CANTARES 3 - Biblia Guarani Tumpa Iñee

¹ Pɨ̈tu rupi, cherupa pe aeka aaɨu vae. Aeka tëi, ërei mbaetɨ aväe.

² Jayave apüa jare aguata opaete tëta guasu rupi, aeka vaerä aaɨu vae, kaye rupi jare oka guasu rupi. Aeka tëi, ërei mbaetɨ aväe.

³ Cheväe tëta guasu iyangarekoa reta, jare aparandu chupe reta, jae: “¿Mbaetɨ pa peecha aaɨu vae?”

⁴ Aasa chugüi reta ñoete, añoväe jókuae aaɨu vae ndive. Aipɨɨ, apoimbae ye chugüi, chesɨ jo pe araja regua, jókuae aa pe.

Kuimbae:

⁵ Kuñatai reta Jerusalén pegua, pomoñera, guasu jare guasukaka taɨrusu vae jee re. ¡Agüɨye vaerä aaɨu vae pemomba, pemaeño toke pɨagüive, tosareko jae oipota yave!

Mboapɨa tairari Coro:

⁶ ¿Kia pa jókuae ñuu kotɨ güi tätatiecha opüa oyekuaa ou vae, mirra jare incienso omoätati güeru vae?

⁷ ¡Jae ko Salomón ivoɨka! Sesenta sundaro jeia yae vae Israel pegua yogüeru iyɨke rupi;

⁸ opareve güɨnoi kɨsepuku, jare ipoki yae oñeraro reta vae; metei ñavo ikúa re güɨraja ikɨsepuku, pɨ̈tu yave oime pegua mbae.

⁹ Mburuvicha guasu Salomón oyapouka iyeupe metei voɨka, ɨvɨra ikavigüe Líbano pegua.

¹⁰ Ikäretou ietaka korepoti pegua; jenda iyekoa, oro pegua; jenda oñemopöra oñeova asoya pɨ̈ta vae pe; japɨpe oñemopöra pɨagüive kavi yae, kuña reta Jerusalén pegua ombokavi.

¹¹ ¡Kuña reta Sión pegua! ¡Peë pemae mburuvicha guasu Salomón re! Ä ka-regua oñono güeru iñäka re, ichɨ oyapo chupe imenda peguarä vae. Jókuae ara ipɨa yerovia yave peguarä vae.