Apocalipsis 6 - Biblia Guarani Tumpa Iñee

Tembikuatía imboyaa reta

¹ Jare aecha Vecha kuimbae taɨrusu vae oipea metei jókuae tembikuatía imboyaa. Jayave aendu metei oikove vae reta güi jei: “Eyu” ara jɨapu vaeecha oyeendu iñee.

² Amae jare aecha metei kavayu tïi vae, jare opo kavayu re vae güɨnoi güɨrapa. Jare oñemee chupe äka-regua, oë oporomoamɨri vae oporomoamɨri vaerä.

³ Jare Vecha kuimbae taɨrusu vae oipea tembikuatía imboyaa mokoía yave aendu mokoía oikove vae jei: “Eyu.”

⁴ Jare aecha oë metei kavayu pɨ̈taasɨ vae. Jare opo kavayu re vae pe oñemee mbaepuere omoñerarouka vaerä ɨvɨ pegua reta, oyoyuka reta vaerä; jare oñemee vi chupe metei kɨsepuku tuicha yae vae.

⁵ Jare Vecha kuimbae taɨrusu vae oipea tembikuatía imboyaa mboapɨa yave, aendu mboapɨa oikove vae jei: “Eyu”, jare aecha metei kavayu jüu vae. Jare opo kavayu re vae güɨnoi ipo pe mbaejäaka.

⁶ Jare aendu ñee jókuae irundɨ oikove vae reta ipɨte pe jei: “Metei kilo trigo jepɨ metei denario, jare mboapɨ kilo cebada jepɨ metei denario. Ërei agüɨye erokomegua asaite jare vino.”

⁷ Jare Vecha kuimbae taɨrusu vae oipea tembikuatía imboyaa irundɨa yave, aendu irundɨa oikove vae jei: “Eyu.”

⁸ Amae jare aecha metei kavayu iyu vae. Jare opo kavayu re vae jee ko Mano. Jare Omanogüe reta jenda oiko Mano jaɨkue. Jare oñemee chupe reta mbaepuere jeta yeyé ɨvɨ pegua reta re, ipuere vaerä oyukauka reta ñeraro rupi, karuai pe, mbaerasɨ pɨ̈chɨi pe jare mɨmba pochɨ vae reta pe.

⁹ Jare Vecha kuimbae taɨrusu vae oipea tembikuatía imboyaa pandepoa yave, aecha mɨmba oyeyukagüe oñemeea iyɨpɨ pe Tumpa iñee jeko pegua oyeyukauka vae reta jekove, jare omombeu Tumpa iñee ïru vae reta jeko pegua.

¹⁰ Jae reta iñeeäta reve jei: “OreYa iyoambae jare añetete vae. ¿Kërai yave pa rejäata jare reiporaraukata ɨvɨ pegua oreyuka vae reta pe?”

¹¹ Jare temimonde tïi vae oñemee metei ñavo pe, jare oñemee chupe reta oputuu reta vaerä michi pegua, echa oyeyukaukata vi räri Tumpa pe oyeokuai jae reta rami vae, oupitɨ regua tembipapa.

¹² Jare aecha Vecha kuimbae taɨrusu vae oipea tembikuatía imboyaa ovaa yave, ɨvɨ täta okana. Jare kuaraɨ oyembopɨtumimbi metei tarapo jüu vae rami, jare yasɨ moropɨ̈ta tugüɨ rami,

¹³ jare yasɨtata reta oa ɨvɨ pe, metei ɨva ia oa jäka güi ɨvɨtu täta omokana yave vae rami.

¹⁴ Jare ara opa yapúa tupapire rami; jare opaete ɨvɨtɨ reta jare ɨguasu päu pegua ɨvɨ reta oyembosɨrɨ jenda güi.

¹⁵ Jare mburuvicha guasu reta ɨvɨ pegua, mburuvicha reta, oikokatu vae reta, sundaro ruvicha reta, mbaepuere güɨnoi vae reta, jare opaete tembiokuai reta jare opaete tembiokuaimbae reta oñemi ɨvɨkua reta rupi jare itakua ɨvɨtɨ rupigua reta rupi;

¹⁶ jare jei reta ɨvɨtɨ reta jare ɨ̈vavira reta pe: “¡Pea oreré, oreomi pea mburuvicha iguapɨa pe oguapɨ vae jóvai güi jare Vecha kuimbae taɨrusu vae iyarasɨ güi!”

¹⁷ Echa oväe ma ara Vecha kuimbae taɨrusu vae iyarasɨ yae vaerä, ¿kia pa ipuereta güɨropɨa?