Apocalipsis 7 - Biblia Guarani Tumpa Iñee

Ciento cuarenta y cuatro mil vae reta

¹ Kuae jaɨkue rupi aecha irundɨ araɨgua reta oyemboɨ ñogüɨnoi ɨvɨ jembeɨ mbeɨ pe. Metei oï kuaraɨ oëa kotɨ, ïru oï kuaraɨ oikea kotɨ, ïru oï ɨvɨtuguasu kotɨ jare ïru oï arayevɨ kotɨ. Jare jae reta oyopia irundɨ ɨvɨtu ɨvɨ rupi oyepeyu vae, agüɨye vaerä oipeyu ɨvɨ, ɨguasu reta jare ɨvɨra reta.

² Jare aecha ïru araɨgua ou kuaraɨ oëa kotɨ güi, jare jókuae güeru Tumpa oikove vae oporomokañɨmaa pɨpe vae. Jare iñeeäta reve jei jókuae irundɨ araɨgua reta oñemee mbaepuere güɨrokomegua vaerä ɨvɨ jare ɨguasu vae pe,

³ jei reve: “¡Agüɨye perokomegua ɨvɨ jare ɨguasu jare ɨvɨra reta, ndei ñaneTumpa jembiokuai reta jesɨva romokañɨmaa mbove!”

⁴ Jare aendu mbovɨ ko Tumpa jembiokuai reta araɨgua reta omokañɨmaa vae, jae ko: Ciento cuarenta y cuatro mil opaete Israel pegua ñemuña reta güi.

⁵ Judá iñemuña reta güi doce mil, Rubén iñemuña reta güi doce mil, Gad iñemuña reta güi doce mil,

⁶ Aser iñemuña reta güi doce mil, Neftalí iñemuña reta güi doce mil, Manasés iñemuña reta güi doce mil,

⁷ Simeón iñemuña reta güi doce mil, Leví iñemuña reta güi doce mil, Isacar iñemuña reta güi doce mil,

⁸ Zabulón iñemuña reta güi doce mil, José iñemuña reta güi doce mil, Benjamín iñemuña reta güi doce mil.

Jeta yae vae jemimonde tïi vae reta

⁹ Kuae jaɨkue rupi amae jare aecha jeta yeyé vae opaete tëtaguasu reta güi, ñemuña reta, ñee ambuae mbuae, tëta reta yaipapa rapeä vae oyemboɨ ñogüɨnoi jókuae mburuvicha iguapɨa jare Vecha kuimbae taɨrusu vae jóvai. Jae reta jemimonde tïi jare ipo pe güɨnoi karandaɨ jogüe.

¹⁰ Jare iñeeäta reve jei reta: “¡ÑaneTumpa mburuvicha iguapɨa pe oguapɨ jare Vecha kuimbae taɨrusu vae güi ou yemboasa!”

¹¹ Jare opaete araɨgua reta oyemboɨ ñogüɨnoi jókuae mburuvicha iguapɨa, tenondegua okuakuaa vae reta jare jókuae irundɨ oikove vae reta iyɨ́vɨri rupi; jae reta oyetavatɨka itindɨasɨ reve mburuvicha iguapɨa jóvai jare omboete reta Tumpa,

¹² jei reta reve: “¡Amén! Mbaemboete jare yemboetea, arakuaa jare yasoropai, yemboete, mbaepuere jare mɨ̈rata, toiko ñaneTumpa pe jekuaekuae avei rupi. ¡Amén!”

¹³ Jayave metei jókuae tenondegua okuakuaa vae oparandu cheve: “Kuae jemimonde tïi vae reta ¿kia reta pa jare ketɨ güi pa yogüeru?”

¹⁴ Jare che jae chupe: “Cheru, nde ko reikuaa.” Jayave jae jei cheve: “Kuae reta ko jae yogüeru tembiporara guasu güi vae. Oputuka jemimonde jare omotïi Vecha kuimbae taɨrusu vae jugüɨ pe vae.

¹⁵ ‘Jáeramo ñogüɨnoi Tumpa iguapɨa jóvai, jare oyeokuai reta Tumpa pe ara rupi jare pɨ̈tu rupi tupao pe. Mburuvicha iguapɨa pe oguapɨ vae oyangareko aveita jese reta.

¹⁶ Ngaraa ye ma iyɨmbɨaɨ ani iɨuve reta, ani jasɨ chupe reta kuaraɨ, ani araku chupe reta;

¹⁷ echa Vecha kuimbae taɨrusu vae jókuae guapɨa mbɨte pe oï vae oyangarekota jese reta jare güɨrajata omboɨu ɨ tekove pegua pe, jare Tumpa oyoeta jesaɨ chugüi reta.’ ”