Apocalipsis 9 - Biblia Guarani Tumpa Iñee

¹ Jayave araɨgua pandepoa omoñee mimbɨguasu, jare aecha metei yasɨtata oa ara güi ɨvɨ pe; jare oñemee chupe ɨvɨkua guasu illave.

² Jayave oipea ɨvɨkua guasu, jare joko güi oë tätati horno tuicha yae vae güi oë rami. Jare kuaraɨ jare ara oyembopɨtumimbi tätati ɨvɨkua güi oë vae jeko pegua.

³ Jare jókuae tätati güi oë tuku reta ɨvɨ iárambo. Jare oñemee chupe reta mbaepuere tumɨkarape oporoöpi vae rami.

⁴ Jare Tumpa oyókuai tuku reta agüɨye vaerä güɨrokomegua ñana, ɨvɨra reta jare opaete temitɨ reta. Ërei ipuere oñoöpi mbaetɨ güɨnoi Tumpa ikañɨmaa jesɨva re vae reta.

⁵ Jare oñemee tuku reta pe agüɨye vaerä oporoyuka, ërei oiporaraukata pandepo yasɨ rupi. Jare iporoöpi jasɨ yaeta tumɨkarape iporoöpi jasɨ yae rami.

⁶ Jare jókuae ara reta rupi ɨvɨ pegua reta oipota tëita omano. Ërei ngaraa ipuere. Ikɨ̈reɨ yae tëita omano, ërei mano otekuaraita chugüi reta.

⁷ Jare jókuae tuku reta kavayu oyeapo katu ñeraro peguarä vae ramita. Iñäka re güɨnoi vae äka-regua oro peguaecha. Jova kuimbae jovaecha.

⁸ Ia kuña iaecha. Jäi reta yaguapope jäi retaecha.

⁹ Jare jemimonde jete regua temimonde ñeraro pegua jiero peguaecha. Jare oveve reta yave, ipepo täta jɨapu, jeta yae kavayu reta güɨrosɨi käretou ñeraro pe rami.

¹⁰ Jare tuku reta júguai tumɨkarape juguaiecha. Jare júguai pe güɨnoi ipɨ̈pia. Jare güɨnoi mbaepuere oiporarauka vaerä ɨvɨ pegua reta pe pandepo yasɨ pegua.

¹¹ Jare jókuae tuku reta juvicha guasu metei araɨgua jókuae ɨvɨkua guasu pe oiko vae ko. Hebreo iñee pe jee Abadón. Griego iñee pe Apolión.

¹² Oasa ma tenondegua susere, ërei mókoi susere vɨteri oata.

¹³ Jayave araɨgua ovaa omoñee mimbɨguasu, jare aendu ñee Tumpa jóvai oï ikäti kavi vae incienso oyeapɨ jese vae oro pegua re guakarätiecha oï vae ipäu güi;

¹⁴ jókuae ñee jei araɨgua mimbɨguasu omoñee ramo vae pe: “Eyora jókuae irundɨ araɨgua ɨ̈aka Éufrates iyɨpɨ pe oñeapɨti vae reta.”

¹⁵ Jayave oyora jókuae irundɨ araɨgua reta. Jae reta oñemokätɨro ma mbae año, yasɨ, ara jare ora pe oyuka vaerä mbɨte seri ɨvɨ pegua reta.

¹⁶ Jare oyepapa sundaro kavayu regua reta yave aendu dosciento millone ñogüɨnoi.

¹⁷ Jökorai aecha jókuae kavayu reta oyekuaa cheve vae jare opo jese vae reta, güɨnoi reta jete regua temimonde ñeraro pegua pɨ̈taasɨ vae, jovɨ vae jare iyu vae. Jare kavayu reta iñäka yaguapope reta iñäkaecha. Jare iyuru güi oë tata, tätati jare azufre.

¹⁸ Jare tata jare tätati jare azufre kavayu reta iyuru güi oë vae oyuka mbɨte seri ɨvɨ pegua reta.

¹⁹ Echa jókuae kavayu reta güɨnoi mbaepuere oyuka vaerä ɨvɨ pegua reta iyuru pe jare júguai pe. Echa júguai mboi rami ko. Güɨnoi iñäka ipuere vaerä oichuu ɨvɨ pegua reta.

²⁰ Jare opaete ɨvɨ pegua reta mbaetɨ omano kuae mbaembae rupi vae, mbaetɨ oyepoepɨ jembiapo reta ikavimbae güi, mbaetɨ vi oeya mbaemboete aña reta pegua jare tumpa-raanga oro pegua, korepoti pegua, jiero iyu vae pegua, ita pegua jare ɨvɨra pegua; yepe tëi jókuae tumpa-raanga reta mbaetɨ omae, mbaetɨ oendu ani oguata;

²¹ jare mbaetɨ oyepoepɨ reta oporoyuka vae güi, mbaekuaa güi, aguasa ani imonda reta güi.