Apocalipsis 14 - Biblia Guarani Tumpa Iñee

Ciento cuarenta y cuatro mil vae reta itairari

¹ Jaɨkue rupi amae jare aecha Vecha kuimbae taɨrusu vae oyemboɨ oï ɨvɨtɨ Sión re. Jae ndive ciento cuarenta y cuatro mil vae reta. Jae reta jesɨva re oyekuatía oï Vecha kuimbae taɨrusu vae jee jare Tu jee.

² Jare aendu ñee ara güi täta jɨapu jeta ɨ vae jɨapu rami jare ararɨapu täta vae rami. Jókuae ñee jeta vae arpa imbopúa reta ombopu vae rami.

³ Jare otairari reta metei tairari ipɨau vae Tumpa iguapɨa jare jókuae irundɨ oikove vae reta jare tenondegua okuakuaa vae reta jóvai. Jare mbaetɨ kia ipuere oikuaa jókuae tairari, jaeño jókuae ciento cuarenta y cuatro mil Cristo oepɨ ɨvɨ pegua reta ipɨte güi vae reta.

⁴ Jae reta mbaetɨ oyemongɨa kuña reta ndive. Echa mbaetɨ etei oasa reta kuña ndive. Jae reta yogüɨraja Vecha kuimbae taɨrusu vae ndive kerupi ojoa rupi. Kuae reta ko Cristo oepɨ ɨvɨ pegua reta ipɨte güi vae. Jae reta ko mbaagüɨye rɨpɨ rami Tumpa jare Vecha kuimbae taɨrusu vae peguarä.

⁵ Jare jese reta mbaetɨ oñeväe apu, echa ikɨambae reta ko Tumpa iguapɨa jóvai.

Mboapɨ araɨgua reta omombeu vae

⁶ Jare aecha ïru araɨgua oveve ara mbɨte rupi, güɨnoi omoërakua vaerä ñee ikavi vae opambae vae ɨvɨ pegua reta pe, opaete tëtaguasu reta pe, ñemuña reta, ñee ambuae mbuae reta pe jare tëta reta pe,

⁷ iñeeäta reve jei: “Peipoɨu Tumpa güi jare pemboete, echa iporojäa iora ou ma oväe. Pemboete ara, ɨvɨ, ɨguasu jare ɨesaɨ reta iyapoa.”

⁸ Jare araɨgua mokoía ïru jaɨkue ou vae jei: “¡Oa ma, oa ma Babilonia, tëta guasu tuicha vae! Echa jae jeko ikavimbae pe omongau opaete tëtaguasu reta.”

⁹ Jare araɨgua mboapɨa ïru jaɨkue ou vae jei iñeeäta reve: “Oime yave kia jókuae mbaemɨmba guasu ɨguasu güi oë vae jare iä omboete jare ikañɨmaa jesɨva re ani ipo re güɨnoi vae,

¹⁰ jae jouta vi Tumpa iyarasɨ oyeambae etei oï kopa pe vae. Oiporara yaeta tata jare azufre araɨgua reta iyoambae jare Vecha kuimbae taɨrusu vae jóvai.”

¹¹ Jare jembiporara jätati oyeupi jekuaekuae avei rupi. Jare mbaetɨ oputuu reta ara rupi ani pɨ̈tu rupi, jókuae mbaemɨmba guasu jee oyekuatía jese vae.

¹² ¡Kuae pe oyekuaata oporogüɨrovia vae reta ipɨa guasu, jare oyapo Tumpa iporookuai reta jare güɨrovia Jesús re vae reta!

¹³ Jare aendu metei ñee ara güi jei cheve: “Eikuatía kuae: ‘Oyerovia ko añave güive yandeYa re güɨrovia güi omano vae reta.’ ” Jei Espíritu: “Oyerovia ko, echa oputuu retata iparavɨkɨ güi. Echa iparavɨkɨ ojo jae ndive.”

Mbaarɨvo iara ɨvɨ pe

¹⁴ Amae jare aecha amapɨtu tïi vae jare jókuae amapɨtu re oguapɨ oï Kuimbaerä oyeapo vaeecha vae. Jare iñäka re güɨnoi äka-regua oro pegua, jare ipo pe metei hoz jaimbe vae.

¹⁵ Jare tupao güi oë ïru araɨgua jare iñeeäta reve jei amapɨtu re oguapɨ oï vae pe: “¡Eiporu jókuae hoz jare embaarɨvo! Echa mbaarɨvo iara ou ma oväe, echa mbaagüɨye ma ɨvɨ pe.”

¹⁶ Jare amapɨtu re oguapɨ oï vae oiporu hoz güɨnoi vae ɨvɨ re jare oarɨvo ɨvɨ pe oï vae.

¹⁷ Jare ïru araɨgua oë tupao ara pe oï vae güi, jae güɨnoi vi hoz jaimbe vae.

¹⁸ Jare ïru araɨgua oë mɨmba oyeyukagüe oyeapɨ jesea güi güɨnoi mbaepuere tata re vae, jae oenɨi osapúkai reve araɨgua hoz jaimbe vae güɨnoi vae, jei reve: “¡Eiporu hoz jaimbe vae renoi vae jare eipoo ɨvɨ pegua uva reta, echa yagüɨye ma!”

¹⁹ Jayave jókuae ïru araɨgua oiporu ɨvɨ re hoz güɨnoi vae jare oipoo ɨvɨ pegua uva reta. Jayave omombo uva, oñetɨami pɨpea tuicha vae pe, jae ko Tumpa iyarasɨ.

²⁰ Jare jókuae uva oñetɨamía oï tëta guasu güi ikatu pe, joko pe oñetɨami uva. Jare jókuae uva oñetɨamía güi oë tugüɨ, jare oupitɨ kavayu reta iyayu rupi jare osɨrɨ tresciento kilómetro rupi.