Apocalipsis 16 - Biblia Guarani Tumpa Iñee

Chiu kopa reta arasɨ pegua

¹ Jare aendu metei ñee tätagüe tupao güi jei jókuae chiu araɨgua reta pe: “Pekua pepɨyere ɨvɨ re jókuae chiu kopa Tumpa iyarasɨ güɨnoi vae reta.”

² Jayave tenondegua araɨgua ojo opɨyere kopa güɨnoi vae ɨvɨ re, jare opa ombopere omojemɨi jare jasɨ yae reve ɨvɨ pegua reta, jókuae mbaemɨmba guasu ikañɨmaa güɨnoi vae, jókuae mbaemɨmba guasu iä omboete vae reta.

³ Jare araɨgua mokoía opɨyere kopa güɨnoi vae ɨguasu re, jare jókuae ɨguasu oyeapo tugüɨrä metei kuimbae oyeyuka vaeecha. Jare opaete ɨguasu pe oikove vae omano.

⁴ Jare araɨgua mboapɨa opɨyere kopa güɨnoi vae ɨ̈aka reta re jare ɨesaɨ reta re, jare opa oyeapo tugüɨrä.

⁵ Jare aendu araɨgua ɨ re mbaepuere güɨnoi vae jei: “OreYa Tumpa, nde ko jupi vae, iyɨpɨ güive jare añave reiko vae, Iyoambae vae, echa rejäa opaete mbaembae,

⁶ echa jae reta oyuka oporogüɨrovia vae reta jare ñeemombeúa reta, jáeramo remee vi jou reta tugüɨ. ¡Echa jupi ko jökorai vaerä!”

⁷ Jare aendu ñee mɨmba oyeyukagüe oyeapɨ oñemeea güi, jei: “Añete ko, oreYa Tumpa Imbaepuere yae vae, neporojäa reta añete ko jare jupi ko.”

⁸ Jare araɨgua irundɨa opɨyere kopa güɨnoi vae kuaraɨ re, jare oñemee kuaraɨ pe mbaepuere oapɨ vaerä ɨvɨ pegua reta.

⁹ Jare ɨvɨ pegua reta ókai kuaraɨ jakugüe pe. Ërei mbaetɨ oyerova reta Tumpa kotɨ omboete vaerä. Jókuae güɨnoi mbaepuere opaete kuae susere reta re vae kotɨ.

¹⁰ Jare araɨgua pandepoa opɨyere kopa güɨnoi vae jókuae mbaemɨmba guasu iguapɨa re, jare oyembopɨtumimbi yae mbaemɨmba guasu iporookuaía. Jare jókuae mborookuaía pegua reta oñekü suu oiporara yae güi.

¹¹ Jare jei reta ñee ikavimbae vae Tumpa ara pe oï vae kotɨ, oiporara yae güi jare ipere jemɨi jasɨ yae güi, jare mbaetɨ oeya reta jembiapo ikavimbae vae.

¹² Jare araɨgua ovaa opɨyere kopa güɨnoi vae ɨ̈aka guasu Éufrates re. Jare tɨpa, oñemokätɨro mburuvicha guasu reta kuaraɨ oëa kotɨgua oasa vaerä.

¹³ Jare aecha oë mbaeporou iyuru güi, mbaemɨmba guasu iyuru güi jare ñeemombeúa raanga iyuru güi mboapɨ espíritu ikɨa vae pïte rami vae;

¹⁴ jae reta ko aña reta iespíritu, mɨakañɨ oyapo vae reta. Jae reta yogüɨraja opaete ɨvɨ rupi mburuvicha guasu reta jëta guasu ñavo rupi omboatɨ oñeraro vaerä Tumpa Imbaepuere yae vae iporojäa iara pe.

¹⁵ YandeYa jei: “Mase, ko ayu imonda vae rami, oyerovia ko jókuae oñemokätɨro vae, jare jemimonde omongɨambae vae, agüɨye vaerä inandi reta jare güɨromara inandi.”

¹⁶ Jare omboatɨuka reta hebreo iñee pe Armagedón jee vae pe.

¹⁷ Jare araɨgua chiúa opɨyere kopa güɨnoi vae ɨvɨtu re. Jare oyeendu metei ñee tätagüe ara pegua tupao güi, Tumpa iguapɨa güi, jei reve: “¡Oyeapo ma!”

¹⁸ Jayave ama-vera reta, ñee reta, ararɨapu reta jare ɨvɨkana tätagüe; ɨvɨkana tuicha yae vae, mbaetɨi oyeapo jókuae nunga ɨvɨ pegua reta yogüɨreko güive.

¹⁹ Jare tëta guasu oyemboyao mboapɨ pe, jare tëta guasu reta ïru ɨvɨ pegua opa oa. Jare Tumpa imaendúa jókuae tëta guasu Babilonia jee vae re, jouuka vaerä chupe vinoecha, iyarasɨ yae ikotɨ vae.

²⁰ Jare opaete ɨvɨ ɨguasu-päu pegua jare ɨvɨtɨ reta opa okañɨtei.

²¹ Jare ara güi oa opaete vae reta re metei amandau guasu reta, treinta kilo oasa ipoɨ vae. Jare ɨvɨ pegua reta jei ñee ikavimbae vae Tumpa kotɨ, jókuae susere amandau guasu rupi vae re, echa jókuae susere oasa ete ikaviä.