Apocalipsis 15 - Biblia Guarani Tumpa Iñee

Araɨgua reta chiu mbaesusere taɨkuegua reta ndive

¹ Aecha oyekuaa ye ara re ïru mbae tuichagüe jare ñanemopɨakañɨ vae, jae ko: Chiu araɨgua chiu mbaesusere taɨkuegua güɨnoi vae reta. Echa jókuae reta rupi iyapɨta Tumpa iyarasɨ.

² Aecha vi ɨguasu vidrio rami vae tata ndive oyea vaeecha vae. Jare jókuae mbaemɨmba guasu ɨguasu güi oë vae jare iä jare ikañɨmaa jare jee inúmero omoamɨri vae reta oyemboɨ ñogüɨnoi jókuae ɨguasu vidrio rami vae re, güɨnoi reve arpa reta Tumpa omee chupe reta vae.

³ Jare otairari reta Moisés Tumpa jembiokuai itairari jare Vecha kuimbae taɨrusu vae itairari pe, jei reve: “Oreya Tumpa Imbaepuere yae ete vae, tuicha yae jare oremopɨakañɨ yae ko nderembiapo reta. Jupi jare añetete ko nderemimbota reta, oporogüɨrovia vae reta Juvicha Guasu.

⁴ ¡Opaete vae okɨɨyeta ndegüi, oreYa! ¡Opaete vae omboeteta nderee! Echa ndeño ko jae iyoambae vae. Jáeramo opaete tëtaguasu reta yogüeruta jare ndemboete retata, echa oyekuaa ma neporojäa reta.”

⁵ Kuae jaɨkue rupi amae jare aecha oyepea tupao ara pe, tupao yemomaendúa pegua.

⁶ Jare jókuae tupao güi oë chiu araɨgua reta güɨnoi reta chiu mbaesusere vae. Jemimonde lino ikɨambae pegua jare jembipe, oyekuakua reta metei kuakuaa ipeguasu yae vae oro pegua pe.

⁷ Jare jókuae irundɨ oikove vae reta güi metei omee jókuae chiu araɨgua reta pe chiu kopa oro pegua, jókuae kopa reta tɨnɨe Tumpa iyarasɨ pe, jae ko oiko jekuaekuae avei rupi vae.

⁸ Jare tupao tɨnɨe tätati pe, Tumpa iyemboetea jare imbaepuere rupi. Jare mbaetɨ etei kia ipuere oike tupao pe, ndei jókuae chiu mbaesusere jókuae chiu araɨgua reta güɨnoi vae oyeapo mbove.