Apocalipsis 21 - Biblia Guarani Tumpa Iñee

Ara ipɨau vae jare ɨvɨ ipɨau vae

¹ Javoi aecha ara ipɨau vae jare ɨvɨ ipɨau vae. Echa ara jare ɨvɨ tenonde oiko vae opa oasa, jaeramiño vi mbaetɨ ma ɨguasu.

² Jare che etei aecha jókuae tëta guasu oñeñono tee Tumpa peguarä vae, jae ko Jerusalén ipɨau vae, ogüeyɨ ou Tumpa oïa güi. Oyeapokatu ou metei kuñatai omendata vae rami.

³ Jare aendu metei ñee tätagüe ara güi jei: “Mase, Tumpa oikoa ko oï ɨvɨ pegua reta ndive. Jae oikota jae reta ndive; ɨvɨ pegua reta yogüɨrekota Tumpa imbaerä, jare Tumpa etei oikota jae reta iTumparä.

⁴ Jare Tumpa oyoeta opaete jesaɨ reta. Ngaraa ye kia omano, ani ipɨatɨtɨ, ani oyaeo ani mbae jasɨ. Echa mbaembae tenonde oiko vae opa ma oasa.”

⁵ Jare oguapɨ oï mburuvicha iguapɨa pe vae jei: “Mase, ko ayapo pɨau opaete mbaembae.” Jei vi: “Eikuatía. Echa kuae ñee reta jupi jare añetete ko.”

⁶ Jare jei vi cheve: “Oyeapo ma. Che ko jae Alfa jare Omega, iyɨpɨ ete jare iyapɨ ete. Kia iɨuve vae, che ameeiñota jepɨmbae jou ɨesaɨ tekove pegua güi.”

⁷ Oporomoamɨri vae pe ameeta imbaerä opaete mbaembae. Che etei aikota jae iTumparä jare jae oikota cheraɨrä.

⁸ Ërei okɨɨye vae reta jare oporogüɨroviambae reta, jare mbae pɨ̈chɨi vae oyapo vae reta, jare oporoyuka vae reta, jare iyaguasa vae reta, jare imbaekuaa vae reta, itumpa-raanga pota vae reta jare opaete iyapu vae reta yogüɨrajata tata guasu azufre ndive jendɨ vae pe. Kuae ko jae mano mokoía.

Jerusalén ipɨau vae

⁹ Jayave jókuae chiu araɨgua reta chiu kopa chiu mbaesusere taɨkuegua tɨnɨe güɨnoi vae güi metei ou chekotɨ jare jei cheve: “Eyu kuae pe, taechauka ndeve Vecha kuimbae taɨrusu vae imenda ïrurä vae.”

¹⁰ Jayave araɨgua chereraja Espíritu Santo imbaepuere pe metei ɨvɨtɨ guasu ɨvate vae re, jare oechauka cheve tëta guasu Jerusalén oñeñono tee Tumpa peguarä vae ogüeyɨ ou ara güi Tumpa oïa güi.

¹¹ Güɨnoi reve Tumpa iyemboetea. Jembipe metei ita ipöra yae vae rami, ita ipöra yae vae jaspe jësaka vae rami.

¹² Jare güɨnoi ikësea tuicha jare ɨvate yae vae, doce jöke vae. Jare jöke ñavo oï metei araɨgua. Jare jöke ñavo re oyekuatía doce Israel iñemuña jee.

¹³ Kuaraɨ oëa kotɨ mboapɨ öke reta; ɨvɨtuguasu kotɨ mboapɨ öke reta; arayevɨ kotɨ mboapɨ öke reta, kuaraɨ oikea kotɨ mboapɨ öke reta.

¹⁴ Jare tëta guasu ikësea iguapɨka reta doce, jare jese oyekuatía oï Vecha kuimbae taɨrusu vae jemimondo reta jee.

¹⁵ Jare imiari cheve vae güɨnoi täkuarasɨ mbae oñejäa pɨpe vae rami vae oro pegua, oñejäa vaerä tëta guasu, jöke reta jare ikësea.

¹⁶ Jare tëta guasu ipukugüe, ɨvategüe, ipɨgüe oyovake päve. Ipukugüe güɨnoi dos mil dosciento kilómetro, ɨvategüe güɨnoi dos mil dosciento kilómetro, ipɨgüe güɨnoi dos mil dosciento kilómetro.

¹⁷ Jare araɨgua ojäa tëta guasu ikësea, ɨvategüe güɨnoi sesenta y cinco metro. Kuimbae reta omaejäa rami, jökorai araɨgua omaejäa.

¹⁸ Jare tëta guasu ikësea ita ipöra yae vae jaspe jee vae pegua ko. Ërei tëta guasu etei oro oyeambae pegua, vidrio jësaka ikɨambae rami.

¹⁹ Jare ikësea iguapɨka reta oñemopöra opaete ita ipöra yae vae pe. Tenondegua iguapɨka ita ipöra vae jaspe jee vae pegua; mokoía iguapɨka ita ipöra vae zafiro jee vae pegua; mboapɨa iguapɨka ita ipöra vae ágata jee vae pegua; irundɨa iguapɨa ita ipöra vae esmeralda jee vae pegua;

²⁰ pandepoa iguapɨka ita ipöra vae ónice jee vae pegua; ovaa iguapɨka ita ipöra vae cornalina jee vae pegua; chiúa iguapɨka ita ipöra vae crisólito jee vae pegua; juría iguapɨka ita ipöra vae berilo jee vae pegua; chaúa iguapɨka ita ipöra vae topacio jee vae pegua; payandepoa iguapɨka ita ipöra vae crisopraso jee vae pegua; oncea iguapɨka ita ipöra vae jacinto jee vae pegua; docea iguapɨka ita ipöra vae amatista jee vae pegua.

²¹ Jare jókuae doce öke reta doce ita ipöra yae vae pegua ko. Metei öke ñavo jae ko ita ipöra vae pegua. Jare tëta guasu ikaye reta oro pegua, jësaka vidrio ikɨambae rami.

²² Jókuae tëta guasu pe mbaetɨ etei aecha tupao. Echa yandeYa Tumpa Imbaepuere yae vae jare Vecha kuimbae taɨrusu vae jae reta etei joko pe tupao.

²³ Jare jókuae tëta guasu mbaetɨ oeka kuaraɨ ani yasɨ omoembipe vaerä. Echa Tumpa jare Vecha kuimbae taɨrusu vae etei omoembipe.

²⁴ Opaete tëtaguasu oyemboasauka vae oguatata jókuae tëta jembipe pe, jare ɨvɨ pegua mburuvicha guasu reta güeru retata imbaeyekou reta chupe.

²⁵ Jare ngaraa etei oyeokenda tëta guasu jöke reta ara rupi, echa ngaraa vi oime pɨ̈tu joko pe.

²⁶ Jare opaete tëtaguasu pegua reta imbaeyekou reta oñemeeta chupe.

²⁷ Ërei ngaraa etei oike jókuae tëta guasu pe oipotagüe ikɨa vae jare oipotagüe pɨ̈chɨi vae oyapo vae jare iyapu vae. Jaeño Vecha kuimbae taɨrusu vae jembikuatía tekove pegua pe jee oyekuatía oï vae reta.