɨ pe, chereindɨ, chemenda ïrurä vae. Aipɨɨ chembae mirra jare ikäti kavi vae, jau ei jenda güi, jau vino jare neche. Pe peyoaɨu vae, peu pepuere rupi.

Coro: Irundɨa tairari Kuña:

² Che ake, ërei chepɨa pe oime aï, jare aendu aaɨu vae osapúkai cheve, jei: “¡Eipea cheve, chereindɨ, aaɨu vae, chepɨkasu ikɨambae! ¡Cheäka ɨsápɨi yepeai ko, ayu yave, oa jeta chea re!”

³ “Opa ma cheremimonde amboi tëi; ¡jekuae ra ayemonde yeta! Chepɨ ayoe kavi tëi ma; ¡jekuae ra amongɨa yeta!”

⁴ Aaɨu vae ipo omoinge öke opüa rupi. ¡Jókuae, ou paravete yae cheve!

⁵ Jayave apüa aipea öke, aaɨu vae pe. Chepo güi otɨkɨ ikäti kavi vae mirra, jare chepoäka güi osɨrɨ öke iyokendaka re ikäti kavi vae mirra.

⁶ Aipea öke, aaɨu vae pe, ërei jae mbaetɨ ma yepe oï joko pe; jare aë jaɨkue, aeka tëi, ërei mbaetɨ aväe, asapúkai tëi chupe, ërei mbaetɨ omboyevɨ cheve.

⁷ Cheväe tëta guasu iyangarekoa reta; jare tëta guasu ikësea iyangarekoa reta chenupa, chembopere reta jare ipïrimbae reve opɨ̈ro reta chegüi cheñeapevaka.

⁸ Kuñatai reta Jerusalén pegua, pomoñera peecha yave aaɨu vae, pere vaerä chupe cheve, amanota ma aaɨu güi.

Coro:

⁹ ¿Mbae mbatee pa jókuae reaɨu vae, ïru vae reta güi? Nde ko nepöra yae ïru kuñatai reta ipɨte pe vae. ¿Mbae mbatee pa jókuae reaɨu vae, ïru vae reta güi, oremoñera vaerä jese?

Kuña:

¹⁰ Che aaɨu vae ko ipireyu, ikañɨmaa jeta yae vae reta ipɨte pe.

¹¹ Ia kavi, oro oyeambae rami; iñäkarachi kavi, jare ia jüuasɨ güɨraü rami.

¹² Jesa reta, pɨkasu ɨesaɨ jembeɨ pe oguapɨ vae rami, tiïasɨ, neche pe oyau vae rami,

¹³ jova, temitɨ ikäti kavi vae jenda rami, ani mbaepotɨ ipiche kavi vae rami. Jembe, tüpa-ɨpɨ ipotɨ rami, jókuae ikäti kavi vae mirra oë chugüi rami.

¹⁴ Ipo reta, poapɨ regua oro pegua rami, ita jacinto jee vae pe oñemopöra vae rami; jete, elefante jäimbukugüe oñeova kavi ita zafiro jee vae pe rami;

¹⁵ itɨmaka reta, okɨta ita mármol jee vae pegua, oguapɨ oro oyeambae vae re rami; puku kavi ɨ̈vɨrare Líbano pegua rami.

¹⁶ Iyuru, jëeasɨ yae ko. ¡Ipotaa yae ko! ¡Jökorai ko aaɨu vae, jökorai ko chembae, kuñatai reta Jerusalén pegua!