Apocalipsis 20 - Biblia Guarani Tumpa Iñee

YandeYa oporookuaita mil año pegua

¹ Jare aecha metei araɨgua ogüeyɨ ou ara güi, güeru ɨvɨkua guasu illave, jare ipo pe metei karena tuicha vae.

² Jare oipɨɨ jókuae mbaeporou guasu, mboi ñɨma vae, jae ko aña guasu Satanás. Jare oipokua mil año pegua.

³ Jare omombo ɨvɨkua guasu pe. Jayave oyokenda ɨvɨkua jöke jare oñono jese mbae agüɨye vaerä kia ipuere oipea ye. Jökorai oyapo agüɨye vaerä ma ombotavɨ tëtaguasu reta mil año omboapɨ regua. Ërei jaɨkue rupi oyeyorauka yeta michi pegua.

⁴ Jare aecha mburuvicha iguapɨa reta jare joko pe oguapɨ mbaepuere oñemee chupe oporojäa vaerä vae reta. Jare aecha Jesús regua jare Tumpa iñee omombeu ramo oñeäka-sɨauka vae reta jekove. Jókuae mbaetɨ omboete mbaemɨmba guasu ani iä vae reta, mbaetɨ etei vi güɨnoi ikañɨmaa jesɨva re jare ipo re. Jae reta oikove ye jare oporookuai Cristo ndive mil año.

⁵ Ërei ïru omanogüe reta mbaetɨ oikove ye, mil año oasa regua. Jae ko kuae tenondegua omanogüe reta oikove ye vae.

⁶ Oyerovia ko tenonde oikove ye vae, echa oñeñono tee Tumpa peguarä vae reta ko. Jókuae mano mokoía ngaraa ipuere jese reta. Jae reta yogüɨrekota Tumpa jare Cristo isacerdoterä. Jare oporookuai retata jae ndive mil año.

⁷ Jare mil año oasa ma yave, Satanás oyeyora yeta tembipɨɨrɨru güi,

⁸ jayave oëta ombotavɨ vaerä opaetei tëtaguasu reta ɨvɨ pegua, ojota Gog pe jare Magog pe omboatɨ vaerä ñeraro peguarä. Jeta yaeta ko, ɨvɨkuitï ɨguasu jembeɨ pe oï rami.

⁹ Jare yogüeru opaete Israel pegua reta iɨvɨ rupi jare oñova jókuae tëta guasu Tumpa oaɨu vae, oñeñono tee Tumpa peguarä vae reta yogüɨrekoa. Ërei Tumpa ombou tata ara güi, jare opaetei oapɨ reta.

¹⁰ Jare aña guasu ombotavɨ reta vae oyemombouka tata guasu azufre ndive jendɨ vae pe, mbaemɨmba guasu jare ñeemombeúa raanga ñogüɨnoia pe. Jare joko pe oiporara retata ara rupi jare pɨ̈tu rupi jekuaekuae avei rupi.

Morojäa guapɨa guasu tïi vae jóvai

¹¹ Jare aecha metei guapɨa guasu tïi vae, jare oguapɨ oï pɨpe vae. Ɨvɨ jare ara opa otekuarai jae jóvai güi vae, jare mbaetɨ kia pe oñemi vaerä.

¹² Jare aecha omanogüe reta oyemboɨ ñogüɨnoi Tumpa jóvai, okuakuaa vae reta jare michia reta. Jare tembikuatía reta oyepea, jare oyepea ïru tembikuatía, jae ko tembikuatía tekove pegua. Jare omanogüe reta oñejäauka jembiapo reta tembikuatía reta pe oyekuatía oï rupi.

¹³ Jare ɨguasu omboeterenga opaete omanogüe reta ñogüɨnoi pɨpe vae. Jare mano jare omanogüe reta ñogüɨnoia omboeterenga opaete omanogüe reta ñogüɨnoi pɨpe vae. Jare metei ñavo oñejäauka reta jembiapo oï rupi.

¹⁴ Jare mano jare omanogüe reta ñogüɨnoia oyemombouka tata guasu pe. Kuae ko jae mano mokoía.

¹⁵ Jare jee mbaetɨ oyekuatía jókuae tembikuatía tekove pegua pe vae oyemombouka tata guasu pe.