CANTARES 4 - Biblia Guarani Tumpa Iñee

Kuimbae:

¹ Roaɨu vae, ¡ndekavi yae! ¡Oasa ete yé nepöra! Nderesa reta, pɨkasu jesa rami neäka-soia igüɨ pe; ndea reta, kavara reta ogüeyɨ Galaad pegua ɨvɨtɨ ikúa rupi vae rami.

² Neräi reta, vecha oñeapigüe, oyaúa güi oë ramo rami; opareve imembɨ chaguakiri, mbaetɨ etei imembɨmbae.

³ Nderembe pɨ̈ta kavi, inimbo pɨ̈ta vae rami, neñee pöra yae. Nderova, granada ia iyɨvɨte rami neäka-soia igüɨ pe.

⁴ Ndeayu, David pe oñemopüa maeka ɨvate vae, tembiporu ñeraro pegua jɨrurä vae rami. Jókuae re oyembosavava mil yeopiaka, jëia oñeraro vae reta iyeopiaka katuai.

⁵ Ndekambɨ reta, guasu chaguakiri, tüpa-ɨpɨ ipɨte rupi okaru rami.

⁶ Köe jembipe ma ou, jare pɨ̈tu ojo ramboeve, ajata ɨvɨtɨ guasu re, mirra oimea pe, jare ɨvɨtɨ re, incienso oimea pe.

⁷ ¡Roaɨu vae, nepöra yae ko! ¡Täta nderete kavi!

⁸ Eyu che ndive Líbano güi, chemenda ïrurä vae; eyu che ndive Líbano güi. Emae ɨvɨtɨ Amana iyapɨte güi, ɨvɨtɨ Senir jare Hermón iyapɨte güi; yaguapope reta ikua reta güi, yaguapara reta iɨvɨtɨ guasu reta güi.

⁹ Reipɨɨ chepɨa chegüi chereindɨ, chemenda ïrurä vae; metei remae cherea peño, reipɨɨ, jare jókuae ndeayu regua rupi.

¹⁰ ¡Ndeporoaɨu ikavi yae, chereindɨ, chemenda ïrurä vae! ¡Ndeporoaɨu jëe yae vino güi, jare neñemokätía ikavi yae opaete ïru ikäti kavi vae güi!

¹¹ ¡Chemenda ïrurä vae, nderembe ei rami, oime nekü igüɨ pe ei jare neche! ¡Líbano pe mbaepotɨ ipiche kavi otimbo rami, jökorai nderemimonde ikäti kavi otimbo!

¹² Nde, chereindɨ, chemenda ïrurä vae, mbaepotɨ oñekëse kavi vae rami ko nde, ɨesaɨ oñekëse kavi vae, ɨesaɨ oyeokenda kavi vae,

¹³ ko raɨ, ipɨau granada oë pɨpe vae, iagüe jëe ngatu vae; ko raɨ mbaepotɨ alheña oï pɨpe vae,

¹⁴ nardo jare azafrán jee vae, iɨ ikäti kavi vae jare canela, jare oipotagüe ɨvɨra ikäti kavi vae, mirra, áloe, jare opaete ïru ikäti kavi yae vae.

¹⁵ Ko raɨ reta pegua ɨ, ɨkua jesaɨ vae, jae ko ɨ Líbano kotɨ güi ou vae rami.

Kuña:

¹⁶ Ɨvɨtu ɨvɨtuguasu kotɨgua, ¡epüa! Ɨvɨtu arayevɨ kotɨgua, ¡eyu kuae kotɨ! ¡Eipeyu cheko raɨ, jare opa emoai ipiche kavi vae! Eyu, che roaɨu vae, ndeko raɨ pe, jare jeu mbae iagüe jëe ngatu yae vae.