Apocalipsis 19 - Biblia Guarani Tumpa Iñee

Mbaemboete reta ara pe

¹ Kuae jaɨkue rupi aendu jeta yae vae reta iñeeäta reve ara pe, jei reve: “¡Aleluya! yemboasa, yemboete jare mbaepuere jae ko yandeYa Tumpa imbae.

² Echa iporojäa reta añete jare jupi ko; echa jae ojäa jókuae kuña iyaguasa pota vae, opa güɨrokomegua opaete ɨvɨ pegua reta iyaguasa pota pe, ërei Tumpa oyepɨ ma jembiokuai reta imano re.”

³ Jare jei reta ye: “¡Aleluya! Jätatita jekuaekuae avei rupi.”

⁴ Jare jókuae veinticuatro tenondegua okuakuaa vae reta jare jókuae irundɨ oikove vae reta oyetavatɨka itindɨasɨ reve omboete reta Tumpa, oguapɨ oï iguapɨa pe vae, jae reta jei: “¡Amén! ¡Aleluya!”

⁵ Jare oë metei ñee Tumpa iguapɨa güi jei: “Pemboete ñaneTumpa, pe opaete jembiokuai reta jare oipoɨu chugüi vae, michia reta jare okuakuaa vae reta.”

⁶ Jayave aendu jeta yae vae iñee rami, ɨ jeta vae jɨapu rami, ara täta jɨapu rami, jei: “¡Aleluya! Echa yandeYa Tumpa Imbaepuere yae vae oporookuai ma.

⁷ Yavɨakatu, yayerovia jare yamboete; echa oväe ma ara Vecha kuimbae taɨrusu vae omenda vaerä jare jembirekorä vae oyeapokatu ma:

⁸ Jembirekorä vae pe oñemee ma temimonde lino ikavigüe, ikɨambae jare jembipe vae. Echa lino ikavi vae ko jae oporogüɨrovia vae reta jeko jupi vae.”

Vecha kuimbae taɨrusu vae imenda

⁹ Jare jae jei cheve: “Eikuatía körai: ‘Oyerovia ko jókuae Vecha kuimbae taɨrusu vae imenda pe oyeparea oike vaerä vae reta.’ ” Jekuae jei ye: “Kuae ñee reta ko Tumpa iñee añetete vae.”

¹⁰ Jayave ayetavatɨka chetindɨasɨ reve araɨgua jóvai amboete vaerä, ërei jae jei cheve: “Agüɨye chemboete. Che Tumpa pe ayeokuai vae vi ko, nde jare nderɨvɨ reta imiari Jesús regua vae reta rami. Emboete Tumpa.” Echa Jesús regua oyemombeu vae, ñeemombeúa reta omoërakua vae ko.

Kavayu tïi vae re opo vae

¹¹ Jayave aecha ara oyepea. Jare joko pe oyekuaa metei kavayu tïi vae, jare opo jese vae jee Jupi vae jare Añetete vae, jae oporojäa jare oñeraro jupi rupi.

¹² Jesa tata jendɨ vae rami ko, jare iñäka re güɨnoi jeta äka-regua reta. Jare oyekuatía oï jese metei tee, mbaetɨ kia oikuaa vae, jaeño etei oikuaa.

¹³ Jare jemimonde moropɨ̈ta tugüɨ pe. Jare jae jee ko: TUMPA IÑEE.

¹⁴ Jare jeta yae vae araɨgua jemimonde lino ikavigüe vae, tïiasɨ jare ikɨambae vae reta yogüeru jaɨkue kavayu tïi vae reta re.

¹⁵ Jare iyuru güi oë metei kɨsepuku jaimbe vae. Pɨpe oyuka vaerä tëtaguasu pegua reta. Jare oporookuaita ipopoka jiero pegua pe. Opɨ̈rota jese reta uva oñetɨami yave oñepɨ̈ro jese vae rami, Tumpa Imbaepuere yae vae iyarasɨ yae rupi.

¹⁶ Jare jemimonde re jare iu re oyekuatía oï metei tee, jae ko: “MBURUVICHA GUASU RETA JUVICHA GUASU JARE IMBAEPUERE YAE ETE MBAEPUERE GÜƗNOI VAE RETA GÜI VAE.”

¹⁷ Jare aecha metei araɨgua oyemboɨ oï kuaraɨ re. Jae iñeeäta reve jei opaete güɨra oveve ñogüɨnoi vae reta pe: “¡Peyu peyemboatɨ, karu guasu Tumpa oyapo vae pe,

¹⁸ peu vaerä mburuvicha guasu reta isoogüe, sundaro ruvicha reta isoogüe, kuimbae jëia yae vae reta isoogüe, kavayu reta isoogüe, kavayu regua reta isoogüe, opaete vae reta isoogüe: Tembiokuai jare tembiokuaimbae isoogüe, michia reta jare okuakuaa vae reta isoogüe!”

¹⁹ Jare aecha jókuae mbaemɨmba guasu, jare ɨvɨ pegua mburuvicha guasu reta jare opaete isundaro reta oyemboatɨ oñeraro vaerä kavayu re opo vae jare isundaro reta ndive.

²⁰ Jare oyepɨɨuka jókuae mbaemɨmba guasu ñeemombeúa raanga ndive, jae ko jókuae oporombotavɨ oyapo yave mɨakañɨ reta jókuae mbaemɨmba guasu jóvai vae; ombotavɨ mbaemɨmba guasu ikañɨmaa güɨnoi vae reta jare iägüe omboete vae reta. Kuae mókoi reve oyemombouka jekove reve tata guasu jendɨ oï azufre ndive vae pe.

²¹ Jare opaete mbaemɨmba guasu isundaro reta oyeyukauka kavayu re opo vae ikɨsepuku oë iyuru rupi vae pe. Jare opaete güɨra reta oyemoangapɨɨ isoogüe reta re.