Apocalipsis 18 - Biblia Guarani Tumpa Iñee

Babilonia oa vae regua

¹ Jare kuae jaɨkue rupi aecha ïru araɨgua ogüeyɨ ou ara güi imbaepuere yae reve, jare ɨvɨ jembipe jókuae araɨgua jembipe pe.

² Jare osapúkai reve jei: “Oa ma, oa ma Babilonia guasu. Opɨta aña reta jëtarä, opaete espíritu ikɨa vae oikoarä. Güɨra oyeumbae jare oñereröɨro vae jëtarä.

³ Echa opaete tëtaguasu reta jou vino rami jókuae teko ikavimbae vae; jare mburuvicha guasu reta ɨvɨ pegua oyapo aguasa jae ndive, jare ɨvɨ pegua reta omaemee vae oyemboikokatu imbaepotarai re.”

⁴ Jare aendu ïru ñee ara güi jei: “Peë joko güi, chembae reta, agüɨye vaerä peyapo mbaeyoa reta jae oyapo rami, jare agüɨye vaerä peiporara mbaesusere reta chupe oyeapota vae;

⁵ echa iyoa oa ojo ara re, jare Tumpa oecha jókuae jeko ikavimbae.

⁶ Pemee vi chupe jae omee rami, pemboekovia chupe mókoi ye jembiapo oï rupi. Peyapo mókoi ye chupe jae omee kopa pe ïru vae jou vaerä vae pe yeño.

⁷ Jae oyemboete yae jare ogua jeta mbaembae jepɨ yae vae, jökorai vi toiporara yae jare tipɨatɨtɨ yae. Echa jei iyeupe: Che aguapɨ aï mburuvicha kuña rami, mbaetɨ ko kuña imemano vae che, ngaraa etei chepɨatɨtɨ.

⁸ Jáeramo metei ara peño oyeapota chupe jeta mbaesusere: mano, mbɨatɨtɨ jare karuai, jare opata ókai, echa imbaepuere yae ko yandeYa Tumpa ojäa vae.”

⁹ Jare ɨvɨ pegua mburuvicha guasu reta oyapo aguasa jae ndive vae jare jae ndive oyerovia vae oyaeota jare oapïrota, oecha yave jätati opa ókai güi.

¹⁰ Ërei jae reta oyemboɨta mombɨrɨ tëta guasu güi, okɨɨye ramo oiporara oï vae güi, jei reve: “Paravete tëta guasu Babilonia, tëta guasu imbaepuere yae vae; echa neparanoe oväe reiporara yae vaerä.”

¹¹ Jare opaete ɨvɨ rupi omaemee vae reta oyaeota jare oapïrota, echa ngaraa ma kia ogua chugüi reta imbaembae:

¹² Mbaembae oro pegua, korepoti pegua, ita ipöra yae vae reta, lino ikavi vae, temimonde pɨ̈taü vae, seda, temimonde pɨ̈taasɨ vae, oipotagüe ɨvɨra ipiche kavi vae, opaete mbae elefante jäi mbuku pegua, opaete ɨvɨra jepɨ yae vae pegua, jiero iyu vae pegua, jiero pegua jare ita mármol jee vae pegua;

¹³ ngaraa ma kia ogua canela, mbae ikäti kavi vae, ikäti kavi vae incienso, mirra, ikäti kavi vae, vino, asaite, trigokúi ipɨuasɨ vae, trigo, mburika reta, vecha reta, kavayu reta, käretou reta, tembipɨɨ reta, kuimbae reta jekove.

¹⁴ Jare jei retata tëta guasu pe: “Reipota yae vae mbaetɨ ma renoi, opaete mbaembae ikavi yae vae, ngaraa ye ma reväe.”

¹⁵ Omaemee vae reta oyemboikokatu jese, oyemboɨta mombɨrɨ okɨɨye ramo oiporara oï vae güi, oyaeo reve jare oapïro reve,

¹⁶ jei reve: “Paravete tëta guasu, oyemonde lino ikavigüe pe vae, pɨ̈taü vae pe, pɨ̈taasɨ vae pe, oñemopöra oro pe, ita ipöra vae pe jare ïru oipotagüe ita ipöra vae pe.

¹⁷ Echa neparanoe oväe oyemboai vaerä jeta ndembaeyekou reta.” Opaete barco guasu imboguataa reta, oguata pɨpe vae reta, barco guasu pe oparavɨkɨ vae reta, opaete ɨguasu rupi oguata omaemee vaerä vae reta oyemboaita mombɨrɨ,

¹⁸ jare osapúkai reta tëta guasu jätati oecha yave, jei reve: “¿Kia nunga tëta guasu pa omboyovake kuae tëta guasu?”

¹⁹ Jare oñono reta ɨvɨkúi iñäka re osapúkai reve oyaeo reve jare oapïro reve jei reta: “Paravete tëta guasu, imbaembae pe oyemboikokatu barco iya reta. ¡Echa iparanoe opa oyemboai!

²⁰ Peyerovia jese, ara pe peiko vae. Jare pe oporogüɨrovia vae reta, temimondo reta jare ñeemombeúa reta, echa Tumpa oyepɨ peve.”

²¹ Jayave metei araɨgua imbaepuere yae vae oipɨɨ metei ita, ita tuicha vae oyembaeso pɨpe rami vae, jare omombo ɨguasu pe jei reve: “Köraita rea tätagüe tëta guasu Babilonia. Ngaraa ye ma kia ndereecha.

²² Ngaraa ye ma oyeendu arpa reta ipu, mimbɨñee reta, mimbɨguasu iñee reta; jaeramiño vi ipoki ombaapo vae reta ngaraa ye ma oime ndepɨpe ani ombaeso vae reta ave ngaraa ye ma oyeendu ndepɨpe.

²³ Jaeramiño vi ngaraa ye ma jendɨ ndepɨpe mechero, ani kia omenda vae iarete. Echa omaemee yepi joko pe vae reta tuichagüe reta yepi, echa ndepaye reta rupi rembotavɨ opaete tëtaguasu reta.”

²⁴ Echa kuae tëta guasu pe oñeväe ñeemombeúa reta jugüɨ, oporogüɨrovia vae reta jugüɨ jare opaete ɨvɨ pe oyeyukauka vae reta jugüɨ.