Apocalipsis 13 - Biblia Guarani Tumpa Iñee

Mókoi mbaeporou reta

¹ Ayemboɨ ɨguasu jembeɨ pe ɨvɨkuitï pe, jare aecha mbaemɨmba guasu oë ɨguasu güi, güɨnoi chiu iñäka, payandepo jäti jare jókuae jäti ñavo re güɨnoi äka-regua. Jare iñäka re güɨnoi tee ikavimbae Tumpa kotɨ vae.

² Jare jókuae mbaemɨmba guasu aecha vae metei yaguaparaecha, jare ipɨ oso ipɨecha, jare iyuru yaguapope iyuruecha. Jare mbaeporou guasu tenonde aecha vae omee chupe imbaepuere jare iguapɨa mburuvicha pegua.

³ Jare aecha metei jókuae mbaemɨmba guasu ɨguasu güi oë vae iñäka ipere omano vaerä etei. Ërei okuera jókuae ipere güi. Jare opaete ɨvɨ pegua reta ipɨakañɨ jókuae mbaemɨmba guasu re,

⁴ jare omboete reta mbaeporou guasu omee mbaepuere mbaemɨmba guasu pe vae. Jaeramiño vi omboete reta jókuae mbaemɨmba guasu, jei reve: “Mbaetɨ yé ko kia kuae mbaemɨmba guasu rami vae. ¿Kia pa ipuereta oñeraro jae ndive?”

⁵ Oñemee vi chupe jei vaerä mbae tuichagüe jare ñee ikavimbae vae Tumpa kotɨ. Oñemee chupe mbaepuere oyapo vaerä jókuae ikavimbae cuarenta y dos yasɨ.

⁶ Jare jei jeta ñee ikavimbae Tumpa kotɨ, jee kotɨ, itupao kotɨ jare ara pe yogüɨreko vae reta kotɨ.

⁷ Jare Tumpa omaeño jese oñeraro vaerä oporogüɨrovia vae reta kotɨ jare omoamɨri vaerä. Oñemee vi chupe mbaepuere opaete ñemuña, tëta reta, ñee ambuae mbuae jare tëtaguasu reta re.

⁸ Jare omboete opaete ɨvɨ pegua reta jee mbaetɨ oyekuatía oï Vecha kuimbae taɨrusu vae jembikuatía tekove opambae vae pegua pe vae. Vecha kuimbae taɨrusu vae oyeyukauka ko ndei ɨvɨ oyeapo mbove.

⁹ Oipota oyeapɨsaka vae, toyeapɨsaka:

¹⁰ “Oyembojee tembipɨɨrä oyereraja vaerä vae, toyereraja; oyembojee kɨsepuku pe omano vaerä vae, pɨpe tomano.” Kuae pe oyekuaata oporogüɨrovia vae reta ipɨa guasu jare iporogüɨrovia.

¹¹ Javoi aecha ïru mbaemɨmba guasu oë ɨvɨ güi, güɨnoi mókoi jäti metei vecha kuimbae taɨrusu vae jäti rami. Ërei imiari jókuae mbaeporou guasu rami.

¹² Jare imbaepuere oyovake jókuae tenondegua mbaemɨmba guasu ndive, jare oyókuai opaete ɨvɨ pegua reta omboete vaerä jókuae tenondegua mbaemɨmba guasu ipere güi okuera vae.

¹³ Oyapo vi mɨakañɨ reta tuichagüe, tata ave ombou ara güi ɨvɨ pegua reta jovake.

¹⁴ Jare mɨakañɨ oyapo mbaemɨmba guasu jovake vae rupi ombotavɨ ɨvɨ pegua reta. Jare oyókuai ɨvɨ pegua reta oyapo vaerä jókuae mbaemɨmba guasu ipere kɨsepuku pe vae jare oikove yae vae iä.

¹⁵ Jare jókuae mbaemɨmba guasu taɨkue aecha vae güɨnoi mbaepuere omee vaerä tekove jókuae ïru mbaemɨmba guasu iä pe, jare imiari vaerä jare oyukauka vaerä opaete ñäteɨ omboete vae.

¹⁶ Jare oyókuai opaete vae, michia reta, okuakuaa vae reta, oikokatu vae reta, iparavete vae reta, tembiokuaimbae reta jare tembiokuai reta güɨnoi vaerä metei kañɨmaa ipo iyakatu re ani jesɨva re.

¹⁷ Jare oime yave kia jókuae tenondegua mbaemɨmba guasu ikañɨmaa ani jee ani inúmero mbaetɨ güɨnoi vae, mbaetɨ ipuere ombaegua ani omaemee.

¹⁸ Kuae pe oime arakuaa. Oime arakuaa güɨnoi vae toipapa mbaemɨmba guasu inúmero, echa kuimbae inúmero ko. Jókuae número ko jae seisciento sesenta y seis.