Apocalipsis 12 - Biblia Guarani Tumpa Iñee

Kuña jare mbaeporou

¹ Jare oyekuaa ara re mbae tuichagüe, jae ko: Metei kuña kuaraɨ pe oyemonde rami, jare oyemboɨ oï yasɨ iárambo, jare iñäka re äka-regua doce yasɨtata güɨnoi vae.

² Ipurúa jare imembɨ rasɨ ma oï, imembɨ oata vae rami.

³ Jare oyekuaa vi ara re ïru mbae tuichagüe, jae ko: Metei mbaeporou tuichagüe pɨ̈ta vae. Güɨnoi chiu iñäka, payandepo jäti jare iñäka ñavo re güɨnoi äka-regua.

⁴ Jare júguai pe ombotɨrɨrɨ mbɨte seri yasɨtata reta, jare omombo ɨvɨ re. Jare jókuae mbaeporou guasu oyemboɨ kuña imembɨ oata oï vae jóvai, opa vaerä jou imembɨ chugüi oa rupive.

⁵ Jare kuña imembɨ oa kuimbae; jare jókuae oa vae oyokuaita kuri opaete tëtaguasu reta ipopoka jiero pegua pe. Ërei oyererajauka chugüi imembɨ Tumpa pe, iguapɨa jóvai.

⁶ Jare jókuae kuña otekuarai ñuu kotɨ, echa joko pe Tumpa omokätɨro chupe jendarä. Jare joko pe omongaru retata kuña mil dosciento sesenta ara rupi.

⁷ Javoi Miguel jare iaraɨgua reta ndive täta oñeraro ara pe jókuae mbaeporou ndive. Mbaeporou jare iaraɨgua oñeraro,

⁸ ërei jae reta mbaetɨ ipuere oporomoamɨri jare mbaetɨ ma jendarä ara pe.

⁹ Jare oyemombouka jókuae mbaeporou guasu, mboi ñɨma vae, aña guasu Satanás jee vae, jae ko ombotavɨ opaete ɨvɨ pegua reta vae; oyemombouka ara güi opaete iaraɨgua reta ndive.

¹⁰ Jayave aendu ñee tätagüe ara pe, jei: “Ou ma oväe yemboasa, mbaepuere jare ñaneTumpa iporookuaía jare jemimbou Cristo imbaepuere. Echa oyemombouka ma yanderɨvɨ reta omboekose Tumpa jóvai ara rupi jare pɨ̈tu rupi vae.

¹¹ Jare yanderɨvɨ reta omoamɨri Satanás Vecha kuimbae taɨrusu vae jugüɨ rupi jare Tumpa iñee omoërakua reta vae rupi, ërei jae reta mbaetɨ güɨrokɨɨye jekove, mbaetɨ etei okɨɨye reta omano regua.

¹² ¡Jáeramo, peyerovia ara jare pɨpegua reta! ¡Ërei paravete ɨvɨ pegua reta jare ɨguasu pegua reta! ¡Echa aña guasu ogüeyɨ ma peve iyarasɨ yae reve, echa jae oikuaa michi peguaño ma oikota!”

¹³ Jare jókuae mbaeporou oikuaa yave oyemombouka ma ko ɨvɨ pe, oaɨkuemoña jókuae kuña imembɨ kuimbae vae.

¹⁴ Ërei oñemee kuña pe mókoi güɨraké tuicha vae ipepo, ipuere vaerä oveve ñuu kotɨ mboi güi. Jare joko pe omongaru retata kuña mboapɨ año y medio.

¹⁵ Jare jókuae mboi omombo jeta ɨ iyuru güi, kuña jaɨkue, güɨrajauka vaerä jókuae ɨ pe;

¹⁶ ërei ɨvɨ omborɨ kuña, echa ɨvɨ oyepea jare opa jou ɨ jókuae mbaeporou iyuru güi omoë vae.

¹⁷ Jayave mbaeporou pochɨ kuña pe, jare ojo oñeraro kuña iñemuña reta jembɨregüe ndive, jókuae Tumpa iporookuai reta jei vae oyapo vae reta jare güɨrovia Jesucristo re vae reta.