CANTARES 2 - Biblia Guarani Tumpa Iñee

Kuña:

¹ Che ko jae mbaepotɨ ɨvɨpe kavi Sarón pegua, ɨvɨtɨ päu ipe kavi vae reta rupi tüpa-ɨpɨ ipotɨ rami.

Kuimbae:

² Tüpa-ɨpɨ ipotɨ, yuu pɨte pe oï rami, jökorai ko aaɨu vae, kuñatai reta ipɨte pe.

Kuña:

³ Ɨvɨra pɨte pe temitɨ manzana oï rami ko, aaɨu vae, kunumi reta ipɨte pe. ¡Iküaraɨa kavi pe aguapɨ! ¡Iagüe jëe ngatu yae cheve!

⁴ Chereraja aretea pe, jare omae cheré mboroaɨu reve.

⁵ ¡Chemongaru uva oñemotinigüe pe, chemomɨ̈rata manzana pe, echa amanota ma roaɨu güi!

⁶ ¡Iyasu pe tacheako, javoi iyakatu pe tacheküava!

Kuimbae:

⁷ Kuñatai reta Jerusalén pegua, pomoñera, guasu jare guasukaka taɨrusu vae ñana rupigua jee re. ¡Agüɨye vaerä aaɨu vae pemomba, pemaeño toke pɨagüive, tosareko jae oipota yave!

Mokoía tairari Kuña:

⁸ ¡Aipo ma ou aaɨu vae! ¡Che aendu ma iñee! Ochäguariko ou ɨvɨtɨ rupi, oporise ou jɨsɨ rupi.

⁹ Aaɨu vae, guasu ani guasukaka taɨrusu vae rami ko. ¡Mase, ko ma okupe pe oï, omae ventana rupi, omae vɨari ventana re oyeasa vae reta ipäu rupi!

¹⁰ Aaɨu vae jei cheve: “Epüa eyu, roaɨu vae; maepöra vae.

¹¹ ¡Mase!, iroɨ guasu iara oasa ma ko, ama yandereeya ma.

¹² Mbaepotɨ reta oyekuaa ma, tairari iara ou ma oväe, yandeɨvɨ pe oyeendu ma pɨkúi reta iñee.

¹³ Ɨva omboɨpɨ ma ia, uvarupa pe ñaëtu ma ipotɨ ipichegüe. Epüa eyu, roaɨu vae; maepöra vae.

¹⁴ Chepɨkasu kavi, ɨ̈vavira rupi oyemboaitɨ vae, ɨvate oyekaa rupi oiko vae, emaeño taecha nderova, emaeño taendu neñee. ¡Echa neñee ipöra yae ko! Jare ¡nepöra yae ko!”

Kuimbae jare kuña

¹⁵ Peipɨɨ aguara reta, aguara ndeigüe reta, güɨrokomegua yandeuvarupa vae, echa yandeuva ipotɨ oï.

Kuña:

¹⁶ Chembae ko jókuae aaɨu vae, jare che ko imbae. Jae omongaru jɨmba reta tüpa-ɨpɨ pɨte rupi.

¹⁷ Köe jembipe ma ou, jare pɨ̈tu ojo ma ramboeve eyu ye, che roaɨu vae; guasu rami, guasukaka taɨrusu vae rami Beter iɨvɨtɨ rupi.